Wol

in Wikipedia, die vrye ensiklopedie
Spring na: navigasie, soek
'n Skaap word vir sy wol geskeer.
Geklassifiseerde kort- en langhaarwol.
Verskillende kleure verwerkte wol.

Wol is die produk wat verkry word wanneer gewoonlik skape, of Angorabokke se huidbedekking (hare) afgeskeer is. Dit word skoongemaak en verder verwerk tot 'n materiaal wat vir klere, komberse en ander uitrusting vir die mens se gemak gebruik word. Dit is saam met katoen waarskynlik een van die natuurlikste stowwe wat aan 'n persoon gedra kan word.

Van die positiewe eienskappe wat wolprodukte besit, is dat dit nie veel rek of krimp nie, dit is warm in die winter en koel in die somer. Dit kan maklik gekleur word en kan versigtig gewas word.

Wol maak 'n groot deel uit van die inkomste vir skaapboere, aangesien alle skape wol dra, of die dier nou geslag word later of nie. Wol bevat ook ander voordelige natuurlike stowwe, bv. wolvet en lanolien (hidriese wolvet), wat in die kosmetiese bedryf aangewend word as bevogtigings- en smeermiddel vir die vel, veral in die winter.

Versorging van wolklere[wysig]

Wol is 'n sagte weefsel. Dit is wel bestand teen wind en weer, maar solank dit aan die skaap sit kom dit natuurlik nie in aanraking met seep en warm water nie. 'n Trui wat oor 'n hemp of T-hemp gedra word hoef nie dikwels gewas te word nie. Dieselfde geld vir baadjies en jasse, wat soms net belug hoef te word.

Dit geld egter nie vir alle wolsoorte nie, en dit is verkieslik om wol met die hand te was, al laat vervaardigers van skoonmaakmiddels en wasmasjiene jou soms anders glo. Die sorg-etiket aan die kledingstuk moet altyd goed gelees word. Indien daar op die etiket 'n hand in 'n wasbak verskyn, dan moet die wolstuk slegs met die hand gewas word, verkieslik in lou water en met 'n wolwasmiddel. Nadat dit gewas is moet dit ook 'n paar keer uitgespoel word in louwarm water. Moet nooit die wol wring nie, maar druk dit versigtig droog op 'n plat tafel, om die vorm van die stuk te herwin.

Dit is 'n misverstand dat die wastemperatuur nooit hoër as 30 grade mag wees nie, die kleurproses van wol vind immers teen veel hoër temperature plaas, sonder enige krimping of vervilting. Wol is egter wel vatbaar vir 'n vinnige temperatuurveranderings. Stadige verhitting en afkoeling is dus van kardinale belang. Moet nooit wol laat week of spindroog nie.

Hierdie artikel is in sy geheel of gedeeltelik vanuit die Nederlandse Wikipedia vertaal.