Charles Rennie Mackintosh

in Wikipedia, die vrye ensiklopedie


Charles Rennie Mackintosh


Skotse argitek en kunstenaar


Skool
Glasgow School / Jugendstil


Beduidende projekte en werke


Kelvingrove-kunsmuseum in Glasgow


Ontwerpkuns


Room de Luxe, Willows Tea Room

Charles Rennie Mackintosh (* 7 Junie 1868 in Glasgow; † 10 Desember 1928 in Londen) was 'n Skotse argitek, binnenshuise ontwerper, kunshandwerker, ontwerper, grafiese kunstenaar en skilder. Saam met sy vrou Margaret McDonald Mackintosh, haar suster Frances MacDonald McNair en James Herbert McNair het hy die kunsgroep The Four gestig wat onder meer beslissende invloed op die Glasgow School uitgeoefen het.

Wesfasade van die Mackintosh-gebou en Glasgowse kunsskool met Japannees-geïnspireerde geometriese vensters
Eetkamer in die "Huis vir 'n kunsliefhebber" (House for an art lover), Glasgow

In Glasgow en Skotland het Mackintosh, soos elders in die Verenigde Koninkryk, in sy leeftyd nouliks erkenning geniet as kunstenaar nie. Dit was vastelandse Europeërs, en hier veral Weense kuns- en ontwerpkringe, wat sy talent raakgesien het. Weense studente het Mackintosh in 'n blomversierde wa deur die stad gery toe hy saam met sy eggenoot Margaret McDonald in 1900 besoek aan die Oostenryks-Hongaarse hoofstad gebring het om 'n uitstalling van sy werk ter geleentheid van die VI. Secessions-Ausstellung by te woon.[1]

Oostenrykers was sodoende dekades vroeër bewus van die betekenis van Mackintosh se kunstenaarskap. Vandag word hy, ook en veral in sy geboortestad, vereer as een van die leidende persoonlikhede van die laat 19de eeuse Art Nouveau- of Jugendstil-beweging wat sy invloed ook op moderne ontwerp laat geld het. Hy word daarnaas as 'n invloedryke voorloper van die Modern Art-kunsstyl beskou. Sy buitengewone stoelontwerpe met hul kenmerkende rugleunings is in rolprente soos Blade Runner, televisiereekse soos Doctor Who asook Madonna se videosnit vir die treffer Express Yourself gebruik.[2]

Mackintosh se argitektoniese meesterwerk, die Glasgow School of Art (GSA) (intussen ook bekend as Mackintosh-gebou), het sedert die 19de eeu as 'n eersterangse kunsskool gedien wat in die middel van die GSA se kampus op Garnethill geleë was. Mackintosh, wat sy akademiese graad hier verwerf het, het die opgedrag gekry om 'n nuwe hoofgebou vir die kunsskool te ontwerp wat in twee fases tussen 1897 en 1909 ontstaan het. Die gebou met buitengewone stylelemente, waaronder vensters wat volgens die Japannese Sjogoen-styl ontwerp is ('n huldeblyk aan Glasgow se uitgebreide handelsbetrekkinge met Japan in die laat 19de eeu), het lesingsale, biblioteek asook studente en akademiese personeel se privaat woonvertrekke gehuisves. Die Mackintosh-gebou is in Mei 2014 deur 'n brand ernstig beskadig. Terwyl restorasiewerk nog aan die gang was, het die historiese kunsskool in 'n Tweede verwoestende brand in Junie 2018 tot op die grond afgebrand.

Verwysings[wysig | wysig bron]

Eksterne skakels[wysig | wysig bron]