Clarence Thomas

in Wikipedia, die vrye ensiklopedie
Jump to navigation Jump to search
Clarence Thomas
Clarence Thomas

Mederegter van die Federale Hooggeregshof van die VSA
Ampsbekleër
Termynaanvang
23 Oktober 1991
President benoem deur pres. George H.W. Bush
Voorafgegaan deur Thurgood Marshall

Regter van die Appèlhof vir die Distrik van Columbië
Voorafgegaan deur Robert Bork
Opgevolg deur Judith Rogers

Voorsitter van die Kommissie vir gelyke geleenthede vir werknemers
Voorafgegaan deur Eleanor Holmes Norton
Opgevolg deur Evan Kemp

Assistent-minister van Onderwys vir burgerregte
Voorafgegaan deur Cynthia Brown
Opgevolg deur Harry Singleton

Persoonlike besonderhede
Gebore 23 Junie 1948
Pin Point, Georgia
Nasionaliteit Vlag van Verenigde State van Amerika Amerikaner

Clarence Thomas (23 Junie 1948, Pin Point, Georgia) is 'n Amerikaanse juris en mederegter van die Federale Hooggeregshof van die Verenigde State van Amerika. Hy is slegs die tweede swart lid van die hooggeregshof. In 2022 is Regter Thomas een van ses uit nege regters wat in die saak van Dobbs v. Jackson Women’s Health Organization beslis dat die Grondwet van die Verenigde State geen algemene, federale reg op aborsie verleen nie, en dat inwoners van die individuele deelstate van die VSA voortaan by wyse van hul verkose verteenwoordigers die kwessie sal reël by wyse van staatswetgewing.[1]

Jeug en studies[wysig | wysig bron]

Thomas is in 1948 in Pin Point, Georgia gebore. Sy vader het die gesin verlaat toe Clarence maar een jaar oud was. In 1954 steek Clarence se broer per ongeluk hul huis aan die brand, waarna die gesin na 'n klein woonstel moes verhuis. Vanweë sy Rooms-Katolieke opvoeding het hy dit oorweeg om 'n priester te word, maar uiteindelik hiervan afgesien. Hy het aan die College of the Holy Cross in Massachusetts studeer en daar die eerste studentevereniging vir swartes gestig. In 1974 studeer hy af in die regte aan Yale-universiteit.

Thomas het hierna vanaf 1974 tot 1977 in Missouri gewerk, en daarna tot 1981 as regsadviseur vir 'n Amerikaanse senator van Missouri. In 1981 het Thomas in die administrasie van president Ronald Reagan begin werk. Hy het as staatssekretaris vir burgerregte by die Departement van Onderwys gewerk en is daarna aangestel as voorsitter van 'n kommissie wat rassegelykheid in die werksplek moes bevorder (die Equal Employment Opportunity Commission).

Appélhof en Hooggeregshof[wysig | wysig bron]

President George H.W. Bush het hom in 1990 as regter van die Appélhof vir die Distrik van Columbia benoem;[2] 'n jaar later is hy bevorder tot die Federale Hooggeregshof van die Verenigde State, na die aftrede van Thurgood Marshall, die eerste Afro-Amerikaanse regter van die Hooggeregshof. 'n Aantal organisasies, waaronder die NAACP en die "National Organization for Women", was teen sy benoeming vanweë sy standpunte ten opsigte van positiewe diskriminasie en hul veronderstelling dat hy nie die uitspraak van die Hooggeregshof in Roe v. Wade sou eerbiedig nie, welke saak 'n verbod neerlê op die deelstate van die Verenigde State om aborsie onwettig te maak.[3] Tydens die benoemingsproses is Thomas deur ene Anita Hill, 'n regsgeleerde wat onder hom gewerk het, van seksuele teistering beskuldig. Sy het haar getuienis voor 'n Senaatskommissie gelewer, maar die beskuldiging het egter nie water gehou nie. Op 15 Oktober 1991 het die Senaat met 'n meerderheid van 52 teenoor 48 stemme Thomas se aanstelling as regter van die Federale Hooggeregshof bevestig.[4]

Standpunte[wysig | wysig bron]

In vergelyking met die ander lede van die Hooggeregshof word Thomas allerweë as konserwatief beskou. Hy het dikwels tot dieselfde gevolgtrekkings gekom as sy kollega, Regter Antonin Scalia (wat in 2016 oorlede is); hy ag die eerste wysiging aan die Grondwet van die Verenigde State (wat handel oor vryheid van spraak, vryheid van geloof en vryheid om te vergader) as van kardinale belang. Hy word ook dikwels as 'n "originalist" beskou (iemand wat 'n "oorspronklike uitleg" van die Grondwet gee, of anders gestel, die Grondwet interpreteer ingevolge die [waarskynlike] bedoeling wat die opstellers in gedagte gehad het toe die Grondwet opgestel is). Hy het byvoorbeeld 'n eng uitleg verleen aan die agtste wysiging van die grondwet (die verbod op wrede en ongewone strawwe), soos blyk uit die saak Hudson v. MacMillian (1992). Hierin het hy hom geskaar by Regter Scalia, in teenstelling met die ander regters, wat van mening was dat die mishandeling van 'n gevangene, wat geen ernstige letsel opgedoen het nie, nie 'n skending van die agtste wysiging was nie.[5]

Verwysings[wysig | wysig bron]

  1. "Verreikende aborsie-uitspraak in die VSA". Maroela Media. Besoek op 2022-07-27.
  2. Jan Crawford Greenburg (30 September 2007). "Clarence Thomas: A Silent Justice Speaks Out" (in Engels). ABC News.
  3. Smith, Robert (2000). Contemporary Controversies and the American Racial Divide (in Engels). Rowman & Littlefield. ISBN 978-0742500259.
  4. Hall, Kermit (1992). The Oxford Companion to the Supreme Court of the United States (in Engels). Oxford Press. ISBN 978-0-19-505835-2.
  5. Crawford Greenburg, Jan (2007). Supreme Conflict: The Inside Story of the Struggle for Control of the United States Supreme Court (in Engels). ISBN 978-1594201011.

Naslaanwerk[wysig | wysig bron]

  • Foskett, Ken (2004). Judging Thomas: The Life and Times of Clarence Thomas (in Engels). Harper Paperbacks. p. 368. ISBN 0060527226.

Eksterne skakels[wysig | wysig bron]


Hierdie artikel is in sy geheel of gedeeltelik vanuit die Nederlandse Wikipedia vertaal.