Daniel Lindley
Daniel Lindley | |
|---|---|
 Eerw. Daniel Lindley | |
| Gebore | 24 Augustus 1801 Ohio |
| Sterf | 03 September 1880 (op 79) Morristown, NJ |
| Beroep | Sendeling/predikant |
| Titel | Eerwaarde/Dominee |
| Eggenoot | Lucy Virginia Allen |
| Kinders | Sarah Adams Mary Elizabeth Martha Jane Newton Adams Charlotte Hannah David Allen Lucy Virginia James Bryant Charles Lutellus Clara Louise[1] |
Daniel Lindley (Ten Mile Creek, Pennsilvanië, 24 Augustus 1801 - Morristown, New Jersey, 3 September 1880) was 'n Amerikaanse sendeling in Suid-Afrika.
Lindley is op 24 Augustus 1801[2] in Ohio [Nota 1] in die Verenigde State gebore as die seun van Jacob en Hannah Lindley. In 1824 gradueer hy aan die Ohio Universiteit in Athens, Ohio en vandaar is hy na die Union-kweekskool in Prince Edward, Virginië.[2] In 1831 kry hy toelating tot die Presbiteriaanse Kerk. Hy trou op 20 November 1834 met Lucy Virginia Allen. Na sy huwelik vertrek hy met behulp van die American Board of Missions as sendeling na Suid-Afrika. Saam met ander sendelinge begin hy onder die Matabeles werk. In 1837 vertrek hy na Natal om die evangelie aan die Zoeloes te verkondig. 'n Jaar later word dit egter vir hom ondraaglik – die Zoeloes het al die sendingstasies verwoes - en hy moet skuiling soek op 'n skip wat in die baai voor anker lê.
In 1839 doen hy bearbeiding onder die Voortrekkers in Natal. Die volgende jaar (1840) versoek lede van die Natalse Volksraad om hom as predikant aan te stel. Nadat Lindley dokumente aan 'n gekose Volksraadkommissie voorgelê het, het die Raad in 1841 beslis dat Lindley aangestel sou word. As vergoeding sou hy gratis woon en 'n salaris van £100 kry. Lindley het die aanstelling aanvaar en in die Voortrekkerkerk in Pietermaritzburg begin diens doen.
Lindley het van tyd tot tyd ook Port Natal en Weenen bearbei, terwyl hy in 1842 en 1844 ook nog 'n besoeke aan Potchefstroom en Winburg gebring het. Op 26 Mei 1844 neem hy die doop van 58 Voortrekker kinders waar in Winburg [1]. Na die anneksasie van Natal is hy deur die Engelse owerhede besoldig. Die Voortrekkers het hy met ywer bedien maar hy wou graag weer sendingwerk doen.
In 1846 het die aktuarius van die Sinode van die Kaapse Kerke aan die sekretaris van die Kaapse regering meegedeel dat Lindley weer onder die Zoeloes wou arbei en dat hy herhaaldelike versoeke van die gemeenskap in Pietermaritzburg van die hand gewys het om te bly. Van 1847 tot 1858 het Lindley se sendingwerk onder die Zoeloes verrig. Daarna het hy van 1858 tot 1862 in sy geboorteland vertoef, om daarna tot 1873 sy werk in Natal voort te sit.
Hy het in 1873 finaal teruggekeer na Noord-Amerika en het op 3 September 1880 gesterf in Morristown, New Jersey op 79-jarige leeftyd. Hy is in die Sleepy Hollow-begraafplaas in New York begrawe.
Die dorp Lindley (1875) in die Vrystaat is na hom genoem.
Notas[wysig | wysig bron]
1 ^ Volgens Diane Gravlee is Lindley in Pennsylvanië gebore.
Bronne[wysig | wysig bron]
- ↑ "Mike & Juliet Gobbs Family Tree" (in Engels). Geargiveer vanaf die oorspronklike (html) op 7 April 2005. Besoek op 12 Oktober 2011.
- ↑ 2,0 2,1 Gravlee, Diane (6 Junie 2009). "Rev Daniel Lindley" (html) (in Engels). findagrave.com. Geargiveer vanaf die oorspronklike op 18 Januarie 2019. Besoek op 11 Oktober 2011.
- (af) Aucamp, G. 1947. Suid-Afrikaanse Heldegalery: Gedenkboek van figure in ons geskiedenis wat deur hul heldedade, baanbrekerswerk en selfopoffering in dankbare herinnering behoort te bly. Kaapstad: M. Rieck.
