Essequibo

in Wikipedia, die vrye ensiklopedie
Essequibo
Die Essequibo in Guyana.
Die Essequibo in Guyana.
Die Essequibo in Guyana.

Die stroomgebied van die Essequibo.

Oorsprong Acaraiberge (Guyana)
Monding net wes van Georgetown, Guyana
Atlantiese Oseaan
Stroomgebied Guyana
Lengte 1 014 km (630 myl)
Mondinghoogte 0 m (0 vt)
Gemiddelde afloop 2 104 m³/s (74 300 vt³/s)
Stroomgebiedopp. 69 300 km² (26 800 myl²)

Die Essequibo is 'n groot noord-vloeiende rivier in Suid-Amerika. Die rivier, met 'n lengte van 1 014 km, is die langste rivier in Guyana, asook tussen die Río Orinoco in die weste en die Amasonerivier in die suide. Die Essequibo vorm deel van 'n grensdispuut, aangesien Venezuela Guyana se grondgebied wes van dié rivier opeis.

Nasa-Satellietbeeld van die Essequibo se delta net wes van Georgetown
Ponton-veerboot wat die Essequibo oorsteek

Die Essequibo ontspring in die Acaraiberge naby die grens tussen Brasilië in die suide en Guyana in die noorde, waarvandaan dit in 'n noordelike rigting deur Guyana se woude en savanne vloei. Ná 1 014 km mond die Essequibo net wes van die Guyaanse hoofstad Georgetown in die Atlantiese Oseaan uit. Langs die Essequibo se rivierloop lê baie watervalle en dit word deur baie eilande en slik gekenmerk. Saam met sy sytakke dreineer die Essequibo meer as die helfte van Guyana.

Die Essequibo is in 1498 deur Juan de Esquivel, die adjunk van Diego Columbus, seun van Christophorus Columbus, vir Europa ontdek. Die rivier is na Esquivel genoem. In 1499 het Amerigo Vespucci en Alonso de Ojeda die monding van die Orinoco verken en was glo die eerste Europeërs wat die Essequibo verken het. Langs die Essequibo was die Nederlandse kolonie Essequibo geleë, wat tussen 1616 en 1814 bestaan het. Dit het deel uitgemaak van die Nederlandse kolonies in Suid-Amerika wat as Nederlands-Guyana saamgevat is en ook die huidige Suriname ingesluit het. In 1814 het dit Brits-Guyana geword en is by die Britse Ryk ingelyf.[1]

Verwysings[wysig | wysig bron]

  1. (en) The Statesman's Yearbook 2017: The Politics, Cultures and Economies of the World (153 uitg.). Springer Publishing. p. 566. ISBN 1-349-68398-1.

Eksterne skakels[wysig | wysig bron]