Frank Sinatra

in Wikipedia, die vrye ensiklopedie
Frank Sinatra
Frank Sinatra in 1960
Agtergrondinligting
GeboortenaamFrancis Albert Sinatra
Gebore12 Desember 1915
Hoboken, New Jersey, VSA
Sterf14 Mei 1998
Los Angeles, Kalifornië, VSA
GenresTradisionele popmusiek, jazz, swing
Beroep(e)Sanger, akteur, produseerder
Jare aktief1935–1971; 1973-1995
EtiketteColumbia, Capitol, Reprise
AssosiasiesRat Pack, Bing Crosby, Nancy Sinatra, Quincy Jones
Webwerfwww.franksinatra.com

Frank Sinatra (1915-1998) was 'n Amerikaanse sanger en akteur wat as een van die invloedrykste popmusieksterre van die 20ste eeu beskou word.

Saam met die toonaangewende Harry James en Tommy Dorsey, het Sinatra sy loopbaan begin in die mid-dertigerjare, die tyd toe swingmusiek aan die orde van die dag was. In die vroeë tot mid-veertigerjare het hy ook 'n suksesvolle solokunstenaar geword, bewonder deur duisende tienermeisies, die sogenaamde "bobby soxers". Sy professionele loopbaan het egter teen die 1950's gestagneer, maar het weer vlam gevat na hy in 1954 'n Oscar-toekenning vir Beste Ondersteunende Akteur vir die rolprent From Here to Eternity gewen het.

Frank Sinatra, 1947

In samewerking met Capitol Records het hy verskeie albums vrygestel wat deur kritici geprys is, soos In the Wee Small Hours (1955), Songs for Swingin' Lovers (1956), Come Fly with Me (1958), Only the Lonely (1958) en Nice 'n' Easy (1960). Sy sukses het hom aangespoor om sy eie platemaatskappy te stig, Reprise Records. Ook in samewerking met hierdie nuwe maatskappy het hy sukses behaal, met albums soos Ring-A-Ding-Ding (1961), Sinatra at the Sands (1966) en Francis Albert Sinatra & Antonio Carlos Jobim (1967). Hy het in die tyd ook begin om konserte dwarsoor die wêreld te gee en gehelp om die akteurgroep The Rat Pack te stig. My sy vyftigste verjaardag in 1965 het hy die album September of My Years vrygestel, bedoel as 'n terugblik op sy lewe. In dieselfde jaar het hy ook in die Emmy-bekroonde televisieprogram Frank Sinatra: A Man and His Music verskyn, asook treffers behaal met sy liedjies Strangers in the Night en My Way.

Die verloop van die tyd het ook 'n verandering in die publiek se musieksmaak meegebring en, alhoewel Sinatra probeer het om hierby aan te pas, het sy albums mettertyd slegter begin vaar. Ook sy gewildheid as akteur het begin afneem en ná 'n paar mislukte albums en rolprente het hy in 1971 besluit om af te tree. In 1973 het hy egter weer die musiekwêreld toegetree en verskeie albums opgeneem - een van sy grootste treffers was die temalied van Martin Scorsese se rolprent New York, New York. Alhoewel die temalied in die 1977-rolprent oorspronklik deur Liza Minnelli gesing is, het Sinatra dit vir sy 1980-album, Trilogy: Past Present Future, opgeneem en word die lied tans veral met hom geassosieer. Tot met sy dood in 1998 het hy steeds nuwe albums vrygestel en musiekkonserte in Amerika en elders aangebied.

Buiten die Oscar-toekenning vir sy toneelspel in From Here to Eternity is hy ook genomineer vir 'n Oscar vir sy rol as hoofakteur in The Man with the Golden Arm (1955). Hy het ook in die musiekblyspele On the Town (1949), Guys and Dolls (1955), High Society (1956) en Pal Joey (1957) verskyn. In 1983 is hy die Kennedy Center Honors toegeken, 'n jaarlikse toekenning vir diegene in die uitvoerende kunste wat 'n lewenslange bydrae tot die Amerikaanse kultuur gemaak het. Ook die Presidential Medal of Freedom (1985) en die Congressional Gold Medal (1997) is aan hom toegeken, die twee hoogste toekennings wat deur die Kongres van die Verenigde State aan burgers toegeken word. Sinatra was ook die ontvanger van elk Grammy-toekennings, waaronder ook die Grammy Trustees-toekenning, die Grammy Legend-toekenning en die Grammy Lifetime Achievement-toekenning.

Diskografie[wysig | wysig bron]

  • 1946: The Voice of Frank Sinatra
  • 1947: Songs by Sinatra
  • 1948: Christmas Songs by Sinatra
  • 1949: Frankly Sentimental
  • 1950: Dedicated to You
  • 1950: Sing and Dance with Frank Sinatra
  • 1954: Songs for Young Lovers
  • 1954: Swing Easy!
  • 1955: In the Wee Small Hours
  • 1956: Songs for Swingin' Lovers!
  • 1957: Close to You
  • 1957: A Swingin' Affair!
  • 1957: Where Are You?
  • 1957: A Jolly Christmas from Frank Sinatra
  • 1958: Come Fly with Me
  • 1958: Frank Sinatra Sings for Only the Lonely
  • 1959: Come Dance with Me!
  • 1959: No One Cares
  • 1960: Nice 'n' Easy
  • 1961: Sinatra's Swingin' Session!!!
  • 1961: Ring-a-Ding-Ding!
  • 1961: Come Swing with Me!
  • 1961: Swing Along With Me
  • 1961: I Remember Tommy
  • 1962: Sinatra and Strings
  • 1962: Point of No Return
  • 1962: Sinatra and Swingin' Brass
  • 1962: All Alone
  • 1962: Sinatra Sings Great Songs from Great Britain
  • 1962: Sinatra–Basie: An Historic Musical First
  • 1963: The Concert Sinatra
  • 1963: Sinatra's Sinatra
  • 1964: Sinatra Sings Days of Wine and Roses, Moon River, and Other Academy Award Winners
  • 1964: America, I Hear You Singing
  • 1964: It Might as Well Be Swing
  • 1964: 12 Songs of Christmas
  • 1964: Softly, as I Leave You
  • 1965: September of My Years
  • 1965: My Kind of Broadway
  • 1965: A Man and His Music
  • 1966: Moonlight Sinatra
  • 1966: Strangers in the Night
  • 1966: That's Life
  • 1967: Francis Albert Sinatra & Antonio Carlos Jobim
  • 1967: The World We Knew
  • 1968: Francis A. & Edward K.
  • 1968: The Sinatra Family Wish You a Merry Christmas
  • 1968: Cycles
  • 1969: My Way
  • 1969: A Man Alone
  • 1970: Watertown
  • 1971: Sinatra & Company
  • 1973: Ol' Blue Eyes Is Back
  • 1974: Some Nice Things I've Missed
  • 1980: Trilogy: Past Present Future
  • 1981: She Shot Me Down
  • 1984: L.A. Is My Lady
  • 1993: Duets
  • 1994: Duets II