Hermitage

in Wikipedia, die vrye ensiklopedie
Spring na: navigasie, soek
Die Hermitage

Die Hermitage in Sint Petersburg is een van die grootste en omvangrykste kuns-en-kultuurhistoriese museums in die wêreld. Daar is internasionale takke in Amsterdam, Londen, Las Vegas en Ferrara in Italië. Die Hermitage hou die Guinness-wêreldrekord as die plek met die grootste versameling skilderye[1].

Geskiedenis[wysig]

Die museum het in 1764 ontstaan uit die versameling van Katharina die Grote, wat gedurende haar bewind duisende skilderye gekoop het. Daarmee het sy die versameling van tsaar Pieter die Grote aansienlik vergroot. Katharina se onderskeie opvolgers het die versameling bly uitbrei. Die museum is in 1852 onder tsaar Nikolaas I vir die publiek oopgestel. Dit bevat versamelings uit die Oudheid (onder meer Egipte), die Middeleeue en nuwer kuns van sowel die Weste as die Ooste. Argeologiese vondste en kuns uit Asië en die Russiese kultuur van die 8ste tot die 19de eeu is ook goed verteenwoordig.

Daar is meer as drie miljoen stukke in die hele versameling, wat oor meer as twee en ’n half eeue bymekaargemaak is. Die museum het die Beleg van Leningrad in 1941-1944 deurstaan, ondanks Hitler se opdrag dat die hele stad verwoes moet word. Die beste stukke van die versameling is toe tydelik in ’n gebied agter die Oeral-gebergte versteek.

Van 1929 tot 1932 het ’n kommunistiese organisasie, Antiquariat, in die geheim vyftig top-skilderye verkoop, onder meer sewe van Rembrandt soos Pallas Athene, Portret van Titus, Portret van ’n Ou Man, ’n Poolse Edelman en Meisie met ’n Besem.

Geboue[wysig]

’n Koepel in die Hermitage

Die Hermitage word gehuisves in ’n aantal argitektonies interessante geboue:

  • Die Winterpaleis (1754-'62, argitek V.V. Rastrelli)
  • Die Klein Hermitage (1764-'67, argitek J.B. Vallen-Delamot)
  • Die Ou Hermitage (1771-'87, argitek Y.M Felten)
  • Die Nuwe Hermitage (1839-'52, argitek Leopold von Klenze)
  • Die Hermitage-teater (1783-'87, argitek Dzj. Kwarengi)
  • Die Mensjikof-paleis (1710-'20, argitekte D.M. Fontana, I.G. Sjedel)
  • Die gebou van die Hoofstaf (argitek K.I. Rossi)

Versamelings[wysig]

Die Hermitage bevat verskeie afdelings met verskillende soorte kuns, soos:

Rembrandt[wysig]

Die museum het twintig skilderye van Rembrandt en dus een van die grootste versamelings van dié beroemde kunstenaar se werk. (Die Rijksmuseum in Amsterdam het negentien). Werke sluit in:

  • Die Aanbidding van die Wyse Manne (1632)
  • Danaë (1636)
  • Dawid en Jonatan (1642)
  • Heilige Familie (1645)
  • Jong Vrou met Oorbelle (1657)
  • Landskap met ’n Ruiter (1648-'50)
  • Die Offerande van Isak (1635)
  • Portret van ’n Geleerde (1631)
  • Die Terugkeer van die Verlore Seun (c. 1668)
  • Winterlandskap (c. 1650/'54)
Die Hermitage gesien van oorkant die Newa-rivier. Van links: die Hermitage-teater, Ou Hermitage, Klein Hermitage en Winterpaleis

Verwysings[wysig]

Hierdie artikel is merendeels vertaal vanaf die Nederlandse Wikipedia-artikel [1]
  1. Guinness World Records

Eksterne skakel[wysig]