KV45
| KV45 | ||
| Grafkelder van Oeserhet, Merenchons en onbekende vrou | ||
| ||
| Die plan van KV45. | ||
| Ligging | Vallei van die Konings | |
| Land |  Egipte
| |
| Ontdek | Februarie 1902 | |
| Uitgrawings deur | Howard Carter (1902) Donald P. Ryan (1991, 2005) | |
← Vorige KV44 Volgende →
KV46 | ||
KV45 is 'n grafkelder in die Vallei van die Konings by Thebe, naby die moderne stad Luxor in Egipte. Dit is in 1902 deur Howard Carter, die hoofinspekteur van oudhede, ontdek en verken namens die miljoenêr-sakeman Theodore M. Davis.[1]
Die grafkelder is aanvanklik vir die begrafnis van die adellike Oeserhet van die 18de Dinastie gebruik en is in die 22ste Dinastie herbruik deur ene Merenchons en 'n onbekende vrou.
Dit is in 1991 en 2005 weer verken deur 'n span onder leiding van Donald P. Ryan.[2]
Uitleg en inhoud[wysig | wysig bron]
Die grafkelder bestaan uit 'n vertikale skag van drie meter diep wat in 'n klein kamer eindig, waarvan 'n derde toe was onder puin. Dit bevat begrafnisoorblyfsels uit die 22ste Dinastie. Die kelder self is "heeltemal verwoes" deur reënwater nadat iemand in die verlede toegang verkry het.[1]
Die grafkelder bevat die mummies van 'n man en vrou, elk in 'n stel van twee kiste wat inmekaar pas, asook twee houers met begrafnisbeeldjies van klei. Die mummies was beskadig; net die gesig van een van die man se kiste kon gered word. Hy is geïdentifiseer van die titels van 'n skerf as Merenchons, deurwagter van die Huis van Amoen; die vrou kon nie geïdentifiseer word nie. Omdat hulle oorblyfsels bo-op die puin gelê het, was hulle duidelik nie die oorspronklike eienaars van die grafkelder nie. Dié is uitgeken aan stukke van 'n begrafnisfles van albaster as Oeserhet, opsigter van die Velde van Amoen.[1][3]
Herondersoek[wysig | wysig bron]
In 1991 is die grafkelder weer verken deur 'n span onder leiding van Donald P. Ryan.[2] Alle oorblywende dele van die twee stelle kiste is gekry, insluitende die gesig van die vrou se kis. Nog vondste was 88 fragmente van begrafnisbeeldjies[2] en die oorblyfsels van nog twee individue, wat moontlik die oorspronklike eienaars was.[4]
Die projek is in 2005 hervat en daar is bevind dat water die grafkelder binnegedring het, waarskynlik van die vloede van 1994. Alle artefakte is na KV21 verskuif om verdere skade te voorkom.[2]
Verwysings[wysig | wysig bron]
- ↑ 1,0 1,1 1,2 Carter, Howard (1903). "Report on General Work Done in the Southern Inspectorate". Annales du Service des Antiquités de l'Égypte. Le Service. IV: 43–50. Besoek op 15 April 2021.
- ↑ 2,0 2,1 2,2 2,3 Ryan, Donald P. (2007). "Pacific Lutheran University Valley of the Kings Project: Work Conducted during the 2005 Field Season". Annales du Service des Antiquités de l'Égypte. 81: 345–356.
- ↑ Porter, Bertha; Moss, Rosalind (1964). Topographical Bibliography of Ancient Egyptian Hieroglyphic Texts, Statues, Reliefs and Paintings Volume I: The Theban Necropolis, Part 2. Royal Tombs and Smaller Cemeteries. Griffith Institute. p. 563. Besoek op 16 April 2021.
- ↑ Ryan, Donald P. (1994). "Exploring the Valley of the Kings". Archaeology. 47 (1): 52–59. ISSN 0003-8113. JSTOR 41770637. Besoek op 24 Julie 2021.
Skakels[wysig | wysig bron]
Wikimedia Commons het meer media in die kategorie KV45.
Hierdie artikel is in sy geheel of gedeeltelik uit die Engelse Wikipedia vertaal.
