Kitchener, Ontario

in Wikipedia, die vrye ensiklopedie
Jump to navigation Jump to search
Kitchener
Stad
Kitchener se Oktoberfest Timeteller.
Kitchener se Oktoberfest Timeteller.
Leuse(s): 
Ex industria prosperitas
Kitchener is in Ontario
Kitchener
Kitchener
Ligging van Kitchener in Ontario, Kanada
Koördinate: 43°27′0″N 80°29′0″W / 43.45000°N 80.48333°W / 43.45000; -80.48333Koördinate: 43°27′0″N 80°29′0″W / 43.45000°N 80.48333°W / 43.45000; -80.48333
LandVlag van Kanada Kanada
ProvinsieOntario
Stigting1833
Regering
 • BurgemeesterCarl Zehr
Oppervlak
 • Land136,89 km2 (52,85 vk, m,)
 • Stedelik
313,85 km2 (121,18 vk, m,)
 • Metro
827,07 km2 (319,33 vk, m,)
Bevolking
 • Stad219 153
 • Digtheid1 602,1/km2 (4 149/vk, m,)
 • Stedelik
441 380
 • Stedelike digtheid1 346,2/km2 (3 487/vk, m,)
 • Metro
477 160
 • Metrodigtheid577/km2 (1 490/vk, m,)
TydsoneUTC-05:00 (EST)
 • SomertydUTC-04:00 (EDT)
Poskode
N2A-N2R
Skakelkodes519 en 226
Webwerfkitchener.ca

Kitchener is 'n stad in die Sentraal-Kanadese provinsie Ontario suidwes van Toronto met 219 000 inwoners. Saam met die nabygeleë universiteitstad Waterloo vorm Kitchener die tweelingstad (Engels: Twin Cities) Kitchener-Waterloo met 'n totale bevolking van 447 000. Kitchener is die setel van die Waterloo-streeksmunisipaliteit (Waterloo Regional Municipality).

Tot by die jaar 1916 het Kitchener, wat in die vroeë 19de eeu deur Mennoniete uit Pennsylvanië gestig is, as Berlin bekend gestaan en was 'n belangrike sentrum van Duitse immigrante. Tydens die Eerste Wêreldoorlog is die naam van die stad ter ere van generaal Horatio Herbert Kitchener gewysig tot Kitchener. Die stad word nog steeds deur 'n sterk Duitse invloed gekenmerk en pronk met die grootste Oktoberfest buite Duitsland en die Christkindl Market, 'n gewilde kersfeesmark.

Die Kitchener-Waterloo-gebied is nog steeds een van die sentrums van Ontario se sowat 40 000 Mennoniete. Hulle is die nasate van Duitse Mennoniete uit die Palts wat hulle in die vroeë 18de eeu in Pennsylvanië gevestig het. Omtrent 1800 het 'n groot aantal Mennoniete met hulle ossewaens (Conestoga wagons) na Ontario getrek. Die vreedsame naasbestaan tussen Mennoniete en die plaaslike Eerste Nasies is deur ruilhandel verseker: Die Indiane het hul visse en wildsvleis teen die setlaars se melk en brood geruil.

Tans is daar sowat 17 Mennoniete-groeperings in Ontario, waarvan twee derdes "gematigdes". Die res is progressiewe of Mennoniete van die "ou orde" wat nog steeds gekant is teen moderne uitvindings soos elektrisiteit, motors en telefone en ook hul tradisionele landboumetodes bewaar het.

Besienswaardighede[wysig | wysig bron]

Markte[wysig | wysig bron]

Die weeklikse German Market ("Duitse Mark"), wat op Sondae plaasvind, lok talle besoekers met sy uitsluitlik Duitse produkte wat deur plaaslike immigrante vervaardig word, soos byvoorbeeld kaas, wors, vleis en brandewyn, of uit Duitsland ingevoer word (soos koekoekhorlosies en bierglase).

Die Kitchener Farmers' Market in Frederickstraat word reeds sedert 1839 gehou; plaaslike Mennoniete het destyds hul selfvervaardigde produkte teen goedere geruil wat hulle nie self kon produseer nie, soos byvoorbeeld suiker, bakvet en papier. Vandag is daar meer as 300 stalletjies waar kaas, ham, brood, vleis, wors, heuning, esdoringstroop, groente, blomme, ingemaakte voedsel en Mennoniete-handwerk verkoop word.