Kodiakbeer

in Wikipedia, die vrye ensiklopedie
Spring na: navigasie, soek
Kodiakbeer
'n Kodiakbeer in die Kodiak Nasionale Park in Alaska.
Wetenskaplike klassifikasie
Koninkryk: Animalia
Filum: Chordata
Klas: Mammalia
Orde: Carnivora
Familie: Ursidae
Genus: Ursus
Spesie: U. arctos
Subspesie: U. a. middendorffi
Trinomiale naam
Ursus arctos middendorffi
Merriam, 1896
Verspreiding
Verspreiding

Die Kodiakbeer (Ursus arctos middendorffi) is die grootste subspesie van die bruinbeer. Sommige individue is selfs groter en swaarder as die ysbeer. Die bere kom in Alaska en op die Noord-Amerikaanse eilande Afognak, Shuyak en Kodiak voor, waarvan die beer se naam ook afgelei is.

Kodiakbere is die grootste bere en ook die grootste landroofdiere op aarde. Die mannetjies weeg gemiddeld 400 kg, terwyl die wyfies ietwat kleiner is. Die swaarste individu in ballingskap het 757 kg geweeg. Ondanks hulle grootte kan hulle snelhede van tot 50 km/h bereik en vir lang tye volhou. Mense het al gesien hoe 'n Kodiakbeer 'n perd agternasit, inhaal en doodmaak.

In die somer vreet hulle hoofsaaklik plantaardige voedsel, soos bessies en wortels. Daarbenewens jag hulle op takbokke. In die herfs vreet hulle hoofsaaklik salm. Hierdie tyd van die jaar moet hulle baie eet, sodat hulle genoeg vet kan opbou om hulle deur hul winterslaap te hou.

Bere is gewoonlik alleenlopers. Hulle kom net bymekaar om te paar, of by spruite om salm te vang. Byna al die mannetjies het letsels op hulle koppe van al die gevegte waarin hulle betrokke is.

Daar is normaalweg min kontak tussen mense en Kodiakbere. Die gebied waarin hulle leef is nog relatief ylbevolk. As gevolg hiervan is daar min aanvalle op mense, hoewel enkele aanvalle al aangeteken is, veral as daar te min voedsel in die veld is.

Eksterne skakels[wysig | wysig bron]