Lucas Maree

in Wikipedia, die vrye ensiklopedie
Spring na: navigasie, soek
Lucas Maree
Geboortenaam Lucas Lodewyk Maree
Geboorte 22 Julie 1952
Johannesburg, Suid-Afrika
Afsterwe 18 Februarie 2011
Bloemfontein, Suid-Afrika
Beroep(e) Musikant
Aktiewe jare ~1984 - 2011
Uitgewer(s) JNS-musiek, Miljoen-musiek, Select Music Distribution
Webwerf miljoen.net
Portal.svg Musiekportaal

Lucas Lodewyk Maree (22 Julie 1952 - 18 Februarie 2011) was 'n bekende Afrikaanse sanger en liedjieskrywer. Hy was veral bekend vir sy treffer Ek sou kon doen met ’n miljoen. M-Net het byvoorbeeld die liedjie vir hulle TV-reeks "Doen met 'n Miljoen" gebruik.

Biografie[wysig | wysig bron]

Maree is op 22 Julie 1952 in Johannesburg, Suid-Afrika gebore. Hy gaan skool by die Laerskool Danie Malan in Pretoria-Noord en matrikuleer later vanaf die Hoërskool Langenhoven.

Hy verwerf die volgende kwalifikasies: BA Drama aan die Universiteit van Pretoria asook Nasionale Diplomas vir Film-produksie Tegnici en Fotografie.

Hy trou in 1981 met Ilse en skryf in 1982 sy eerste Afrikaanse liedjie.

Maree is in 2009 met prostaatkanker gediagnoseer. Hy is op 18 Februarie 2011 aan nierversaking by die Hill & Dale-versorgingsoord oorlede. Hy laat sy vrou, Ilse en dogters Monica (ook 'n sanger en liedjieskrywer), Linda en Carla agter.[1]

Loopbaan[wysig | wysig bron]

Maree het vir die grootste gedeelte van sy loopbaan Engelse musiek in kroeë en restaurante in en om Pretoria en Johannesburg gespeel onder andere "After dark" en "Fonteine pub en grill" . Gedurende 1981 begin hy in Afrikaans skryf, nadat hy onder die invloed van 'n vriend by Jannie du Toit se huiskonserte 'n draai gaan maak het, en onder andere vir Coenie de Villiers daar hoor sing het.

Die drie musikante is van toe af groot vriende en het dikwels saam opgetree.

Sy eerste plaat, Kiekies, word in 1984 vrygestel. In 1986, werksaam by Nic Taylor se ateljee, maak hy 'n tweede plaat saam met Coenie, Jannie en Nic. Dit is ʼn huldigingsalbum opgedra aan Koos du Plessis. Die titel is Koos se Plaat Gedurende 1988 raak hy betrokke by Anton Goosen en dié verbintenis lei tot die stig van 'n groep met die naam Die Kommissie van Ondersoek asook 'n album getiteld Die winde van verandering.

Vyf jaar later, onder die aansporing van Jannie du Toit maak Lucas sy eerste CD, Miljoen. Gedurende 1996 maak hy 'n tweede CD Kiekieskonsert. Die album was baie gewild as gevolg van die LIVE elemente en die stories wat hy tussen die liedjies vertel. Tydens 1998 maak hy die album Mot om die Kers, wat 'n SAMA-toekenning wen vir die Beste Afrikaanse album. In 2000 maak hy die album Blouberg wat omstrede was weens die feit dat dit uit die herskryf van 'n aantal ou tradisionele Afrikaanse Volksliedjies bestaan het. 'n Paar mense en instansies sou voel dat hy 'n paar heilige koeie negatief aangetas het. Nietemin was die album baie gewild.

In 2001 tree hy weereens in die buiteland op, en wel in Londen tydens die eerste UKKASIE kunstefees by die Wembley-stadion. Hier loods hy die album Things, sy eerste Engelse CD asook die eerste Suid-Afrikaanse CD wat in Londen vrygestel word. Hy tree ook daardie jaar vir die eerste keer in Nieu-Seeland op.

Gedurende 2002 maak hy die album Lucas & Kie, sy eerste "Greatest Hits" en dit verkoop besonders goed. Vir die volgende twee jaar tree hy gereeld in Engeland, Nederland, Kanada, Nieu-Seeland en Australië op. Hy was ook een van die min Afrikaanse sangers wat die geleentheid gehad het om op die Royal Albert-saal se verhoog in Londen op te tree.

Hy speel vir die eerste keer in 'n film Ouma se slim kind in 2005. Sy liedjies verskyn later in 'n boek waarin al die akkoorde en klavier- en kitaarverwerkings opgeneem is.

In 2007 besluit die Soweto-strykkwartet op twee van sy liedjies vir hulle nuwe CD.[2]

In 2008 maak Lucas die eerste Blu-ray HD dvd in Afrikaans verfilm deur Blixem Produksies waar hy van sy jare lange kollegas soos Jannie Du Toit, Christa Steyn, Coenie de Villiers, Mathys Roets, Andre Swiegers asook sy twee dogters, Monica en Linda hom vergesel op die verhoog om van sy grootste treffers uit te voer.

In 2009 stel hy die laaste album wat hy self aan gewerk het vry naamlik " Lankverwag". Hierop verskyn 'n paar nuwe liedjies sowel as covers van van sy gunsteling Afrikaanse liedjies soos " Liedjie vir jou" " Onder in my whisky glas" "Klein karoo" saam met Ollie Viljoen en vele meer.

In 2010 na dit bekend gemaak is dat Lucas met kanker gediagnoseer is het Alexa Strachan saam met Mathys Roets en Mathys Maree in same werking met Sarie Tydskrif aan 'n ensemble projek genaamd " Een uit 'n miljoen - Vir Lucas" begin werk waar verskeie kunstenaars hulle weergawe van Lucas se bekende treffers doen. Kunstenaars soos Mathys Roets, Coenie De Villiers, Laurinda Hofmeyer, Steve Hofmeyer, Kurt Darren, Richard van der Westhuizen, Lochner de Kock, Jannie du Toit, Christa Steyn, Anton Goosen, Dozi, Danie Niehaus, Kevin Leo, Jannie Moolman, Schalk Joubert en vele meer verskyn op die album.

In 2011 is Plakboek vrygestel na Lucas se dood en 2012 is " Met liefde van Lucas" vrygestel met Lucas se liefdes ballades op.

Diskografie[wysig | wysig bron]

Enkele van Maree se albums:

  • Met liefde van Lucas - 2012
  • Plakboek - 2011
  • Een uit 'n Miljoen - Vir Lucas - Verskeie 2010
  • Lucas Maree en Vriende CD/DVD, 2009 MILJOEN MUSIEK/SELECT
  • Lankverwag, MILJOEN MUSIEK/SELECT
  • Lucas Maree: Musiek en lirieke boek, 2007 LAPA
  • Lucas & Kie, 2002 JNS MUSIEK
  • Things, 2001 JNS MUSIEK
  • Blouberg, 2001 JNS MUSIEK
  • Mot Om Die Kers, 1998 JNS MUSIEK
  • Die Kiekies Konsert: Weer ´n Keer, 1996 JNS MUSIEK
  • Miljoen, 1993 JNS MUSIEK
  • Kiekies... LP/CD, 1984 INHUIS/TRIO[3]

Ek sou kon doen met 'n miljoen[wysig | wysig bron]

Die lirieke van sy bekende treffer "Ek sou kon doen met 'n miljoen" lui as volg:

Cquote1.svg Ek sou kon doen met 'n miljoen

Ek sou kon doen met 'n miljoen
Ja, ek sou myself met net ses nulle kon versoen
Want daarmee was die wêreld vir my oral immergroen
Ek sou kon doen met 'n miljoen

Ek is moeg vir die gesukkel van my dag tot dag bestaan
die gewonder oor die geld as ons dalk iewers heen wil gaan
en die karre wat nie werk nie maak my werklik nou gedaan
en die "deepfreeze" het jou waarlik ook laasnag weer gaan staan
Ek werk my oor 'n mik om net belasting te betaal
en nou is ek hoeka op 'n splinternuwe skaal
Ja die wet van Transvaal die vreet my kapitaal op
en die rentekoerse hou my oor die algemeen maar kaal

Cquote2.svg

Verwysings[wysig | wysig bron]

  1. Lucas Maree oorlede, Nuus24, besoek op 19 Februarie 2011.
  2. Kan gehoor word op www.sowetostringquartet.co.za.
  3. Vetseun.co.za, besoek op 10 Desember 2010.

Sien ook[wysig | wysig bron]

Eksterne skakels[wysig | wysig bron]