Mississippirivier

in Wikipedia, die vrye ensiklopedie
Spring na: navigasie, soek
Mississippirivier
Die Mississippirivier naby New Orleans.
Die Mississippirivier naby New Orleans.
Mississippirivermapnew.jpg
Die stroomgebied van die Mississippirivier.
Oorsprong Itascameer
Monding Golf van Meksiko naby New Orleans.
Gebied waardeur dit vloei Verenigde State
Lengte 3 766 km (2 340 myl)
Oorsprong hoogte 450 m (1 475 voet)
Monding-hoogte 0
Gemiddelde afloop 12 743 m³/s (450 000 ft³/s)
Stroomgebiedoppervlakte 2 981 076 km²; (1 151 000 myl²)
Kaart van die Mississippirivier-bekken in Noord-Amerika.
Kaart van die Mississippirivier-bekken in Noord-Amerika.

Die Mississippirivier (Engels: Mississippi River), wat in suidelike rigting deur die sentrale gedeelte van die Verenigde State vloei, is die tweede langste rivier in dié land (ná die Missouririvier, een van sy takriviere) met 'n lengte van 3 766 kilometer van sy oorsprong in die Itascameer in Minnesota tot by sy monding in die Golf van Meksiko naby New Orleans. Die rivier maak deel uit van die Jefferson-Missouri-Mississippi-rivierstelsel, die grootste in Noord-Amerika en een van die grootstes ter wêreld - met 'n totale lengte van 6 300 kilometer (3 900 myl) is dit die vierde langste ter wêreld, en volgens sy afloop van 16 200 m³/s (572 000 ft³/s) die tiende grootste ter wêreld. Die rivier loop deur die sentrale VS-deelstate Minnesota, Illinois, Missouri, Kentucky, Arkansas, Tennessee, Mississippi, Louisiana en vorm die grens tussen Wisconsin en Iowa.

Die naam Mississippi is afgelei van die Ojibwa-woord misi-ziibi of gichi-ziibi ("Groot Rivier"). In die Voor-Kolumbiaanse tydperk was die rivier reeds 'n beduidende waterweg vir die plaaslike Eerste Nasies wat na die Mississippi as die Meschacebé of "vader van die waters" verwys het. Die Mississippirivier speel steeds 'n beduidende rol in die Amerikaanse geskiedenis, ekonomie en kultuur.

Oseaanskepe kan op hierdie belangrike waterweg tot by Baton Rouge in Louisiana en rivierskepe tot by Minneapolis-St. Paul vaar. Die belangrikste takriviere aan die regterkant is die Minnesota-, Iowa-, Des Moines-, Missouri-, Arkansasrivier en die Red River, aan die linkerkant die Saint Croix-, Chippewa-, Wisconsin- en Rockrivier.

Alhoewel die gemiddelde afloop van die Mississippirivier 12 743 m³/s beloop, kan dit varieer van 3 000 tot 65 000 m³/s. Nedersettings langs sy oewers moet met damme langs sy takriviere en oorloopbekkens langs sy benedeloop teen oorstromings beskerm word. Nogtans kom groot vloedrampe soos dié van 1993 (die swaarste ooit in die geskiedenis van die VSA) langs die Mississippi- en Missouririvier voor.