Motorvoertuig

in Wikipedia, die vrye ensiklopedie
Spring na: navigasie, soek
'n Gesinsmotor.
'n Outydse Karl Benz "Velo"-model uit 1894.

'n Motorvoertuig is 'n voertuig wat deur sy eie enjin aangedryf word en gebruik word om mense, diere en goedere te vervoer. Soms word die woorde 'motor', 'motorkar' en 'kar' gebruik as kort vir motorvoertuig. Verskillende tipe motorvoertuie sluit in motorkarre, busse, vragmotors, motorfietse en bakkies.

Motorvoertuie word gewoonlik in 'n motorhuis of onder 'n motorafdak geberg as dit nie gebruik word nie. Brandstof word by 'n vulstasie (met behulp van brandstofpompe) ingegooi. As 'n motorvoertuig breek of versien moet word, word dit na 'n motorhawe geneem waar 'n motorwerktuigkundige daaraan kan werk.

Die binnebrandenjin word hoofsaaklik vir aandrywing gebruik. Alternatiewe aandrywingsmetodes sluit in: Stoomenjins, elektriese motors en hibriede aandrywing.

Die eerste motor in Suid-Afrika[wysig | wysig bron]

"Nee dankie," het president Paul Kruger geprotesteer toe die eienaar van die eerste motor in Suid-Afrika hom vra of nie 'n entjie wil saamry nie, "netnou blaf 'n hond en dan skrik die ding en gooi my af! Hulle moet hom eers verbeter voordat ek daarin ry."

Hierdie 1ste motorjie, 'n Benz van 1,12 kW, het op 22 Desember1896 in Pretoria aangekom. Dit is deur uit Duitsland ingevoer deur J. P Hess en A. E. Reno, beide Pretorianers. Soos te verstane, was daar natuurlik 'n hewige gespottery met hierdie nuwerwetsigheid. Maar pres. Kruger het die belangrikheid van die invoer van die 1ste motor in Suid-Afrika besef en die twee here vereer met 'n goue medalje wat hy spesiaal laat munt het.

Eerste motorwetgewing[wysig | wysig bron]

In 1897 is die motor aan mnr. Albert H. (Koffie) Jacobs verkoop. Dit het aanleiding gegee tot Suid-Afrika se eerste motorwetgewing. Die Johannesburgse stadsraad het 'n ordonnansie uitgevaardig waarvolgens die motor toegang tot die pad verbied is! Hy het hom egter min gesteur daaraan en rustig voortgery. Later is die motor in 'n brand verwoes.

Daar is maar min motors ingevoer in die eerste paar jaar na die eerste een. Die paaie was nie geskik vir die eerste lendelam motortjies. Daar was ook nie petrolpompe of motorhawens in die binneland nie. Mettertyd het die bedryf egter ontwikkel tot die ekonomiese reus van vandag.

Sien ook[wysig | wysig bron]

Bronnelys[wysig | wysig bron]

Eksterne skakels[wysig | wysig bron]