Mowbray (kiesafdeling)

Kapt. Frank Joubert, LV vir Mowbray van 1933 tot 1939, toe hy administrateur van Kaapland word.

Mowbray was 'n kortstondige kiesafdeling vir die Suid-Afrikaanse Volksraad in Kaapstad van 1929 tot voor die verkiesing van 1953.

In die eerste algemene verkiesing wat hier betwis word, wen die Suid-Afrikaanse Party se Ralph William Close, van 1915 tto 1929 LV vir Rondebosch ('n kiesafdeling wat vir die 1929-verkiesing afgeskaf is, maar later weer sou verskyn), met 'n meerderheid van 912 stemme teen kandidate van die twee faksies van die Arbeidersparty: J. Lomax van die Cresswelliete en J.A. Cunningham van die Hoofbestuurgroep, wat net 69 stemme op hom verenig. Lomax het Close ook in 1924 in Rondebosch teengestaan en met 492 stemme verloor. In die tussenverkiesing in Februarie 1919 verloor hy met 360 stemme in Nuweland teen William Buchanan van die Unionisteparty en in 1920 met 691 stemme en weer in 1921 steeds as Arbeiderskandidaat in Nuweland met 1 316 stemme teen Buchanan, toe lid van die Suid-Afrikaanse Party.

In 1933 se verkiesing word die Suid-Afrikaanse Party se kap. Frank Joubert onbestrede in Mowbray verkies, maar in 1938 staan die N.P. se J.W. van Zyl hom teen en kry net 1 409 stemme vergeleke met Joubert se 3 909. Joubert bly net tot 6 September 1939 jaar LV toe hy administrateur van Kaapland word, waarna 'n tussenverkiesing die V.P. se kapt. William Daniel Hare op 10 Oktober 1939 onbestrede verkies word om hom te vervang. Hare word in 1943 se verkiesing weereens onbestrede verkies, maar in 1948 staan 'n onafhanklike, W. Costello, wat in 1938 'n kandidaat van die Arbeidersparty in Maitland was, en kry 5 418 stemme minder as die V.P. se nuwe kandidaat, Reginald Siddall Brooke. Hy dien net vyf jaar as LV, want voor die verkiesing van 1953 word Mowbray afgeskaf.

Sien ook

Bellville, Claremont, Constantia, De Kuilen, Durbanville, Groenpunt, Groote Schuur, Kaapse Vlakte, Kaapstad-Hawe, Kaapstad-Kasteel, Kaapstad-Sentraal, Kaapstad-Tuine, Liesbeek, Maitland, Nuweland, Parow, Pinelands, Rondebosch, Seepunt, Simonstad, Soutrivier, Suid-Skiereiland, Tygervallei, Vasco, Woodstock, Wynberg

Bronne

• Potgieter, D.J. (ed.) 1972. Standard Encyclopaedia of Southern Africa. Cape Town: Nasionale Opvoedkundige Uitgewery (Nasou).
• Schoeman, B.M. 1977. Parlementêre verkiesings in Suid-Afrika 1910–1976. Pretoria: Aktuele Publikasies.