Woodstock (kiesafdeling)

in Wikipedia, die vrye ensiklopedie
Spring na: navigasie, soek
Harry Lawrence, LV vir Woodstock van 1938 tot 1943.
Die laaste Smuts-kabinet (1948). Van links staan Sidney Waterson (LV vir Claremont van 1943 tot 1953 en daarna vir Constantia van 1953 tot 1970), Pieter van der Byl, Harry Gordon Lawrence (LV vir Woodstock van 1938 tot 1943 en vir Soutrivier van 1929 tot 1938 en weer van 1943 tot 1961), James Mushet (van 1920 tot 1921 LV vir Liesbeek, van 1938 tot 1943 LV vir Maitland en van 1943 tot 1953 LV vir Vasco, maar in 1915 slegs vierde in Woodstock toe hy as onafhanklike kandidaat staan), genl. Jan Smuts, A.G.F. Clarkson, dr. Henry Gluckman, adv. JGN Strauss, dr. Colin Steyn en voor Jannie Hofmeyr.
Morris Alexander was van 1910 en 1946 Volksraadlid met net 'n onderbreking van skaars drie jaar tussen 1929 en 1932 toe hy tot die daaropvolgende jaar LV vir Woodstock was.

Woodstock, aan die oostekant van Kaapstad se middestad en aan die voet van Duiwelspiek, was vanaf en die heel eerste verkiesing in September 1910 ná Uniewording van tyd tot tyd 'n kiesafdeling vir die Suid-Afrikaanse Volksraad en die Kaaplandse Provinsiale Raad.

1910-1915[wysig]

In die eerste verkiesing hier wen dr. John Hewat van die Unionisteparty naelskraps teen die Arbeidersparty se T. Maginnes met 25 stemme, naamlik Hewat 951 en Maginnes 926. Maginess word egter in Maart 1914 in 'n tussenverkiesing onbestrede verkies as Volksraadslid van die Arbeidersparty vir Liesbeek, wat aan Woodstock gegrens het. In 1915 kom Hewat in Woodstock teen vier ander kandidate te staan. Die Suid-Afrikaanse Party se Isaac Purcell kry 903 stemme, die Arbeidersparty se W. Freestone 587, die onafhanklike James Wellwood Mushet (van 1920 tot 1921 LV vir Liesbeek, van 1938 tot 1943 LV vir Maitland en van 1943 tot 1953 LV vir Vasco) 486 en 'n tweede Unionis, kapt. William Daniel Hare (van 1939 tot 1948 V.P.-LV vir Mowbray) net 75. Hewat wen vir die Unionisteparty met 'n meerderheid van 216.

1920-1924[wysig]

Isaac Purcell (1 313 stemme) klop in 1920 vir Hewat (626) met 'n meerderheid van 687 stemme. Die Suid-Afrikaanse Party se Alexander John MacCallum (van 1929 tot 1933 LV vir Kaapstad-Kasteel en van 1933 tot 1938 vir Woodstock) kom derde met 475 stemme en die onafhanklike J.S. Hutchinson vierde met 22. Purcell, nou as S.A.P.-kandidaat, behou die setel in 1921 met 'n meerderheid van 237 bo die Arbeidersparty se J. Frank. Woodstock is vir die algemene verkiesing van 1924 afgeskaf en Purcell se loopbaan as Volksraadslid kom tot 'n einde.

1929-1932[wysig]

In 1929 is Woodstock weer 'n kiesafdeling en nou wen Eli Buirski met 'n meerderheid bo kandidate van elke faksie in die Arbeidersparty. Buirski kry 1 692 stemme, die Cresswelliet W. Freestone, wat 14 jaar gelede ook in Woodstock gestaan het, kry 1 100 stemme en die Hoofbestuurslid A.G. Forsyth net 30. 'n Tussenverkiesing word op 5 Januarie 1932 gehou toe die Suid-Afrikaanse Party se Morris Alexander onbestrede verkies word. Hy was van 1910 tot 1924 LV vir Kaapstad-Kasteel, van 1924 tot 1929 vir Kaapstad-Hanoverstraat (blykbaar bloot 'n ander naam vir Kasteel) en ná Woodstock, van 1932 tot 1933, nog tot 1946 weereens vir Kaapstad-Kasteel.

1933-1953[wysig]

In die algemene verkiesing wen Alexander MacCallum met sy tweede probeerslag in Woodstock vir die S.A.P.-Koalisie met 'n meerderheid van 1 263 teen die Arbeider D. McWilliams. Harry Lawrence, minister in genl. Jan Smuts se kabinet tot die val van die V.P.-regering in 1948, wen in 1938 met 681 stemme meer as die Arbeider dr. Robert Forsyth, in 1920 en van 1921 tot 1924 LV vir Kaapstad-Tuine. In 1943 word James Hamilton Russell met 'n meerderheid van 3 575 stemme bo die Kommunistiese Party se H. Snitcher verkies. Hy behou Woodstock in 1948 teen die onafhanklike G.E. Ferry met 'n meerderheid van 2 132 stemme, maar voor die 1953-verkiesing word Woodstock finaal afgeskaf sodat Hamilton Russell van 1953 tot 1963 LV vir Wynberg was.

Sien ook[wysig]

Bellville, Claremont, Constantia, De Kuilen, Durbanville, Groenpunt, Groote Schuur, Kaapse Vlakte, Kaapstad-Hawe, Kaapstad-Kasteel, Kaapstad-Sentraal, Kaapstad-Tuine, Liesbeek, Maitland, Mowbray, Nuweland, Parow, Pinelands, Rondebosch, Seepunt, Simonstad, Soutrivier, Suid-Skiereiland, Tygervallei, Vasco, Wynberg

Bronne[wysig]

  • Potgieter, D.J. (red.) 1972. Standard Encyclopaedia of Southern Africa. Cape Town: Nasionale Opvoedkundige Uitgewery (Nasou).
  • Schoeman, B.M. 1977. Parlementêre verkiesings in Suid-Afrika 1910-1976. Pretoria: Aktuele Publikasies.