Nuweland (kiesafdeling)

Richard Stuttaford, LV vir Nuweland van 1924 tot 1933 en vir Claremont van 1933 tot 1942.

Nuweland (Engels: Newlands) was vanaf die eerste verkiesing ná Uniewording in 1910 'n kiesafdeling in Kaapstad se latere suidelike voorstede vir die Unie-Volksraad.

Charles Frederick William Struben, kandidaat van die Unionisteparty, word op 15 September 1910 tot die heel eerste LV vir Nuweland verkies toe hy die onafhanklike L.A.W. Beck met 440 stemme klop. Hy staan nie weer in 1915 nie en nou wen nog 'n Unionis, George Sheen Withinshaw, met 'n meerderheid van 1 247 stemme teen die Arbeidersparty se C.H. Hagger. Withinshaw bly net in sy amp tot 26 Desember 1918. In die tussenverkiesing op 19 Februarie 1919 wen William Porter Buchanan met 360 stemme teen die kanniedood van die Arbeidersparty, J. Lomax, wat ook in 1920 en 1921 in Nuweland sou staan, in 1924 in Rondebosch en in 1929 in Mowbray.

Buchanan klop in 1920 se verkiesing weer vir Lomax, dié keer met 691 stemme en in 1921 met 'n volle 1 316, nadat die Unioniste en S.A.P. saamgesmelt het. In 1924 kom die latere minister en bekende sakeman, Richard Stuttaford in Nuweland as S.A.P.-kandidaat te staan teen C.A. Lagesen, 'n sogenaamde Konstitusionele Demokraat, en wen met 702 stemme. Stuttaford word in 1929 onbestrede in Nuweland verkies, maar in 1933 verander die kiesafdeling se naam na Claremont, waar hy weereens onbestrede verkies word.

Sien ook

Bellville, Claremont, Constantia, De Kuilen, Durbanville, Groenpunt, Groote Schuur, Kaapse Vlakte, Kaapstad-Hawe, Kaapstad-Kasteel, Kaapstad-Sentraal, Kaapstad-Tuine, Liesbeek, Maitland, Mowbray, Parow, Pinelands, Rondebosch, Seepunt, Simonstad, Soutrivier, Suid-Skiereiland, Tygervallei, Vasco, Woodstock, Wynberg

Bronne

• Potgieter, D.J. (ed.) 1972. Standard Encyclopaedia of Southern Africa. Cape Town: Nasionale Opvoedkundige Uitgewery (Nasou).
• Schoeman, B.M. 1977. Parlementêre verkiesings in Suid-Afrika 1910-1976. Pretoria: Aktuele Publikasies.