NG gemeente Bethanie

in Wikipedia, die vrye ensiklopedie
Jump to navigation Jump to search
Ds. Marthinus Cornelis Hattingh, van 1938 tot 1943 Bethanie (Lüderitz) se eerste leraar.
Ds. Petrus Swart, van 1944 tot 1949 Bethanie se tweede leraar.
Ds. P.A.M. Brink, leraar van 1949 tot 1950, toe hy vertrek na die kort vantevore afgestigte NG gemeente Lüderitz.
Ds. G.T.T. Kikillus was leraar van 1950 of '51 nadat hy 21 jaar lank die herder van die NG gemeente Barrydale in die Klein-Karoo was.

Die NG gemeente Bethanie is 'n gemeente van die Nederduitse Gereformeerde Kerk in die suide van Namibië. Die gemeente is in 1938 gestig met drie dienspunte, Bethanie, Lüderitz en Aus. In 1949 het die gemeente Lüderitz (met Aus) van Bethanie afgestig.

Agtergrond[wysig | wysig bron]

Afrikaanssprekendes het hulle eers in die twintigerjare van die vorige eeu in die gebied rondom die dorpie Bethanie kom vestig. Bearbeiding deur leraars van die NG Kerk het maar langsaam gekom, want in die noorde en middel van die destydse Suidwes-Afrika is reeds in 1902 die NG gemeente Otjiwarongo en NG gemeente Gibeon gestig, maar in die suide eers in 1924 die NG gemeente Keetmanshoop en in 1928 die NG gemeente Warmbad, weens 'n tekort aan leraars. Keetmanshoop het aanvanklik bestaan uit die huidige Keetmanshoop, Bethanie en Lüderitz, wat oor 'n geweldige gebied van anderkant Aroab tot by Lüderitz gestrek het, amper 650 km van oos na wes, waarvan groot dele moeilik was om te bereis.

Die baanbrekers vir die kerk in die suide van die huidige Namibië was manne soos di. Manie Potgieter (1925) en S. Fouche (1931), wat die moeilike werk op hulle geneem het. Laasgenoemde het begin met die afstigting van die gemeente Bethanie (Lüderitz), wat toe in 1938 vir ds. M.C. Hattingh as leraar kry. Dit is ook die stigtingsjaar van die gemeente.[1]

Die uitgestrektheid van die gemeente was so dat dit moeilik was om te besluit waar die pastorie sou staan. Die pastoriegebou op Bethanie, die beste wat hulle kon kry, was nie doeltreffend nie, maar die leraar moes eers wag totdat 'n gerieflike kerksaal op Bethanie en op Aus opgerig is. Op albei plekke is 'n huis as pastorie gehuur en op Aus is later een gekoop. Ook is besluit om 'n saal op Lüderitz te bou, maar daarmee is uitgestel. Op 28 September 1940 wy ds. Hattingh 'n ruim, gerieflike kerksaal op Bethanie in, wat £3 500 gekos het. Op Aus is 'n saal gehuur en op Lüderitz is van die Duitse kerk gebruik gemaak. Kerkraadsvergaderings is om die beurt op Bethanie, Aus en Lüderitz gehou.

Afstigting[wysig | wysig bron]

Omdat Aus meer sentraal was, het die leraar daar gaan woon en daar is toe besluit om Bethanie as dorp en wyk van die res af te stig. Dit het gebeur in die dienstyd van ds. Petrus Swart, wat ná meer as ses jaar diens na Soutpan vertrek het. Ds. P.A.M. Brin van Gansbaai volg in 1949 en hy voltrek dadelik die skeiding tussen Bethanie en Lüderitz. Hy word na Lüderitz beroep en vertrek daarheen.

In Oktober 1950 is dr. G. Kikillus van die NG gemeente Barrydale hier bevestig. Voor die tyd het ds. Brink hom reeds beywer om op Bethanie 'n groot en ruim pastorie te laat oprig, waaraan hulle met die aankoms van dr. Kikillus nog besig was. Dit het sowat £3 600 gekos. Met die inwyding daarvan het die gemeente aan kontant £2 400 gegee om die skuld wat nog daarop rus, te demp.

Geleidelik het die platteland van Namibië is so 'n mate ontvolk dat Bethanie en sy buurgemeente Maltahöhe teen 2010 deur een leraar, ds. Gert Peens, bedien is. Bethanie het toe 151 belydende lidmate gehad en Maltahöhe 143.

Enkele leraars[wysig | wysig bron]

  • Marthinus Cornelis Hattingh, 1938–1943
  • Petrus Hermanus Jacobus Swart, 1944–1949
  • Philippus Albertus Myburgh Brink, 1949–1950
  • Gustav Theodore Tobias Kikillus, 1951–?
  • Albertus Johannes de Bruyn, 1954–1959, waarna Lüderitz tot 1961
  • Hesterius Goosen, 1960–1966
  • Johannes Jacobus Burger Combrinck, 5 November 1966 - ?

Sien ook[wysig | wysig bron]

Verwysings[wysig | wysig bron]

Bronne[wysig | wysig bron]

Eksterne skakels[wysig | wysig bron]