Sina en die paling

in Wikipedia, die vrye ensiklopedie
Jump to navigation Jump to search
Kokospalms aan die kus van die eiland Savai'i.

Sina en die paling (Samoaans: Sina ma le Tuna) is ’n verhaal in die mitologie van Samoa wat verduidelik waar die eerste kokospalms vandaan kom.[1][2]

Die mite is ook in ander dele van Polinesië bekend, insluitende Tonga en Fidji en onder die Maori van Nieu-Seeland.[3] Verskillende weergawes word in verskillende dele van die lande van Oseanië vertel.[4] Dit word ook verbind met ander godinne in die Polinesiese mitologie, soos Hina, Tinilau, Tagaloa en Nafanua.

Die mite[wysig | wysig bron]

Volgens een weergawe van die verhaal het ’n pragtige meisie met die naam Sina op die eiland Savai'i in Samoa gewoon. Sy het ’n troetelpaling gehad en toe dit grootword, het dit op haar verlief geraak. Dit het die meisie bang gemaak en sy het probeer weghardloop, maar die paling het haar gevolg. Sy het eindelik op ’n dorp gaan wegkruip.

Toe sy na die dorp se poel gaan om water te gaan haal, het sy die paling uit die water na haar sien opkyk. Kwaad het sy uitgeroep: E pupula mai, ou mata o le alelo! ("Jy staar na my, met die oë van ’n duiwel!") Mans van die dorp het gekom en die paling doodgemaak. Terwyl dit doodgegaan het, het dit Sina gevra om sy kop in die grond te begrawe. Sina het dit gedoen en ’n kokospalm het op dié plek gegroei. Wanneer die hulsel van die kokosneut verwyder word, is daar drie ronde merke wat lyk soos die gesig van ’n vis met twee oë en ’n mond. ’n Gat word in een van die merke gemaak om die klappermelk te drink – wanneer Sina dit drink, soen sy dus die paling.

Die poel Mata o le Alelo op die dorpie Matavai word verbind met die mite van Sina en die paling.[5] Dit is genoem na Sina se woorde in die verhaal. Die poel is oop vir die publiek.

Ander weergawes[wysig | wysig bron]

  • In ’n ander weergawe van die mite is Sina van die dorpie Laloata op die eiland Upolu, en haar pa se naam is Pai.[6]
  • Op die eiland Mangaia in die Cookeilande gaan die verhaal oor ’n beeldskone vrou met die naam ‘Ina-moe-Aitu wat in ’n grot naby die dorp Tamarua woon en in ’n stroom in haar grot bad.[7]

Verwysings[wysig | wysig bron]

  1. Living Heritage Geargiveer, 29 Oktober 2012 op die Wayback Machine
  2. O le Tala ia Sina ma lana Tuna (Sina and the Eel)
  3. Craig, Robert D. (2004). Handbook of Polynesian Mythology. ABC-CLIO. p. 88. ISBN 978-1-57607-894-5. 
  4. Clark, Kate McCosh (2008). Maori Tales and Legends. Read Books. p. 68. ISBN 978-1-4437-5874-1. 
  5. Mageo, Jeannette Marie (2001). Cultural Memory Reconfiguring History and Identity in the Postcolonial Pacific. University of Hawaii Press. p. 72. ISBN 978-0-8248-2386-3. 
  6. Turner, George (2007). Samoa a Hundred Years Ago and Long Before. BiblioBazaar. p. 185. ISBN 978-1-4346-2473-4. 
  7. ‘Ina and TunaGeargiveer, 15 September 2013 op die Wayback Machine

Eksterne skakels[wysig | wysig bron]