Tropiese grysbok

in Wikipedia, die vrye ensiklopedie
Spring na: navigasie, soek
Tropiese grysbok
'n Ooi in die Krugerwildtuin
Bewaringstatus
Wetenskaplike klassifikasie
Koninkryk: Animalia
Filum: Chordata
Klas: Mammalia
Orde: Artiodactyla
Familie: Bovidae
Genus: Raphicerus
Spesie: R. sharpei
Binomiale naam
Raphicerus sharpei
Thomas, 1897
'n Tropiese grysbok in die Krugerwildtuin.

Die Tropiese grysbok (Latyn: Raphicerus sharpei) is 'n klein wildsbokkie wat endemies aan Sentraal- en Suider Afrika is.

Hierdie skugter grysbok het 'n gemiddelde volwasse massa van 12 kg en 'n hoogte van ongeveer 40 cm. Die ram het horings wat normaalweg nie meer as 5 cm lank is nie, alhoewel 'n rekordlengte van 10,48 cm al aangeteken is. Die ooi is ietwat groter as die ramme.

As gevolg van hulle eenderse rooibruin pelse met wit spikkels, word tropiese grysbokke soms met Kaapse grysbokke en steenbokke verwar, alhoewel die tropiese spesie nie die vals kloutjies van die Kaapse spesie het nie.

Tropiese grysbokke word suid van die ewenaar in Sentraal- en Suider Tanzanië tot die noordooste van Suid-Afrika aangetref, waar hulle 'n verskeidenheid habitatte het, maar tog meer dikwels in rots- en heuwelagtige gebiede waargeneem kan word.

Die ooi is vir 'n gemiddeld van 180 dae dragtig, waarna sy aan een of soms twee lammetjies geboorte sal skenk. Die meeste ooie gee tydens die laat lente of vroeë somer geboorte, met die aanvang van die eerste reëns. Die lammetjies word op drie maande gespeen.

Tropiese grysbokke wei hoofsaaklik snags en word selde gesien. Hulle is geheimsinnige diere wat oordag tussen bosse en plante wegkruip. Met uitsondering van paring, is hulle hoofsaaklik enkellopende diere.

Wanneer hulle bedreig word, sal hulle tussen plante wegkruip of selfs in gate in die grond (soos dié van 'n aardvark) kruip.

Die tropiese grysbok se dieet bestaan hoofsaaklik uit blare en gras, alhoewel hulle ook soms vrugte en die wortels van plante sal vreet. Hulle benodig blykbaar nie toegang tot vars water nie, maar sal dit drink wanneer dit beskikbaar is.

Sommige wetenskaplikes beskou die tropiese grysbok as 'n subspesie van die Kaapse grysbok.

Bronnelys en verwysings[wysig]

  • Soogdiere van die Krugerwildtuin en ander Nasionale Parke (1979). Saamgestel deur Die Nasionale Parkeraad. 'n Publikasie van die Raad van Kuratore vir Nasionale Parke van die Republiek van Suid-Afrika. ISBN 0-86953-027-5.
  • Hocking, S. en C. Yahnke. 2004. "Raphicerus sharpei", Animal Diversity Web. Verkry op 18 April 2009 by [1].
  1. IUCN SSC Antelope Specialist Group (2008). Raphicerus sharpei. 2008 IUBN Rooi Lys van bedreigde spesies. Internasionale Unie vir die Bewaring van die Natuur 2008. Verkry op 29 Maart 2009.