Buiteaardse lewe: Verskil tussen weergawes

in Wikipedia, die vrye ensiklopedie
Nuwer wysiging →
Content deleted Content added
VisueelWikiteks
Nuwe artikel, nog besig
(Geen verskil)

Wysiging soos op 10:16, 24 September 2014

Die Amerikaanse regering se amptelike standpunt oor buiteaardse lewe en die drie belangrikste maniere om daarna te soek:
1. Die soektog na eksoplanete.
2. Pogings om seine waar te neem wat kan dui op intelligente buiteaardse lewe (SETI).
3. Die verkenning van die Sonnestelsel met robotte.

Buiteaardse lewe is lewe met ’n oorsprong elders as die Aarde. Daar word ook van buiteaardse wesens gepraat as verwys word na relatief komplekse individue. In ’n breë sin is dit tot nog toe hipotetiese lewensvorme wat kan wissel van bakterie-agtige organismes tot wesens wat veel meer kompleks as die mens is. Die moontlikheid dat virusse buite die Aarde kan bestaan, is ook al voorgestel.[1]

Die ontwikkeling en toets van hipoteses oor buiteaardse lewe is bekend as astrobiologie, hoewel dit ook handel oor aardgebaseerde lewe in ’n astronomiese verband. Baie wetenskaplikes glo buiteaardse lewe is moontlik, maar daar is geen direkte bewys dat dit wel bestaan nie.[2] Sedert die middel van die 20ste eeu is daar ’n voortdurende soeke na tekens van buiteaardse lewe, van radio's wat ontwerp is om seine uit die heelal te bespeur tot teleskope wat soek na moontlike bewoonbare eksoplanete. Dit speel ook ’n groot rol in werke van wetenskapsfiksie.

Agtergrond

’n Hipotese bestaan dat buiteaardse lewe soos bakterieë in die res van die Sonnestelsel en die res van die heelal voorkom. Dié hipotese is gegrond op die grootte en die konsekwente fisiese wette van die waarneembare heelal. Wetenskaplikes wat dit voorstaan, soos Carl Sagan en Stephen Hawking, glo dit is onwaarskynlik dat lewe nie buite die Aarde bestaan nie.[3][4] Die argument berus op die Koperniese beginsel, waarvolgens die Aarde nie ’n spesiale posisie in die heelal beklee nie, en die beginsel van middelmatigheid, waarvolgens daar niks spesiaals aan lewe op Aarde is nie.[5] Lewe kon tegelykertyd op baie plekke regdeur die heel ontstaan het. ’n Alternatiewe teorie is dat lewe minder algemeen voorkom, maar tussen bewoonbare planete versprei kon gewees het deur middel van panspermia of eksogenese.[6] Volgens rekenaarsimulasies kon komplekse organiese molekules wat nodig is vir lewe, gevorm gewees het in die protoplanetêre skyf of ruimtestof om die Son voor die vorming van die Aarde.[7] Volgens dié studies kon dieselfde proses voorgekom het om ander sterre waar planete gevorm het.[7]

Voorgestelde hemelliggame waar lewe sou kon ontstaan het, sluit in die planete Venus[8] en Mars, asook Jupiter se maan Europa[9] en Saturnus se mane Titan en Enceladus.[10] In Mei 2011 het wetenskaplikes van Nasa berig Enceladus "lyk al hoe meer soos die mees bewoonbare plek in die Sonnestelsel buite die Aarde vir lewe soos ons dit ken".[11]

Wetenskaplikes glo sedert die 1950's die bewoonbare sone om sterre is die mees waarskynlike plek waar lewe kan voorkom. Verskeie ontdekkings sedert 2007 in hierdie sones het gelei tot skattings dat daar miljarde aardagtige habitats is.[12][13] In 2013 was daar egter nog net ’n paar planete in dié sones ontdek.[14] Op 4 November 2013 het sterrekundiges egter aangekondig daar kan tot 40 miljard Aarde-grootte eksoplanete in die bewoonbare sones van Son-agtige sterre of rooidwerge in die Melkweg voorkom, gebaseer op data van die Kepler-ruimteteleskoop.[15][16] Van hulle kan 11 miljard om Son-agtige sterre voorkom.[17] Die naaste sodanige planeet kan volgens die wetenskaplikes minder as 12 ligjare van die Aarde af wees.[15][16]

Geen algemeen aanvaarde bewyse van buiteaardse lewe is al gevind nie; heelwat omstrede bewerings daarvan is egter al gemaak.[18] Die oortuiging dat vreemde vlieënde voorwerpe ’n buiteaardse oorsprong het,[19] asook bewerings van ontvoering deur buiteaardse wesens,[20] word deur die meeste wetenskaplikes verwerp. Die verskynsel word toegeskryf aan veral waarnemings van Aarde-gebaseerde vliegtuie of sterrekundevoorwerpe, of as poetse.[21]

In November 2011 het die Amerikaanse Withuis amptelik gereageer op twee petisies waarin die regering gevra word om amptelik te erken dat buiteaardse wesens die Aarde al besoek het en om enige doelbewuste geheimhouding van interaksies tussen die regering en buiteaardse wesens te onthul. Volgens die regering se verslag "het die Amerikaanse regering geen bewyse dat lewe buite ons planeet bestaan of dat ’n buiteaardse teenwoordigheid al enige kontak gemaak het met enige lid van die menslike geslag nie".[22][23] Daarvolgens is daar ook "geen geloofbare inligting wat daarop dui dat enige bewyse van die publiek weerhou word nie".[22][23] Volgens die verslag is daar pogings, soos SETI, die Kepler-ruimteprogram en Nasa se Mars-wetenskaplaboratorium, om tekens van lewe te soek. Die kans is "redelik groot" dat daar lewe op ander planete kan wees, maar die kans om met hulle kontak te maak – veral met intelligente wesens – is bitter klein as ’n mens die afstande in ag neem wat ter sprake is.[22][23]

Verwysings

  1. ↑ Griffin, Dale Warren (14 Augustus 2013). "The Quest for Extraterrestrial Life: What About the Viruses?". Astrobiology. 13 (8): 774–783. Bibcode:2013AsBio..13..774G. doi:10.1089/ast.2012.0959. Besoek op 6 September 2013.
  2. ↑ Davies, Paul (18 November 2013). "Are We Alone in the Universe?". New York Times. Besoek op 20 November 2013.
  3. ↑ Other Worlds, Other Universes. Health Research Books. 1986. p. 3. ISBN 0-7873-1291-6. {{cite book}}: Onbekende parameter |editors= geïgnoreer (hulp)
  4. ↑ Filkin, David; Hawking, Stephen W. (1998). Stephen Hawking's universe: the cosmos explained. Art of Mentoring Series. Basic Books. p. 194. ISBN 0-465-08198-3.
  5. ↑ Rauchfuss, Horst (2008). Chemical Evolution and the Origin of Life. T. N. Mitchell. Springer. ISBN 3-540-78822-0.
  6. ↑ Gonzalez, Guillermo; Richards, Jay Wesley (2004). The privileged planet: how our place in the cosmos is designed for discovery. Regnery Publishing. pp. 343–345. ISBN 0-89526-065-4.
  7. ↑ 7,0 7,1 Moskowitz, Clara (29 Maart 2012). "Life's Building Blocks May Have Formed in Dust Around Young Sun". Space.com. Besoek op 30 Maart 2012.
  8. ↑ Redfern, Martin (25 Mei 2004). "Venus clouds 'might harbour life'". BBC News. Besoek op 5 Desember 2007.
  9. ↑ Friedman, Louis (14 Desember 2005). "Projects: Europa Mission Campaign". The Planetary Society. Besoek op 8 Augustus 2011. {{cite journal}}: Cite journal requires |journal= (hulp)
  10. ↑ Coustenis, A.; et al. (Maart 2009). "TandEM: Titan and Enceladus mission". Experimental Astronomy. 23 (3): 893–946. Bibcode:2009ExA....23..893C. doi:10.1007/s10686-008-9103-z.
  11. ↑ Lovett, Richard A. (31 Mei 2011). "Enceladus named sweetest spot for alien life". Nature. Nature. doi:10.1038/news.2011.337. Besoek op 3 Junie 2011.
  12. ↑ Wethington, Nicholos (16 September 2008). "How Many Stars are in the Milky Way?". UniverseToday. UniverseToday. Besoek op 21 April 2013.
  13. ↑ Choi, Charles Q. (21 Maart 2011). "New Estimate for Alien Earths: 2 Billion in Our Galaxy Alone". Space.com. Besoek op 24 April 2011.
  14. ↑ Torres, Abel Mendez (26 April 2013). "Ten potentially habitable exoplanets now". Habitable Exoplanets Catalog. University of Puerto Rico. Besoek op 29 April 2013.
  15. ↑ 15,0 15,1 Overbye, Dennis (4 November 2013). "Far-Off Planets Like the Earth Dot the Galaxy". New York Times. Besoek op 5 November 2013.
  16. ↑ 16,0 16,1 Petigura, Eric A.; Howard, Andrew W.; Marcy, Geoffrey W. (31 Oktober 2013). "Prevalence of Earth-size planets orbiting Sun-like stars". Proceedings of the National Academy of Sciences of the United States of America. arXiv:1311.6806. Bibcode:2013PNAS..11019273P. doi:10.1073/pnas.1319909110. Besoek op 5 November 2013.
  17. ↑ Khan, Amina (4 November 2013). "Milky Way may host billions of Earth-size planets". Los Angeles Times. Besoek op 5 November 2013.
  18. ↑ "Top 10: Controversial pieces of evidence for extraterrestrial life". New Scientist. 4 September 2006. Besoek op 18 Februarie 2011. {{cite news}}: |first= missing |last= (hulp)
  19. ↑ Cross, Anne (2004). "The Flexibility of Scientific Rhetoric: A Case Study of UFO Researchers". Qualitiative Sociology. 27 (1): 3–34. doi:10.1023/B:QUAS.0000015542.28438.41.
  20. ↑ Clancy, Susan A. (2005). Abducted: how people come to believe they were kidnapped by aliens. Harvard University Press. pp. 4–6. ISBN 067402401X.
  21. ↑ Ailleris, Philippe (Januarie–Februarie 2011). "The lure of local SETI: Fifty years of field experiments". Acta Astronautica. 68 (1–2): 2–15. Bibcode:2011AcAau..68....2A. doi:10.1016/j.actaastro.2009.12.011.
  22. ↑ 22,0 22,1 22,2 Larson, Phil (5 November 2011). "Searching for ET, But No Evidence Yet". White House. Besoek op 6 November 2011.
  23. ↑ 23,0 23,1 23,2 Atkinson, Nancy (5 November 2011). "No Alien Visits or UFO Coverups, White House Says". UniverseToday. Besoek op 6 November 2011.

Eksterne skakels

Ontsluit van "https://af.wikipedia.org/w/index.php?title=Buiteaardse_lewe&oldid=1292560"