Dmitri Medwedef
vanuit Wikipedia, die vrye ensiklopedie.
 Dmitri Medwedef, president van Rusland |
|
| Volle naam | Dmitri Anatoljewitsj Medwedef |
|---|---|
| Amp | President van Rusland |
| Termyn | 7 Mei 2008 – huidig |
| Voorganger | Wladimir Poetin |
| Gebore | 14 September 1965 Sint Petersburg |
| Eggenote | Swetlana Wladimirowna Medwedewa (geb. Linnik) |
| Kinders | Ilja (1996) |
| {{{Voetnotas}}} | |
Dmitri Anatoljewitsj Medwedef (Russies: Дмитрий Анатольевич Медведев (hulp·inligting); geb. 14 September 1965) is die president van Rusland. Hy is op 7 Mei 2008 in sy amp beëdig nadat hy die verkiesing van 2 Maart 2008 met sowat 70% van die stemme gewen het.
Medwedef is op 14 September 1965 gebore in Leningrad, tans Sint Petersburg. Hy was voorheen eerste adjunkpremier saam met Sergei Iwanof. Hy is getroud en het ’n seun, Ilja.
Inhoud |
[wysig] Loopbaan
Medwedef behaal sy regsgraad in 1987 aan die Staatsuniversiteit van Sint Petersburg en in 1990 sy doktorsgraad in privaatreg. Van Junie 1991 tot Junie 1996 is hy ’n regsadviseur van die burgemeester van Sint Petersburg. Tegelykertyd is hy van 1991 tot 1999 dosent aan sy alma mater. In 1999 stel Wladimir Poetin hom aan as adjunkdirekteur van die presidentstaf. In 2000 word hy benoem tot president van die bestuursraad van Gazprom. Van 2000 tot 2001 is hy voorsitter van Gazprom. In Oktober 2003 vervang hy Aleksandr Wolosjin as presidensiële stafhoof.
Op 15 November 2005 stel Poetin hom aan as eerste adjunkpremier.
[wysig] Politiek
Dimitri Medwedef word beskou as ’n gematigde liberale pragmatikus, ’n goeie administrateur en hy was nog altyd lojaal aan Poetin.
[wysig] 2008-presidentsverkiesing
Ná sy aanstelling as eerste adjunkpremier het talle politieke waarnemers voorspel dat hy benoem sal word as Poetin se opvolger vir die 2008-presidentsverkiesing. Poetin het hom dan ook op 10 Desember 2007 aangewys as die kandidaat wat hy steun. Op 17 Desember van daardie jaar is hy op die pro-Kremlin-party Verenigde Rusland se kongres amptelik benoem as hul kandidaat vir die verkiesing. Op 3 Maart 2008, terwyl die stemme getel is, het dit gou duidelik geword dat hy die verkiesing loshande gewen het. Sy naaste teenstander was die leier van die Kommunistiese Party, Gennadi Zioeganof, met 17,77% van die stemme, gevolg deur die Liberaal-Demokratiese Party se Wladimir Zjirinofski met 9,37% en die Demokratiese Party se Andrei Bogdanof met 1,29%. Die kiespersentasie was 69,5%.
Volgens meningspeilings vooraf het baie kiesers Medwedef gesteun omdat hy Poetin se keuse as opvolger was. In sy eerste toespraak ná sy benoeming het Medwedef gesê as hy president word, sal hy Poetin as eerste premier aanstel. Al kon Poetin nie vir ’n derde termyn verkies word as president nie, kan ’n premierskap hom in staat stel om nog lank die toon aan te gee in die Russiese politiek. (Hy kan dan ook later weer as president verkies word.) Sommige kenners meen Medwedef het daarmee erken dat hy slegs ’n skynhoof sal wees en dat die ware mag in Poetin se hande sal lê.
Terwyl die stemme getel is, het Poetin en Medwedef saam van die Kremlin na Rooiplein gestap, waar Medwedef aan ’n opgewonde skare gesê het: "Saam kan ons voortgaan op die pad wat pres. Poetin begin het. Saam sal ons wen. Hoera!"
Hy het ook gesê hy sal sy eie kop volg, ook in buitelandse beleid, ondanks sy voorneme om Poetin as eerste premier aan te stel. Die mag lê by die president en so sal dit bly, het hy bygevoeg.
[wysig] Persoonlike lewe
Dmitri Medwedef en sy vrou, Swetlana Wladimirowna Medwedewa, gebore Linnik, is van keins af vriende en sy was ook sy skoolliefde. Hulle is getroud ’n paar jaar nadat hulle hul hoërskoolloopbaan in 1982 voltooi het. Hul seun, Ilja, is in 1996 gebore. Medwedef is die skrywer en medeskrywer van verskeie regsboeke.
[wysig] Bykomende bronne
- Levy, Clifford J. (Dec. 11, 2007) Putin Backs a Young Loyalist As Hic Choice to Follow Him. The New York Times. New York, New York
- White, Gregory L.; Osborn, Andrew; Cullison, Alan (Dec. 11, 2007) Putin Chooses Young Loyalist As Successor. The Wall Street Journal, New York, New York.
- Umland, Andreas (Dec. 17, 2007) The Two Towers of Future Russia: The Rise of Dmiry Medvedev and the Re-Configuration of Post-Soviet Politics. Russia Profile. Moscow. [1]
[wysig] Eksterne skakels
- Gazprom's Profile of Dmitry Medvedev
- Heir to Russia Inc mixes ruthlessness with diplomacy by Quentin Peel Financial Times December 11, 2007
- Peter Lavelle, "UT’s “Operation Successor 2008” Project: Is Dmitry Medvedev the one?", Untimely Thoughts, October 9, 2005.
- J. Bernstein, Dmitrii Medvedev: Compromise In The Kremlin
- A cautious welcome in Europe for Medvedev, by Stephen Castle, IHT, December 11, 2007
| Leiers van die Sowjetunie en Rusland | |||||
|
|||||
