Wladimir Poetin
vanuit Wikipedia, die vrye ensiklopedie.
 Wladimir Poetin |
|
| Volle naam | Wladimir Wladimirowitsj Poetin |
|---|---|
| Huidige amp | 10de premier van Rusland |
| Termyn | 8 Mei – huidig |
| Voorganger | Wiktor Zoebkof |
| Vorige amp | 2de president van Rusland |
| Termyn | 2000 – 2008 |
| Voorganger | Boris Jeltsin |
| Opvolger | Dmitri Medwedef |
| Vorige amp | 6de premier van Rusland |
| Termyn | 1999 – 2000 |
| Voorganger | Sergei Stepasjin |
| Opvolger | Michail Kasjanof |
| Gebore | 7 Oktober 1952 Sint Petersburg |
| Eggenote | Ljoedmila Aleksandrowna Poetina (geb. Sjkrebnewa) |
| Kinders | Jekaterina (Katja) (1985) Maria (1986) |
Wladimir Wladimirowitsj Poetin (Russies: Владимир Владимирович Путин; gebore 7 Oktober 1952) is ’n Russiese politikus. Hy was van 2000 tot 2008 die tweede president van Rusland en is sedert 8 Mei 2008 die premier.
Hy het op 31 Desember 1999 waarnemende president geword nadat Boris Jeltsin die amp neergelê het. In 2000 het hy die presidentsverkiesing gewen en in 2004 is hy vir ’n tweede termyn herkies tot 7 Mei 2008. Hy kon volgens die Russiese grondwet nie vir ’n derde agtereenvolgende termyn herkies word nie. Poetin is voorsitter van Verenigde Rusland, ’n party wat 70% van die setels het in die Staatsdoema (laer huis).
As president is Poetin deur sy politieke teenstanders as ’n diktator beskou weens sy onderdrukking van persvryheid en sy hardhandige optrede teen betogers en teenstanders van die regeringsbeleid. By Jan en alleman was hy egter baie gewild omdat hy stabiliteit en welvaart gebring het. Dit is onder meer weerspieël deur die feit dat sy gewildheid sedert einde 1999 tot aan die einde van sy ampstermyn nooit onder 50% gedaal het nie en in Junie 2007 selfs tot 81% gestyg het, volgens ’n meningspeiling deur die Lewada-sentrum in Rusland. Hy was ook die tydskrif Time se Persoon van die Jaar vir 2007.
[wysig] Biografie
Poetin is in Leningrad (nou Sint Petersburg) gebore. In 1975 gradueer hy aan die internasionale tak van die regsfakulteit van die Staatsuniversiteit van Leningrad. Hy werk van 1975 tot 1991 vir die KGB, onder meer in Dresden in die voormalige Oos-Duitland, en daarna ook vir die FSB, opvolger van die KGB.
Van Augustus 1999 tot 31 Desember 1999 is hy eerste minister van die regering van Boris Jeltsin. As eerste minister wen hy die respek van die Russiese bevolking met sy hantering van die oorlog in Tsjetsjnië. Toe Jeltsin op 31 Desember 1999 aftree, word hy waarnemende president van Rusland.
Op 26 Maart 2000 wen hy die presidentsverkiesing en op 16 Maart 2004 word hy vir ’n tweede termyn herkies. Op 10 Desember 2007 wys Poetin vir Dmitri Medwedef aan as die kandidaat wat hy steun vir die 2008-presidentsverkiesing. Medwedef, wat toe ook op 17 Desember 2007 op Verenigde Rusland se kongres amptelik benoem is as hul kandidaat vir die verkiesing, het dit op 2 Maart loshande gewen met 70,22% en is op 7 Mei 2008 as nuwe president beëdig. Medwedef het Poetin daarna aangewys as nuwe premier van Rusland.
[wysig] Persoonlik
Sy ma, Maria Iwanowna Poetina, was ’n fabriekswerker en sy pa, Wladimir Spiridonowitsj Poetin, was in die Sowjet-vloot. Hy het twee ouer broers gehad, maar die een is ’n paar maande ná sy geboorte oorlede en die tweede een aan witseerkeel tydens die Beleg van Leningrad. Sy oupa aan vaderskant, Spiridon Poetin, was Wladimir Lenin en Josef Stalin se persoonlike kok.
Poetin is ’n geesdriftige judoka. Hy het tans ’n swart belt (6de dan).
Hy speel ook tennis en ski graag.
Poetin is getroud met Ljoedmila Aleksandrowna Poetina (gebore Sjkrebnewa), ’n lugwaardin en Duits-onderwyseres. Hulle het twee dogters, Jekaterina (Katja) (1985) en Maria (1986). Hy behoort tot die Russies-Ortodokse Kerk.
[wysig] Eksterne skakels
- Amptelike webtuiste van die president van Rusland, in Engels
- The Accidental Autocrat, in The Atlantic Monthly, Maart 2005 (kan subskripsie vereis)
- RussianSpy: Vladimir Putin
- Putin and his judo activities
- An apparatchik president? Why Russia expects Putin to stay on at Medvedev’s side deur Neil Buckley en Catherine Belton, Financial Times, 11 Desember 2007
- VCIOM in English
| Leiers van die Sowjetunie en Rusland | |||||
|
|||||
