Kaasburger

in Wikipedia, die vrye ensiklopedie
Spring na: navigasie, soek
'n Sappige kaasburger.
'n Reusagtige kaasburger met aartappelskyfies.

'n Kaasburger is ’n hamburger met kaas bo-op die vleisflappie. Die benaming is ’n kofferwoord, asook ’n samestelling vanuit die woorde “kaas” en “hamburger”. Die kaas word gewoonlik gesny, waarna dit net voor die hamburger heeltemal gaar is, bygevoeg word, sodat dit kan smelt. Kaasburgers word dikwels met vulsels soos blaarslaai, tamatie, uie, agurkies, mosterd, mayonnaise of tamatiesous bedien. By kitskoseetplekke is die kaas wat kenmerkend gebruik word, verwerkte kaas, hoewel afwisseling kan voorkom, soos Cheddar, Mozzarella, Pepper Jack sowel as Switserse en blou kaassoorte. Die kaas binne-in die kaasburger kan aansienlik van voedingswaarde verskil: 'n Enkele snytjie Cheddar kan 95 kalorieë en 5 gram versadigde vette by 'n burger voeg. [1] Ander soorte en hoeveelhede kaas sal verskille tot gevolg hê, afhangend van hul onderskeie voedingswaardes.

Geskiedenis[wysig]

Tydens die mid-1920’s en mid-1930’s het die kaasburger amptelik die lig gesien; gepaardgaande hiermee is daar etlike aansprake wat gemaak word oor wie nou eintlik die eerste kaasburger gemaak het. Daar word gereken dat Lionel Sternberger die kaasburger uitgevind het toe hy by sy pa se toebroodjiewinkel in Pasadena, Kalifornië, as braaikok gewerk en “proefondervindelik ’n reep Amerikaanse kaas op ’n sputterende hamburger gevoeg het”. [2][3][4] ’n Ander eetplek, Kaelin’s Restaurant, in Louisville, Kentucky, voer aan dat hulle die kaasburger (as húl breinkind) in 1934 aan die publiek verkoop het. [5] In 1935 is die handelsnaam (“cheeseburger”) aan ’n ander eienaar, Louis Ballast van die Humpty Dumpty Drive-In, in Denver, Colorado, toegeken. [6]

Bedieningswisselvorme[wysig]

Die bestanddele wat op die kaasburgers gebruik word, wissel op dieselfde wyse as wat die verskeidenheid soorte hamburgers van plek tot plek verskil.

Gewilde vulsels sluit spek, avokado of guacamole, gekerfde pangebraaide sampioene, kaassous en/of rissiesous in. Heinz 57-sous is veral onder burgerliefhebbers gewild. Aan die meer skamele kant word gebakte eier, roereier, salsa, pynappel, jalapeno’s, verskeidenheid rissies, ansjovis, stukkies ham of bologna, peperwortel, suurkool, gerookte of teriyaki-gekruide beesvleis, Tartaarse sous, uieringe of aartappelskyfies gebruik.

’n Kaasburger kan meer as een hamburgervleisflappie hê. ’n Twee-stapel word ’n dubbelkaasburger genoem; ’n trippel/driedubbele kaasburger beskik oor drie vleisflappies en ’n ‘‘quadruple’’/viervoudige kaasburger beskik oor vier. [7][8]

Verwysings[wysig]

  1. Nutrition Information for: Cheeseburger”. FitDay.com. FitDay. URL besoek op 2010-02-11.
  2. "Lionel Clark Sternberg obituary", Time, 1964-02-07. URL besoek op 2007-05-18.
  3. Harvey, Steve, "Only in L.A.", L.A. Times, 1991-03-27, p. B2.
  4. Perry, Charles, "It's an L.A. Thing; Our burgers are the best with good reason: We made them here first", L.A. Times, 2004-06-09, p. F1.
  5. Louisville Facts & Firsts - LouisvilleKy.gov”. City of Louisville, Kentucky. URL besoek op 2006-07-29.
  6. History of the Cheeseburger. Besoek op 2 Oktober 2008.
  7. "In-N-Out Burgers: With an emphasis on quality, this fast feeder shows its rare appeal. (Regional Powerhouse Chains)", "Nation's Restaurant News", 2002-1-28. URL besoek op 2010-02-13.
  8. Hall, David (2006-10-24). “Society's fast food intake reeks”. Daily Skiff. DailySkiff.com. URL besoek op 2010-02-13.
Hierdie artikel is in sy geheel of gedeeltelik vanuit die Engelse Wikipedia vertaal.