Lucas Maree
| Lucas Maree | ||
|---|---|---|
| Geboortenaam | Lucas Lodewyk Maree | |
| Geboorte | 22 Julie 1952 Johannesburg, Suid-Afrika |
|
| Afsterwe | 18 Februarie 2011 Bloemfontein, Suid-Afrika |
|
| Beroep(e) | Musikant | |
| Aktiewe jare | ~1984 - 2011 | |
| Uitgewer(s) | JNS-musiek, Miljoen-musiek | |
| Webwerf | miljoen.net | |
 Musiekportaal |
||
Lucas Lodewyk Maree (22 Julie 1952 - 18 Februarie 2011) was 'n bekende Afrikaanse sanger en liedjieskrywer. Hy was veral bekend vir sy treffer Ek kan doen met ’n miljoen. M-Net het byvoorbeeld die liedjie vir hulle TV-reeks "Doen met 'n Miljoen" gebruik.
Inhoud |
Biografie [wysig]
Maree is op 22 Julie 1952 in Johannesburg, Suid-Afrika gebore. Hy gaan skool by die Laerskool Danie Malan in Pretoria-Noord en matrikuleer later vanaf die Hoërskool Langenhoven.
Hy verwerf die volgende kwalifikasies: BA Drama aan die Universiteit van Pretoria asook Nasionale Diplomas vir Film-produksie Tegnici en Fotografie.
Hy trou in 1981 met Ilse en skryf in 1982 sy eerste Afrikaanse liedjie.
Maree is in 2009 met prostaatkanker gediagnoseer. Hy is op 18 Februarie 2011 aan nierversaking by die Hill & Dale-versorgingsoord oorlede. Hy laat sy vrou, Ilse en dogters Monica, Linda en Carla agter.[1]
Loopbaan [wysig]
Maree speel vir die grootste gedeelte van sy loopbaan Engelse musiek in kroeë en restaurante. Gedurende 1981 begin hy Afrikaans skryf, nadat hy onder die invloed van 'n vriend by Jannie du Toit se huiskonserte 'n draai gaan maak het, en onder andere vir Coenie de Villiers daar hoor sing het.
Die drie musikante is van toe af groot vriende en tree dikwels saam op.
Sy eerste plaat, Kiekies, word in 1984 vrygestel. In 1986, werksaam by Nic Taylor se ateljee, maak hy 'n tweede plaat saam met Coenie, Jannie en Nic. Dit is ʼn huldigingsalbum opgedra aan Koos du Plessis. Die titel is Koos se Plaat Gedurende 1988 raak hy betrokke by Anton Goosen en dié verbintenis lei tot die stig van ‘n groep met die naam Die Kommissie van Ondersoek asook ‘n album getiteld Die winde van verandering.
Vyf jaar later, onder die aansporing van Jannie du Toit maak Lucas sy eerste CD, Miljoen. Gedurende 1996 maak hy 'n tweede CD Kiekieskonsert. Die album is baie gewild as gevolg van die LIVE elemente en die stories wat hy tussen die liedjies vertel. Tydens 1998 maak hy die album Mot om die Kers, wat ‘n SAMA-toekenning wen vir die Beste Afrikaanse album. In 2000 maak hy die album Blouberg wat omstrede was weens die feit dat dit uit die herskryf van ‘n aantal ou tradisionele Afrikaanse Volksliedjies bestaan het. 'n Paar mense en instansies sou voel dat hy 'n paar heilige koeie negatief aangetas het. Nietemin is die album baie gewild.
In 2001 tree hy weereens in die buiteland op, en wel in Londen tydens die eerste UKKASIE kunstefees by die Wembley-stadion. Hier loods hy die album Things, sy eerste Engelse CD asook die eerste Suid-Afrikaanse CD wat in Londen vrygestel word. Hy tree ook hierdie jaar vir die eerste keer in Nieu-Seeland op.
Gedurende 2002 maak hy die album Lucas & Kie, sy eerste "Greatest Hits". Dit verkoop besonders goed. Vir die volgende twee jaar tree hy gereeld in Engeland, Nederland, Kanada, Nieu-Seeland en Australië op. Hy is ook een van die min Afrikaanse sangers wat die geleentheid gehad het om op die Royal Albert-saal se verhoog in Londen op te tree.
2005 was ook 'n ongekende besige jaar, waarin hy ook nuwe dinge aanpak. Hy speel vir die eerste keer in 'n film Ouma se slim kind. Sy liedjies verskyn nou in 'n boek waarin al die akkoorde en klavier- en kitaarverwerkings opgeneem is.
In 2007 besluit die Soweto-strykkwartet op twee van sy liedjies vir hulle nuwe CD.[2]
Diskografie [wysig]
Enkele van Maree se albums:
- Een Uit ´n Miljoen, 2010
- Lucas Maree en Vriende CD/DVD, 2009 MILJOEN MUSIEK/SELECT
- Lankverwag, MILJOEN MUSIEK/SELECT
- Lucas Maree: Musiek en lirieke, 2007 LAPA
- Lucas & Kie, 2002 JNS MUSIEK
- Things, 2001 JNS MUSIEK
- Blouberg, 2001 JNS MUSIEK
- Mot Om Die Kers, 1998 JNS MUSIEK
- Die Kiekies Konsert: Weer ´n Keer, 1996 JNS MUSIEK
- Miljoen, 1993 JNS MUSIEK
- Kiekies... LP/CD, 1984 INHUIS/TRIO[3]
Doen met 'n Miljoen [wysig]
Die lirieke van sy bekende treffer Doen met 'n Miljoen lui as volg:
 |
Ek kan doen met ‘n miljoen Ek sou kon doen met ‘n miljoen Ek is moeg vir die gesukkel van my dag tot dag bestaan |
 |
Verwysings [wysig]
- ↑ Lucas Maree oorlede, Nuus24, besoek op 19 Februarie 2011.
- ↑ Kan gehoor word op www.sowetostringquartet.co.za.
- ↑ Vetseun.co.za, besoek op 10 Desember 2010.
