Vlag van Kuba

in Wikipedia, die vrye ensiklopedie
Spring na: navigasie, soek
Vlag van Kuba
Vlag van  Kuba
Bynaam (es) La Estrella Solitaria
(af) Die Eensame Ster
Gebruik Nasionale vlag en vaandel Nasionale vlag en vaandel
Verhouding 1:2
Goedgekeur 20 Mei 1902
Ontwerp ’n Rooi droehoek met ’n wit ster aan die vlagpaalkant met vyf afwisselende horisontale bane in blou en wit op die wapperkant.
Ontwerp deur Narciso López
Wisselvormvlag van  Kuba
Gebruik Ander Ander
Verhouding 2:3
Ontwerp Twee horisontale bane waarvan die onderste blou is en die boonste in twee gedeel is met die skildhoek rooi met ’n wit ster en wit op die wapperkant.

Die nasionale vlag van Kuba is op 20 Mei 1902 amptelik in gebruik geneem. Die vlag vertoon ’n rooi gelykbenige driehoek aan die vlagpaalkant met ’n vyfpuntige wit ster in die middel van die driehoek en vyf horisontale bane in blou en wit afwisselend op die wapperkant.

Simboliek[wysig]

Die drie blou bane verwys na die drie historiese provinsies van Kuba: Sentraal, Westelik (Occidental) en Oostelik (Oriental). Die blou verwys ook na die seë om Kuba terwyl die wit Kuba se onafhanklikheid simboliseer.[1] Die driehoek aan die vlagpaalkant is ’n vrymesselaarsimbool vir vryheid, gelykheid en broederskap en die rooi kleur van die driehoek verwys na die bloed wat gevloei het vir die Kubaanse onafhanklikheid.[2] Die wit ster is die simbool vir die eenheid van die volk.

Die vlag van Kuba is geïnspireer deur die vlag van die Verenigde State (die Stars and Stripes). Volgens sommige bronne was dit die bedoeling dat die La Estrella Solitaria toegevoeg sou word by die Amerikaanse vlag vanweë die verlange in die 19e eeu dat Kuba by die VSA ingelyf moet word.[1] Dit is egter nie seker of hierdie beweging ooit baie steun in Kuba geniet het nie.

Ontwerp[wysig]

Die Kubaanse vlag het ’n wydte-breedteverhouding van 1:2. Die vyf horisontale bane is ewe wyd en neem elk dus een vyfde van die wydte van die vlag in beslag. Die drie sye van die driehoek is gelyk aan mekaar en dus gelyk aan die wydte van die vlag. Die regterpunt van die driehoek is reg in die middel van die middelste blou baan en op 14/31 van die vlagpaalkant af. Die middelpunt van die wit ster is presies in die middel van die driehoek. Die afstand van die middel van die ster na elk van die vyf punte is gelyk aan 3/20 van die wydte van die vlag.

Konstruksietekening

Ander vlae[wysig]

Onafhanklikheidstryd[wysig]

Vlag van Yara

Die oorsprong van die Kubaanse vlag lê in 1848 toe die verskillende bewegings wat Kuba van die Spanjaarde wou bevry opgeskiet het, veral onder bannelinge in die Verenigde State. Anti-Spaanse Kubaanse bannelinge onder leiding van die Venezolaan Narciso López[2] het op aanbeveling van die digter Miguel Teurbe Tolón ’n vlag aanvaar met drie blou bane as verwysing na die seë om Kuba, twee wit bane as simbool van die suiwerheid van die patriotiese saak en ’n rooi driehoek as verwysing na die bloed wat gevloei het vir onafhanklikheid met ’n wit ster as simbool van onafhanklikheid. López het hierdie vlag gebruik tydens die Slag van Cárdenas in 1850 en weer ’n jaar later tydens die Slag van Playitas. Hoewel López albei veldslae verloor het, was hierdie twee die eerste geleenthede waarby die huidige Kubaanse vlag gebruik is.

In die onafhanklikheidstryd is ’n ander vlag ook gebruik: die vlag van Yara (of vlag van La Demajagua) wat gebruik is deur opstandelinge onder Carlos Miguel de Cespedes.[2] Hierdie vlag is, afgesien van die omgedraaide rooi en blou, dieselfde as die vlag van Chili (Flag of Chile.svg). Deesdae word hierdie vlag in die Nasionale Vergadering langs die nasionale vlag gebruik asook op ander plekke waar die volksverteenwoordigers vergader. Die vlag van Yara word ook, soos reeds genoem, gebruik as geus.

Amerikaanse besetting en onafhanklikheid[wysig]

Toe die Verenigde State Kuba tydens die Spaans-Amerikaanse Oorlog van 1898 verower het, het die Stars and Stripes op die eiland gewapper. Nadat Kuba in 1902 onafhanklikheid verkry het, is die huidige vlag aanvaar as simbool van die Kubaanse onafhanklikheid en soewereiniteit,[1] wat effens sinies is aangesien Kuba in werkliheid slegs ’n vasalstaat van die Verenigde State geword het.[3]

Die vlag is sedertdien steeds in gebruik, ook na die Kubaanse rewolusie onder Fidel Castro.

Eksterne skakels[wysig]

  • (en) Kuba by Flags of the World.

Verwysings[wysig]

Commons-logo.svg
Wikimedia Commons het meer media verwant aan:
Vlae van Kuba (kategorie)
  1. 1,0 1,1 1,2 (en) Flags of the World (2006): Cuba, URL besoek op 1 Julie 2007.
  2. 2,0 2,1 2,2 (en) History of Cuban Flags and Emblems (2007): Origins of Cuban Flag, URL besoek op 1 Julie 2007.
  3. (nl) Hans Vogel (2002): Geschiedenis van Latijns-Amerika, Het Spectrum, Utrecht, blz. 252-253.


Hierdie artikel is in sy geheel of gedeeltelik vanuit die Nederlandse Wikipedia vertaal.