Vlag van Honduras

in Wikipedia, die vrye ensiklopedie
Spring na: navigasie, soek
Vlag van Honduras
Vlag van  Honduras
Gebruik Nasionale vlag en Burgerlike- en Staatsvaandel Nasionale vlag en burgerlike- en staatsvaandel
Verhouding 1:2
Goedgekeur 9 Januarie 1866
Ontwerp Drie horisontale bane in blou, wit en blou met vyf blou sterre in die middel van die wit baan.
Wisselvormvlag van  Honduras
Gebruik Vlootvaandel Vlootvaandel
Verhouding 1:2
Ontwerp Drie horisontale bane in blou, wit en blou met die landswapen in die middel van die wit baan.

Die nasionale vlag van Honduras is op 9 Januarie 1866 amptelik in gebruik geneem. Die vlag vertoon drie ewe wye horisontale bane in (van bo na onder) blou, wit en blou met vyf blou vyfpuntige sterre in die wit baan.

Simboliek[wysig]

Honduras het van 1823 tot die burgeroorlog van 1838-1840 deel uitgemaak van die Verenigde State van Sentraal-Amerika, wat van 1825 bekend gestaan het as die Federale Republiek van Sentraal Amerika. Net soos Costa Rica, El Salvador, Guatemala en Nicaragua het Honduras sy vlag gebaseer op die vlag van die Verenigde State van Sentraal-Amerika.[1]

Die twee blou bane stel die Stille- en Atlantiese Oseane voor waartussen Honduras lê. Die wit baan stel die land tussen die oseane voor en die vyf sterre simboliseer die vyf lande wat ontstaan het uit die Verenigde State van Sentraal-Amerika.

Die huidige vorm en kleurvasstelling van die vlag is eers op 18 Januarie 1949 vasgelê. Tot hierdie datum was daar verskeie alternatiewe vlae waarin die sterre in ander partone gerangskik is of waar die kleur van die sterre geel in plaas van blou was.

Ontwerp[wysig]

Die drie horisontale bane is elk ewe hoog en neem dus een derde van die vlag in beslag. Die blou in die boonste en onderste bane word amptelik beskryf as azul turquesa (donker blou).[2]

Die vyf vyfpuntige sterre is in ’n X-patroon waarvan die middelste ster presies in die middel van die vlag is. Die middel van die twee linkerste sterre is een derde van die vlagpaalkant af en die middel van die twee regterste sterre is een derde van die wapperkant van die vlag af.[2]

Ander vlae[wysig]

Geskiedenis[wysig]

Vlae van die Verenigde State van Sentraal-Amerika[wysig]

Die vlag van Honduras, soos reeds genoem, is gebaseer op die vlag van die Verenigde State van Sentraal-Amerika, wat op sy beurt gebaseer is op die vlag van Argentinië. Hierdie vlag het uit drie horisontale bane in blou, wit en blou bestaan met die wapen van die Verenigde State in die middel van die wit baan. In die periode van die bestaan van die federasie het hierdie vlag gedien as nasionale vlag van Honduras maar ook as die deelstaatvlag. Hierdie vlag kan dus gesien word as die eerste Honduraanse vlag.

Die ander lande wat uit die federasie ontstaan het (Costa Rica, El Salvador, Guatemala en Nicaragua) het ook hul vlae op die vlag van die Verenigde State van Sentraal-Amerika gebaseer. Die vlae van hierdie lande bestaan ook uit die kleurkombinasie van blou-wit-blou; Costa Rica het ’n rooi baan bygevoeg en die vlag van Guatemala bestaan uit drie vertikale bane.

Vlae van die onafhanklike Honduras[wysig]

Toe Honduras hom in 1838 onafhanklik verklaar het, het die vlag van die Verenigde State van Sentraal-Amerika as nasionale vlag in gebruik gebly. In 1851 het Honduras saamgewerk aan die stigting van ’n nuwe Sentraal-Amerikaanse federasie. Hierdie federasie het nie lank staande gebly nie maar het wel ’n nuwe vlag gehad wat gebaseer was op die ou Sentraal-Amerikaanse vlag.[3] Aangesien dit nie waarskynlik is dat die vlag van 1851 in ’n kort tyd wyd aanvaar is nie, is die ou vlag waarskynlik gebruik tot 16 Februarie 1866 toe die eerste egte Honduraanse vlag aanvaar is.[4]

Daar is geen duidelikheid oor hoe die vlag van 1866 presies daar uitgesien het. Dit is wel duidelik dat die vlag, net soos sy vorogangers, uit drie horisontale bane in blou, wit en blou bestaan het en dat daar vyf blou sterre in die wit baan was. Volgens sommige bronne was die posisie dieselfde as die huidige vlag, maar na benede gepunt; ander bronne stel dit dat die sterre in ’n halfsirkel verskyn het. Die oorlogsvaandel het die toenmalige Honduraanse wapen vertoon met vyf sterre daaronder.[4]

In 1895 het aan die lig gekom dat Honduras saam met Nicaragua en El Salvador die Republiek van Sentraal-Amerika sou stig; weer ’n poging om die Sentraal-Amerikaanse state te verenig. Aangesien die vlag van die Republiek goue sterre bevat het, is die Honduraanse vlag dikwels met goue sterre uitgebeeld sonder dat daar wetlike voorskrifte daarvoor was.

In 1933 is die ontwerpbesonderhede van die vlag effens aangepas; dieselfde het in 1949 gebeur en sedertdien is daar nog nie weer aan die vlag verander nie.

Eksterne skakels[wysig]

Verwysings[wysig]

  1. (en) Nueva Alejandría (2007): Bandera de Honduras, URL besoek op 16 Julie 2007.
  2. 2,0 2,1 (en) Flags of the World (2006): Honduras, URL besoek op 15 Julie 2007.
  3. (en) Vir ’n afbeelding, sien: Flags of the World (2005): Central America - Historical Unions and Federations.
  4. 4,0 4,1 (en) Flags of the World (2004): Honduras - Historical Flags, geraadpleeg op 17 Julie 2007.
Commons-logo.svg
Wikimedia Commons het meer media verwant aan:
Vlae van Honduras (kategorie)


Hierdie artikel is in sy geheel of gedeeltelik vanuit die Nederlandse Wikipedia vertaal.