Bob Marley

in Wikipedia, die vrye ensiklopedie
Spring na: navigasie, soek
Bob Marley
Bob-Marley.jpg
Bob Marley tydens een van sy konserte
Geboortenaam Nesta Robert Marley
Geboorte 6 Februarie 1945
Nine Mile, Saint Ann (Jamaika)
Afsterwe 11 Mei 1981 (36 jaar oud)
Miami, Florida (VSA)
Beroep(e) Musikant, Liedjieskrywer, Kitaarspeler
Genre(s) Reggae, ska, rocksteady
Instrument(e) Kitaar, Slaginstrument, stem
Aktiewe jare 1962 - 1981
Uitgewer(s) Beverley's, Studio One, Wail'n Soul'm, JAD, Upsetter, Tuff Gong, Island
Webwerf www.bobmarley.com
Assosiasies Bob Marley and the Wailers
Portal.svg Musiekportaal
Bob Marley se ster op die Walk of Fame

In die laat-1960's en vroeë 1970's het die Rastafarianisme wêreldwyd onverwags nuwe aandag gekry met die toenemende gewildheid van 'n relatief nuwe musiekstyl: reggae. Die "profeet" wat die Rastafariese boodskap deur reggae aan die wêreld sou oordra, was Bob Marley, 'n Jamaikaanse sanger, kitaarspeler en liedjieskrywer.

Marley is op 6 Februarie 1945 gebore as Robert Nesta Marley, en in 1961 stig hy sy eerste groep, The Rudeboys, wat later The Wailers geword het. Met sy meesleurende ritme en sterk lirieke het Marley gou die eerste reggae-musikant geword om internasionale ster-status te bereik. Twee ander lede van The Wailers, Bunny Livingston en Peter Tosh, sou later ook suksesvolle loopbane op hul eie volg.

Reggae is 'n versamelnaam om 'n verskeidenheid van Jamaikaanse musiekstyle te beskryf - "ska", "rock-steady", "poppatop" en "mento". Marley se musiek het ook invloede getoon van die Amerikaanse "rhythm and blues" en Jamaikaanse "folk" en "dub".

In 1967 het Marley, wat 'n Christelike agtergrond gehad het, hom amptelik tot die Rastafarianisme bekeer en daarna het sy musiek sterk elemente van spiritualisme en mistisisme bevat. Met sy lang Rasta-lokke en openlike voorspraak vir die gebruik van ganja het Marley vir baie jong swartmense oor die wêreld 'n toonbeeld geword van rebelsheid en verset teen die Babilon-stelsel. In sommige van sy liedjies bevorder hy openlik revolusie as 'n metode om persoonlike vryheid te bereik, terwyl ander handel oor liefde of 'n lewe sonder sorge.

In 1976 het Marley 'n groot impak op Europa gemaak tydens 'n toer deur onder meer Engeland, Swede, Nederland en die voormalige Wes-Duitsland. Dieselfde het gebeur tydens 'n daaropvolgende toer deur die VSA, waar sy albums soos Exodus (1977), Kaya (1978), Babylon by Bus (1978) en Uprising (1980) vandag nog gewild is. Bob Marley is op 11 Mei 1981 in die fleur van sy lewe dood aan kanker, maar sy musiek leef steeds wêreldwyd voort.

Hoewel die meeste van Marley en ander reggae-musikante se aanhangers van die musiek gehou het sonder om noodwendig self die Rastafariese geloof te aanvaar, het die Rastafarianisme en die Rasta-boodskap nogtans wêreldwyd bekendheid verwerf. Vir baie swartmense - selfs in Afrika - het reggae-musiek en die Rastafarianisme die simbool geword van vryheid en het hulle daarin hul eie, unieke identiteit ontdek.