Dobrinja Nikititsj

in Wikipedia, die vrye ensiklopedie
Dobrinja Nikititsj red Zabawa Poetjatitsjna van die draak Gorinitsj.

Dobrinja Nikititsj (Russies: Добры́ня Ники́тич) is ’n Slawiese folklore-held van Kiëf-Roes. Hy, Ilja Moeromets en Aljosja Popowitsj word beskou as die grootste van die legendariese bogatiri, of ridders, van Kiëf-Roes.

Dobrinja word in bilini, of epiese gedigte, uitgebeeld as ’n verslaner van drake – hy het glo onder meer die draak Gorinitsj doodgemaak. Hy was ’n musikant, skaakspeler, boogskutter en stoeier. Historici glo sy karakter het ontstaan uit die ware Slawiese leier Dobrinja, wat die leërs van Swjatoslaf die Grote aangevoer en sy seun Wladimir die Grote opgevoed het.

Dobrinja en die draak[wysig | wysig bron]

Die verhaal begin waar Dobrinja se ma vir hom sê om nie na die Saraseenberge te gaan, klein drakies dood te trap, Russiese gevangenes te red of in die Poetsjai-rivier te was nie. Dobrinja is egter ongehoorsaam en doen al dié dinge. Terwyl hy in die rivier was, maak die draak sy verskyning. Eers dink Dobrinja hy gaan sterf, maar eindelik verslaan hy die draak.[1]

Die draak smeek dat Dobrina om hom nie doodmaak nie en die twee sluit ’n vredesverdrag. Daarna vlug die draak en ontvoer die niggie van prins Wladimir, Zabawa Poetjatitsjna.

Toe Dobrinja in Kiëf kom, vra die prins hom om sy niggie te red. Dobrinja keer terug na die Saraseenberge en raak in ’n geveg met die draak betrokke. Hy veg drie dae lank. Op die derde dag wil hy moed opgee en wegry, maar ’n stem uit die hemel sê vir hom om te bly en nog drie uur lank te veg. Ná die drie uur maak Dobrinja die draak dood en red Zabawa.

Aangesien hy ’n boer was, kon hy egter nie met haar trou nie en hy gee haar toe vir Aljosja Popowitsj. Hy self het toe met ’n ander meisie, Nastasja, getrou.[2]

Verwysings[wysig | wysig bron]

  • Bailey, James; Ivanova, Tatyana (1998). An Anthology of Russian Folk Epics. Armonk, New York: M.E. Sharpe, Inc. ISBN 0-585-26579-8.
  1. Bailey, p. 82.
  2. Bailey, pp. 81-97.

Eksterne skakels[wysig | wysig bron]