Wila

in Wikipedia, die vrye ensiklopedie
’n Wila in die Slawiese mitologie.

’n Wila is die Slawiese weergawe van ’n nimf. Hulle het mag oor die wind en dit verskaf hulle plesier om sterk winde en storms te veroorsaak. Hulle woon om heuwels en berge, en kan hul verskyning maak as spookagtige figure met lang mantels om hulle gedraai.

Die wiła (uitgespreek wiwha) in die Poolse mitologie en die wila (uitgespreek wila) in die Suid-Slawiese mitologie is feetjie-agtige geeste wat in die wildernis en soms in die wolke woon. Daar is geglo hulle is die geeste van vroue wat lossinnig gelewe het en nou tussen die lewe en die hiernamaals rondsweef. Hulle is gewoonlik mooi jong meisies, nakend of geklee in blink, wit of blou rokke, of groen rompe wat van blare gemaak is.

Daar is geglo die wili sou sterf of na hul oorspronklike vorm terugkeer as een enkele van hul hare uitgetrek word. ’n Mens kan beheer oor ’n wila kry deur ’n stukkie van haar vel te steel. As dit verbrand word, sou sy verdwyn.

Die wili het pragtige stemme en dit kan groot rukwinde veroorsaak wat ’n huis in die lug kan oplig. Ondanks hul sjarme is die wili egter groot vegters. Die aarde bewe glo wanneer hulle veg. Hulle het helende en profetiese kragte en help soms mense. Ander kere lok hulle jong mans uit om met hulle te dans – dit kan baie goed of baie sleg vir mans wees na gelang van hul bui. Hulle sal enige man doodmaak wat hulle teengaan of nie woord hou nie. Groot kringe dik gras word agtergelaat wanneer hulle dans; ’n mens moenie daarop trap nie, want dit kan ongeluk bring.

Offerande aan wili bestaan uit ronde koeke, linte, vars vrugte en groente of blomme wat by heilige plekke gelos word (’n sekere heuwel of kring bome).

In Kroatiese folklore is die Velebit-bergreeks bekend vir mitiese feetjies. Die bekendste een is Velebitska Vila of Vila Velebita ("die feetjie van Velebit"). Die wila word beskryf as ’n stil gees wat die beskermengel van die bergreeks is. Dit het gelei tot verskeie liedere, waarvan die gewildste een in die 19de eeu geskryf is: Vila Velebita. Dit is vandag nog gewild.

Wili wat in die Serwiese mitologie by die naam genoem word, is Andresila, Andjelija, Angelina, Djurdja, Janja, Janjojka, Jelka, Jerina, Jerisavlja, Jovanka, Katarina, Kosa, Mandalina, Nadanojla en Ravijojla.[1] Ravijojla is die bekendste van hulle,[1] terwyl Jerisavlja as hul leier beskou word.[2]

Verwysings[wysig | wysig bron]

  1. 1,0 1,1 Š. Kulišić; Petrović, P. Ž.; Pantelić, N. (1970). "Вила". Српски митолошки речник (in Serbian). Belgrade: Nolit. p. 68.{{cite book}}: AS1-onderhoud: onerkende taal (link)
  2. Š. Kulišić; Petrović, P. Ž.; Pantelić, N. (1970). "Јерисавља". Српски митолошки речник (in Serbian). Belgrade: Nolit. p. 161.{{cite book}}: AS1-onderhoud: onerkende taal (link)

Eksterne skakels[wysig | wysig bron]