Gevlekte muisvoël

in Wikipedia, die vrye ensiklopedie
Spring na: navigasie, soek
Gevlekte muisvoël
'n Muisvoël in Kenia
Bewaringstatus
Wetenskaplike klassifikasie
Domein: Eukaryota
Koninkryk: Animalia
Filum: Chordata
Klas: Aves
Orde: Coliiformes
Familie: Coliidae
Genus: Colius
Spesie: C. striatus
Binomiale naam
Colius striatus
(Gmelin, 1789)

Die gevlekte muisvoël (Colius striatus) is 'n lid van die muisvoëlfamilie, wat slegs in Afrika aangetref word. Dit is die grootste van die spesie, sowel as die mees algemene. Hulle word gewoonlik in swerms van 12 of meer gesien en snags koek hulle saam, vermoedelik om hul liggaamshitte te behou. Broeityd is in die somer en die nes is 'n slordige kelk bestaande uit takkies wat in 'n boom of struik geplaas is. Drie of vier eiers word gelê.[1]

Beskrywing[wysig | wysig bron]

'n Gevlekte muisvoël in Suid-Afrika
Afgeneem by Bwindi, Uganda

Die voël is sowat 35 cm lank en sy stert maak sowat die helfte van sy lengte uit. Dit weeg sowat 57 gram en het ’n prominente kuif. Sy naam kom van sy vaal muisbruin kleur. Die snawel is swart bo-op en pienkerig aan die onderkant. Hoewel die gevlekte muisvoël raserig kan wees, is hy nie bekend vir sy stem nie. Hulle het ’n tsoe-tsoe-roep terwyl hulle vlieg en ’n tisk-tisk-waarskuwingsroep.[2]

Habitat[wysig | wysig bron]

Die voëls kom voor van Kameroen ooswaarts na Eritrea en Ethiopië, en suidwaarts deur Oos-Afrika tot in die suidelike dele van Suid-Afrika. Die meeste habitats is vir hulle geskik, buiten die reënwoude en baie droë gebiede. Hulle verkies oop bosveldstreke en kom algemeen voor in savannes en oop woudlande. Hulle word ook dikwels in stedelike gebiede met tuine en boorde gesien.[2]

Ekologie[wysig | wysig bron]

Die gevlekte muisvoël is ’n vrugtevreter en leef hoofsaaklik van bessies en ander vrugte, blare, sade en nektar, en kies sy kos versigtig van gebied tot gebied.

Hulle is sosiale voëls wat saam eet en mekaar se vere versorg. Hulle volg mekaar dikwels van boom tot boom in ’n soort volg-die-leier-"spel". Snags sit groepe van 20 of so elk dig opmekaar en op koue nagte kan hulle bewegingloos bly sit. Hulle is dan maklike prooi, maar hul getalle maak dikwels dat hulle veilig bly.[2]

Broeigewoontes[wysig | wysig bron]

Die voëls broei enige tyd van die jaar. Die neste is groot in vergelyking met die voël en onnet. Dit word gemaak van plant- en diermateriaal en sluit soms papier of stukkies lap in. Die mannetjie en wyfie bou saam daaraan. Die wyfie lê van een tot sewe eiers, maar gewoonlik drie tot vier. Die klein voëltjies word deur albei geslagte versorg, en soms ook deur ouer voëls uit vorige broeisels. Die eiers broei ná 14 dae uit en die klein voëltjies verlaat die nes vir die eerste keer wanneer hulle 17 tot 18 dae oud is. Ná net meer as ’n maand begin hulle self kos soek.[2]

Verwysings[wysig | wysig bron]

  1. Die Suid-Afrikaanse voëlgids (4de uitgawe), John Sinclair, John Mendelsohn, 1987. bl. 15
  2. 2,0 2,1 2,2 2,3 MacLean, Gordon Lindsay (1993). Robert's Birds of Southern Africa, 6de, Kaapstad: Trustees of the John Voelcker Bird Book Fund. p. 363-364. 

Sien ook[wysig | wysig bron]

Eksterne skakels[wysig | wysig bron]