I.J. Good

Irving John (Jack) Good, gebore as Isadore Jacob Gudak (9 Desember 1916, Londen – 5 April 2009, Radford), was 'n Brits-Amerikaanse wiskundige, kriptoloog en statistikus. Hy is bekend vir sy samewerking met Alan Turing.

Biografie

Good is gebore as Isadore Jacob Gudak, maar het homself later Irving John Good genoem. Sy ouers was Joodse emigrante uit Pole wat hulle in Londen gevestig het. Sy pa was 'n horlosiemaker wat later 'n suksesvolle juwelierswinkel bestuur het en was bekend as 'n skrywer van Jiddisj-boeke onder die naam 'Moshe Oved'. Reeds op 'n jong ouderdom, op laerskool, het Good bewys dat hy baie talentvol is in wiskunde en na hoërskool het hy aan die Universiteit van Cambridge gestudeer en in 1938 gegradueer. Hy het daarna wiskundige navorsing onder leiding van Godfrey Harold Hardy en Abram Besikovich gedoen. In 1941 het Good sy PhD in wiskunde ontvang terwyl hy aan Bletchley Park toegewys is, waar Brittanje se topwiskundiges probeer het om militêre kodes te breek. Hier het hy vir Alan Turing ontmoet en saam het hulle daarin geslaag om die kode van die Duitse Enigma-masjien te ontsyfer, wat die Britte in staat stel om Duitse radioverkeer te monitor. Terselfdertyd het Good belangrike bydraes gelewer tot die ontwikkeling van die Colossus, een van die eerste 'regte' rekenaars. Ná die oorlog het Good ook belangrike bydraes tot Bayesiaanse statistiek gelewer. Van 1948 tot 1967 het Good hoofsaaklik vir die Britse regering gewerk in die ontwikkeling van rekenaars, statistieke en kriptologie. Baie van Good se werk in hierdie gebiede word steeds as 'n Britse staatsgeheim geklassifiseer. In 1967 het Good na die Verenigde State vertrek waar hy 'n professoraat aan die Virginia Polytechnic Institute en State University geneem het. Hy het hier gedoseer tot 1994 toe hy afgetree het. Good is in 2009 op die ouderdom van 92 oorlede.

Werk

Good het belangrike bydraes gelewer tot die wiskundige teorieë agter vandag se rekenaars en tot waarskynlikheidsteorie, statistiek en die Fourier-transformasie. Verder was hy 'n uitstekende skaakspeler en ook 'n entoesiastiese go-speler, vandat Alan Turing hom die reëls van die spel geleer het. In 1965 het Good 'n artikel gepubliseer waarin hy besin oor die moontlikheid van bomenslike kunsmatige intelligensie vanaf rekenaars en wat dit vir die toekoms van die mensdom kan beteken.

“Laat 'n ultra-intelligente masjien gedefinieer word as 'n masjien wat al die intellektuele aktiwiteite van enige mens hoe slim ook al kan oortref. Aangesien die ontwerp van masjiene een van hierdie intellektuele aktiwiteite is, kan 'n ultra-intelligente masjien selfs beter masjiene ontwerp; daar sou dan ongetwyfeld 'n 'intelligensie-ontploffing' wees, en die intelligensie van die mens sou ver agtergelaat word. Die eerste ultra-intelligente masjien is dus die laaste uitvinding wat die mens ooit moet maak, mits die masjien gemaklik genoeg is om ons te vertel hoe om dit onder beheer te hou.”  — I.J. Good[1]

Dit maak Good een van die eerste denkers oor die transhumanistiese konsep van wat nou die tegnologiese singulariteit genoem word.

Werke

Good het meer as 2 400 publikasies in wetenskaplike joernale onder sy naam. Hieronder is 'n paar van sy bekendste werke.*

Boeke

I.J. Good: Probability and the Weighing of Evidence. Charles Griffin, London 1950.

• I.J. Good (saamensteller): The Scientist Speculates. Heinemann & Basic Books, New York 1962.
• I.J. Good: The Estimation of Probabilities. MIT Press, Cambridge, MA, 1965.
• D.B. Osteyee & I.J. Good. Weight of Evidence, the Singularity between Probability Measures and Signal Detection. In Lecture Notes in Mathematics, Springer-Verlag, New York 1974.
• I.J. Good: Good Thinking: The Foundations of Probability and Its Applications. Univ. of Minn. Press, Minneapolis 1983.
• Jack Good: Enigma and Fish. In: Francis Harry Hinsley and Alan Stripp: Codebreakers – The inside story of Bletchley Park. Oxford University Press, Reading, Berkshire 1993, ISBN 0-19-280132-5.
• I.J. Good: Early work on computers at Bletchley, Cryptologia April 1979

Belangrike Wetenskaplike Publikasies

• Good, I. J.. “Explicativity, corroboration, and the relative odds of hypotheses.” Synthese 30 (1975): 39-73.

Bronnelys

• Dan van der Vat, "Jack Good" (obituary), The Guardian, 29 April 2009, p. 32.
• Hugh Sebag-Montefiore, Enigma: The Battle for the Code, London, Weidenfeld & Nicolson, 2000, ISBN 978-0-297-84251-4