Long Beach

in Wikipedia, die vrye ensiklopedie
Jump to navigation Jump to search

City of Long Beach
The Aquatic Capital of America
Long beach3.jpg

Kaart Wapen
LA County Incorporated Areas Long Beach highlighted.svg
Seal of Long Beach, California.png
Vlag
 Land Flag of the United States.svg Verenigde State
 Deelstaat Flag of California.svg Kalifornië
 County Los Angeles County
 Koördinate 33°48′N 118°9′W / 33.800°N 118.150°W / 33.800; -118.150
 Gestig in 1880 as Willmore City
 Geïnkorporeer op 13 Desember 1897
 Oppervlakte:  
 - Totaal 133,2 vk km
 Hoogte bo seevlak 0 m
 Bevolking:  
 - Totaal (Sensus 2010) 492 682
 - Bevolkingsdigtheid 3 698,8/vk km
 Tydsone PST (UTC -8)
Somertyd: PDT (UTC -7)
 Klimaat  
 - Tipe Mediterreens
 - Gemiddelde jaarlikse temperatuur 18,5 °C
 - Gem. temp. Januarie/Julie 13,9 / 23,2 °C
 - Gemiddelde jaarlikse neerslae 328,7 mm
 Burgemeester Robert Garcia
 Amptelike Webwerf longbeach.gov
Die redery Cunard Line se befaamde Art Deco-plesierboot HMS Queen Mary lê sedert Desember 1967 permanent in Long Beach as museum-, hotel- en restaurantskip voor anker. Dit het lankal een van die ikoniese besienswaardighede van Suid-Kalifornië geword

Long Beach is die sewende grootste stedelike nedersetting in die Amerikaanse deelstaat Kalifornië, geleë aan die monding van die Los Angeles-rivier in die Stille Oseaan in Suid-Kalifornië. Die stadsnaam is afgelei van die wit sandstrand wat oor 'n afstand van 5,5 myl (9 km) strek.[1]

Long Beach se hawe het tot een van die besigstes ter wêreld ontwikkel en is tans die tweede grootste houerhawe in die VSA. Danksy die olievelde, wat hier aan- en aflandig ontgin word, is Long Beach daarnaas ook 'n sentrum van die oliebedryf. Ander belangrike plaaslike nywerhede sluit vliegtuie, motoronderdele, elektroniese en oudiovisuele toerusting en meubels in. Die ekonomiese ontwikkeling van die stad is nou gekoppel aan die groei van die plaaslike hoëtegnologie- en lug- en ruimtevaartbedrywe.

As deel van die metropolitaanse gebied van Los Angeles-Long Beach-Santa Ana - Long Beach is sowat 40 kilometer suid van Los Angeles se middestad geleë - het L.B., soos dit in die omgangstaal bekend staan, steeds in die skadu van sy groter susterstad gestaan. In die 1970's was Long Beach veral berug vir sy naglewe-distrikte wat talle seelui gelok het. Intussen is sy hawegeriewe tot van die bestes wêreldwyd herontwikkel, en talle nuwe bouprojekte is aangepak wat van Long Beach 'n stad van baie hoë lewensgehalte maak. Queensway Bay, 'n nuwe buurt langs die Stille Oseaankus, is een van die grootste bouprojekte in die geskiedenis van Kalifornië.

Geografie en klimaat[wysig | wysig bron]

Long Beach is sowat 40 km (25 myl) suid van die middestad van Los Angeles geleë. Volgens die Verenigde State se Sensusburo beloop die totale oppervlakte van Long Beach 133,2 km² of 51,4 vierkante myl, waarvan 130,3 km² land en 2,9 km² water is. Signal City, 'n onafhanklike stad, is as 'n enklawe temidde van Long Beach se stadsgebied geleë.

Die stadshorison van Long Beach

Die grootste deel van Long Beach het 'n Mediterreense tot halfdroë klimaat met baie sonskyndae. Vanweë die ligging aan die Stille Oseaan is Long Beach gedurende die somermaande dikwels in lae wolke en mis gehul wat oornag vorm en gewoonlik teen namiddag weer opklaar. Die seewind, wat dikwels vanuit die Stille Oseaan waai, het 'n matigende invloed op somertemperature. Hittegolwe en bedompige toestande kom selde gelyktydig voor sodat die somerhitte nouliks ongemaklik is.

Die stad se geografiese ligging effens oos van die Palos Verdes-skiereiland en die kuslyn, wat in Long Beach merendeels in suidelike rigting loop, dra daartoe by dat weerspatrone merkbaar van dié van aangrensende nedersettings in die noorde en suide verskil. Die Palos Verdes-berge vorm 'n natuurlike versperring vir lugstrome wat in 'n oos-wesrigting beweeg en die instroming van vogtige lug wat in ander kusstede in Los Angeles County, soos byvoorbeeld Manhattan Beach en Santa Monica, waargeneem kan word.

Net soos in ander Suid-Kaliforniese streke val reën hoofsaaklik in die wintermaande. Swaar reënbuie sak uit tydens storms, maar Long Beach kry minder neerslae as nedersettings naby die San Gabriel- of San Bernardino-berge wat verder landwaarts lê.

Geskiedenis[wysig | wysig bron]

Die middestad van Long Beach

Net vyftig jaar nadat Christophorus Columbus Amerika ontdek het, het 'n Spaanse ekspedisie onder leiding van die Portugees João Rodrigues Cabrilho (Spaanse skryfwyse: Juan Rodríguez Cabrillo; omstreeks 1499-1543) in die kusgebied van die huidige Long Beach voor anker gelê. Cabrilho het die gebied Bahia de los Fumos ("Rookbaai") genoem - na aanleiding van die vure wat deur inheemse Indiane tydens hul jagtogte op konyne in die grasvelde ontstook is. Hierdie vure het groot rookwolke afgegee.

Long Beach se moderne geskiedenis het met die grondskenking begin wat in 1784 aan die soldaat Manuel Nieto oorhandig is. Sy oorspronklike rancho of landgoed is deur sy nakomelinge opgedeel sodat die huidige stadsgebied uiteindelik deel uitgemaak het van twee ranchos, Los Cerritos en Los Alamitos. Los Cerritos is in 1866 aan Lewellyn Bixby verkoop en vervolgens deur sy broer Jotham bestuur. Die Bixby-familie was bekende plaaseienaars wat grootliks bygedra het tot die groei van Long Beach en vandag steeds 'n prominente rol speel.

In 1880 het Long Beach se eerste eiendomsontwikkelaar, William Erwin Willmore, 'n boorling van Engeland, 'n deel van Los Cerritos onderverdeel. Met die aankoms van twee groepe setlaars twee jaar later is die nedersetting (township) Willmore City gevestig. Nog twee jaar later was daar slegs 'n tiental geboue in die nuwe nedersetting. Nadat sy projek geblyk het om onsuksesvol te wees, het Willmore na Arizona verhuis. Nuwe setlaars het nogtans na die gebied gestroom, veral nadat strawwe mededinging tussen twee spoorwegmaatskappye, die nuutgestigte Santa Fe Railroad en die ouer Southern Pacific Railroad, groot getalle besoekers na Long Beach gelok het, en in 1888 is die nedersetting met altesaam 59 geboue en 'n skool onder sy nuwe naam City of Long Beach geïnkorporeer.

Ontevredenheid oor die prohibisie en hoë belastingtariewe was die rede vir 'n kortstondige disinkorporasie in 1897. Inwoners het nog in dieselfde jaar ten gunste van reïnkorporasie gestem. Met die opening van Pacific Electric se elektriese tremstelsel in 1902 het Long Beach as kommersiële sentrum en strandoord vinnig begin groei. In die eerste dekade van die 20ste eeu was dit een van die snelste groeiende stede in die Verenigde State.[2]

Boukuns[wysig | wysig bron]

Long Beach se hawehoof omstreeks 1905
Die strandpromenade in 1907
Die Balboa Films-ateljee

Long Beach se middestad en belangrikste besienswaardighede is wes van die hawegeriewe langs die Stille Oseaankus geleë, met uitgestrekte woongebiede in 'n vlakte wat noordwaarts tot South Central Los Angeles strek en as eiendomsprojekte met meer of min eenvormige enkelgesinhuise ontwikkel is. Hierdie residensiële buurte kontrasteer met sorgvuldig gerestoureerde historiese boukuns en moderne toringgeboue van staal en glas in die middestad rondom Pine Avenue en Shoreline Drive. Hier word van die merkwaardigste geboue uit die vroeë 19de eeu as ook die vermaakgeriewe aangetref wat van Long Beach, ondanks sy ligging naby die hawe en sy nywerheidsgebiede, 'n gewilde strandoord gemaak het.

Vanaf 1902 het Long Beach se hawehoof met die omliggende vermaaklikheidsbuurt ontstaan wat as The Pike bekendstaan en destyds danksy nabygeleë tuimeltreine soos Jack Rabbit Racer en Salt Water Plunge van toeriste gekrioel het wat vir 'n rit tougestaan het - asook skare straatsmouse.[3]

Rolprentbedryf[wysig | wysig bron]

In 1910 het die California Motion Picture Manufacturing Company 'n rolprentateljee in Long Beach op die hoek van 6th Street en Alamitos Avenue opgerig - die eerste ateljee wat wes van Chicago ontstaan het in 'n tydperk toe New York Stad nog die spilpunt van die Amerikaanse rolprentbedryf was. In April 1913 het H. M. Horkheimer saam met sy broer Elwood geërfde geld aangewend om die ateljee te koop.

Die Balboa Amusement Producing Company (ook bekend as Balboa Studios), wat hulle vervolgens hier gevestig het, het in die volgende vyf jaar meer as 1 000 rolprente vervaardig waarvan net sowat 'n tiende bewaar gebly het. Bekende akteurs, wat in dié tyd rolle in die gebroeders Horkheimer se stomfilms vertolk het, sluit Fatty Arbuckle en Buster Keaton in. Charlie Chaplin het drie keer besoeke aan die ateljee gebring - om Arbuckle se rolprentopnames by te woon en om meer oor die bestuur van 'n rolprentateljee te wete te kom. Sy verworwe kennis het Chaplin aangewend vir sy eie nuut gestigte onderneming - United Artists.

Verwysings[wysig | wysig bron]

  1. Eyewitness Travel California. London: Doring Kindersley 2016, bl. 135
  2. Bluff Heights Neighborhood Association: A Brief History of Long Beach. Besoek op 29 April 2018
  3. JD Dickey: The Rough Guide to Los Angeles & Southern California. Tweede uitgawe. London: Rough Guides 2011, bl. 156

Eksterne skakels[wysig | wysig bron]

Geskiedenis
Strande