Nikolai Rimski-Korsakof

in Wikipedia, die vrye ensiklopedie
Nikolai Rimski-Korsakof
Nikolai Rimski-Korsakof in 1893
Agtergrondinligting
GeboortenaamNikolai Andreiewitsj Rimski-Korsakof
Gebore(1844-03-18)18 Maart 1844
Tichwin, naby Sint Petersburg, Russiese Keiserryk
Sterf21 Junie 1908 (op 64)
Ljoebensk, naby Sint Petersburg, Russiese Keiserryk
GenresOpera, simfonie en klassieke musiek
Beroep(e)Komponis, dirigent, pedagoog
InstrumenteKlavier, fluit en tjello
AssosiasiesIgor Strawinski, Anton Arenski, Aleksandr Gretsjaninof

Nikolai Andreiewitsj Rimski-Korsakof (Russies: Николай Андреевич Римский-Корсаков, [nʲɪkəˈlaj ɐnˈdrʲejɪvʲɪtɕ ˈrʲimskʲɪj ˈkorsəkəf], ; 18 Maart 184421 Junie 1908) was 'n Russiese komponis wat in Tichwin naby Sint Petersburg gebore is. Toe hy 12 jaar oud was, het die gesin na Sint Petersburg verhuis, waar hy die Vlootakademie bygewoon het. Van sy 15de jaar af het hy musieklesse geneem en in 1861 het hy die invloedryke Mili Balakiref ontmoet. In 1862 het hy sy studies aan die Vlootakademie voltooi, en kort daarna het hy as bemanningslid na die Amerikas, Spanje, Italië, Frankryk, Engeland en Noorweë geseil.

Die seereis het sy liefde vir die see bevestig en die oseaan dien as agtergrond in talle van sy werke. In 1865 is sy Eerste Simfonie, wat hy voor die seereis begin het, met groot welslae in Sint Petersburg uitgevoer. Sy volgende belangrike werk was Fantasie op Serwiese temas, wat in 1867 deur Balakiref uitgevoer is. Ná die konsert is Rimski-Korsakof se naam aan dié van Balakiref, Moessorgski, Borodin en Cui gekoppel, en so het die benaming "die Vyf" ontstaan.

In 1871 is Rimski-Korsakof as dosent in komposisie aan die Sint Petersburgse konservatorium aangestel, en ten einde sy eie musikale opleiding te voltooi, het hy in 1873 'n studieprogram met die klem op kontrapunt en die fuga onderneem. In 1874 het hy die eerste uitvoering van sy Derde Simfonie gedirigeer, en in dieselfde jaar het hy direkteur van die Vrye Musiekskool in Sint Petersburg geword.

Hy het ook al hoe meer as dirigent aktief geword. Hy het ook 'n groot rol as musiekredakteur van 'n uitgewersonderneming gespeel, en hy het verskeie komponiste se onvoltooide operas voltooi en talle ander werke geredigeer en gepubliseer – veral dié van Moessorgski.

Hy het 16 operas gekomponeer, waaronder Die sneeumeisie (1882), Sadko (1898), 'n Bruid vir die tsaar (1899) en Die goue haan (1909). Van sy orkeswerke is veral Capriccio Espagnol (1887), die simfoniese suite Scheherazade (1888) en die Russiese Paasouverture (1888) bekend. As hoogleraar in komposisie en orkestrasie aan die Sint Petersburgse Konservatorium (van 1871 byna ononderbroke tot sy dood) het hy twee geslagte Russiese komponiste onderrig en dus 'n groot invloed gehad. Igor Strawinski het byvoorbeeld twee jaar lank privaat by hom gestudeer. Rimski-Korsakof is op 21 Junie 1908 op sy landgoed in Ljoebensk naby Sint Petersburg oorlede.

Bronnelys[wysig | wysig bron]

Eksterne skakels[wysig | wysig bron]

  • Wikimedia Commons logo Wikimedia Commons het meer media in die kategorie Nikolai Rimski-Korsakof.
  • (en) Nikolai Rimski-Korsakof in die Internet-rolprentdatabasis
  • (en) "Nikolay Rimsky-Korsakov". Encyclopædia Britannica. Besoek op 3 September 2019.