Zohar

in Wikipedia, die vrye ensiklopedie
Jump to navigation Jump to search
Die titelbladsy van die eerste gedrukte weergawe van die Zohar, 1558.

Die Zohar (Hebreeus: זֹהַר, "glans", "skittering") is die basiese werk in die letterkunde van die Joodse mistieke leer bekend as Kabbalah.[1]

Beskrywing[wysig | wysig bron]

Dit is ’n groep boeke wat kommentaar insluit op die mistieke aspekte van die Tora (die eerste vyf boeke van die Ou Testament) asook vertolkings van en materiaal oor mistisisme, mitiese kosmogonie en mistieke sielkunde. Die Zohar bevat besprekings van die aard van God, die oorsprong en struktuur van die heelal, die aard van die siel, verlossing en die verhouding tussen "universele energie" en die mens. Die skriftuurlike eksegese daarvan kan beskou word as ’n esoteriese vorm van die Rabynse geskrifte bekend as Midrash, wat op die Tora uitbrei.

Die grootste deel van die Zohar is in ’n styl wat al beskryf is as kriptiese, onduidelike Aramees.[2] Aramees, die taal van Israel in die tydperk van die Tweede Tempel (539 v.C. – 70 n.C.), was die oorspronklike taal van groot dele van die Bybelboeke Daniël en Esra, en is die hooftaal van die Talmoed.[3]

Die Zohar het in die 13de eeu die eerste keer in Spanje verskyn en is deur ’n Joodse skrywer, Moses de León, gepubliseer. De León het gesê dit is die werk van Shimon bar Yochai ("Rashbi"), ’n rabbi uit die 2de eeu tydens die Romeinse vervolging[4] wat volgens Joodse legende[5][6] 13 jaar lank in ’n grot weggekruip het om die Tora te bestudeer en deur die profeet Elia geïnspireer is om die Zohar te skryf.

Aanvaarding in Juadïsme[wysig | wysig bron]

Die tradisionele mening van die meerderheid in Judaïsme is dat die leringe van Kabbalah (letterlik "tradisie") deur God aan Bybelse figure soos Abraham en Moses geopenbaar is en toe mondelings oorgedra is totdat Shimon bar Yochai dit neergeskryf het. Moderne akademiese ontleders van die 20ste eeu soos die historikus Gershom Scholem meen egter De León het self die Zohar geskryf.

Sommige Ortodokse Jode en groepe sowel as nie-Ortodokse Joodse denominasies glo laasgenoemde siening en beskou die Zohar dus as aprokrief. Ander aanvaar soms dat die inhoud betekenis vir moderne Judaïsme het.

Verwysings[wysig | wysig bron]

  1. Scholem, Gershom en Melila Hellner-Eshed. "Zohar". Encyclopaedia Judaica. Red. Michael Berenbaum en Fred Skolnik. Vol. 21. 2de uitg. Detroit: Macmillan Reference USA, 2007. 647–664. Gale Virtual Reference Library. Gale.
  2. "A mysterious medieval text, decrypted - The Boston Globe". 
  3. Beyer 1986: 38–43; Casey 1998: 83–6, 88, 89–93; Eerdmans 1975: 72.
  4. Jacobs, Joseph "Zohar". Jewish Encyclopedia. Funk & Wagnalls Company. 
  5. Scharfstein, Sol (2004). Jewish History and You II. Jewish History and You. Jersey City, New Jersey: KTAV Publishing House. p. 24. 
  6. "Rabbi Shimon Bar Yochai - Lag BaOmer at". Ou.org. Besoek op 2012-06-06. 

Eksterne skakels[wysig | wysig bron]