Aalwyn

in Wikipedia, die vrye ensiklopedie
Spring na: navigasie, soek
Aalwyn
Klippiesaalwyn, Aloe succotrina
Wetenskaplike klassifikasie
Koninkryk: Plantae
(geen rang): Angiosperms
(geen rang): Monocots
Orde: Asparagales
Familie: Asphodelaceae
Genus: Aloe
Carolus Linnaeus
Spesies
Sien Lys van aalwynspesies
Aloe vera

Die aalwyn of aalwee (Aloe) is 'n eensaadlobbige vetplant. Die Afrikaanse naam is 'n verbastering van die Nederlandse "Aloë". Daar is meer as 450 aalwynspesies wat oor Afrika en nabygeleë eilande soos Madagaskar versprei is. Sommige spesies word ook op die Arabiese skiereiland en eilande in die Atlantiese Oseaan aangetref.

Aalwyne het groot, dik, blare wat wissel in kleur van grys tot heldergroen. Die blare het 'n wasagtige tekstuur en is goed aangepas vir die dorre klimaat waarin aalwyne aangetref word. Die klein, buisagtige blomme van die aalwyn is geel, oranje of rooi en groei in groepe.

Buiten die gebruik van aalwyne as dekoratiewe plante, word die plant ook gebruik vir die geneeskragtige eienskappe wat aan hom toegeskryf word.

Hierdie plante word ook in rotstekeninge van die San aangetref en word reeds duisende jare lank gekultiveer. Die Egiptiese Ebers-papirus uit ongeveer 1552 v.C. verwys na die aalwyn se medisinale eienskappe en die gebruik daarvan in die balsem van lyke.

Klassifisering en spesies[wysig]

Aloe aristata
Aloe vera

Die nuutste plantklassifiseringstelsel, die APGII-stelsel van 2003, plaas aalwyne in die familie Asphodelaceae, waar dit in die verlede aan die leliefamilie, Liliaceae, behoort het.

Sien ook Lys van aalwynspesies

Daar is meer as 450 soorte aalwyne wat in verskeie soorte en vorms aangetref word: van klein, grasagtige plantjies tot bome met stamme van 18 m lank. Die bekendste aalwynspesies is waarskynlik Aloe vera en Aloe ferox. Hierdie plante is van groot ekonomiese waarde in Suid-Afrika.

Daar is 'n aantal ander plante waarna daar ook soms as "aalwyne" verwys word, alhoewel hulle dit nie in werklikheid is nie, soos gasterias en haworthias. Ook die Noord-Amerikaanse agawe's word soms die "Amerikaanse aalwyn" genoem.

Medisinale gebruike[wysig]

Aalwynsap word dikwels vir medisinale gebruike ingespan. Die jel-agtige sap wat in die vet blare gevind word, kan byvoorbeeld as eerstehulpmiddel by brandwonde gebruik word. Dit is egter nie raadsaam vir om willekeurige aalwyne self vir medisinale doeleindes te gebruik nie: sommige spesies, soos Aloe venenosa, is giftig, terwyl sensitiewe persone newe-effekte ervaar van sommige spesies, soos Aloe barbadensis, wat oor die algemeen as veilig beskou word.

Aloe vera word al duisende jare vir medisinale gebruik gekweek - tot so 'n mate dat die plant se presiese gebied van oorsprong onbekend is. Die Egiptenare het die aalwyn nie slegs in geneeskunde gebruik nie, maar ook om lyke in te balsem. Die Griekse plantkundige Dioskorides (41 - 68 n.C.) het die uitwendige gebruik van aalwyn vir wonde, aambeie, maagswere en haarverlies aanbeveel, asook die inwendige gebruik daarvan as 'n lakseermiddel.

Aalwynsap[wysig]

Sukkulente, soos die aalwyn, stoor water in hulle vergrote vlesige blare, stamme en wortels om geharde toestande te oorleef.

Byna alle aalwynspesies bevat 'n galbitter geel sap wat uit die blare getap kan word. Die sap loop uit die blare as hulle gesny word en word stadigaan hard in die lug. In antieke Egipte en Babilon is hierdie sap as 'n purgeermiddel aangewend vir beide mens en dier.

In Suid-Afrika word veral die sap van die bitteraalwyn (Aloe ferox) getap in die omgewing van Herbertsdale, Albertinia en Mosselbaai. Die plant se groen blare word stomp afgesny en in 'n kring om 'n gat opmekaar gestapel, sodat die sap in 'n houer in die gat in kan drup. Die druk van die swaar blare opmekaar is genoeg om die sap uit te pers. Die versamelde sap word dan verhit en geroer tot dit styf en dik is. Dit word dan uitgegiet en verhard, waarna dit gereed is om te verwerk.

Sien ook[wysig]

Bronnelys en verwysings[wysig]

Commons
Wikimedia Commons het meer media verwant aan:
Aalwyn (bladsy)
  • The Aloe Page by www.succulent-plant.com. Webwerf op 7 Mei 2009 besoek.
  • Die Afrikaanse Kinderensiklopedie: Die Planteryk (R.H. Compton). Nasionale Handelsdrukkery Bpk. Tweede hersiene uitgawe. 1963.
  • Guide to the Aloes of South Africa (Ben-Erik van Wijk en Gideon Smith). Briza Publications, Pretoria S.A., Tweede hersiene uitgawe. 2005