Düsseldorf
vanuit Wikipedia, die vrye ensiklopedie.
|
Düsseldorf  |
|
|---|---|
| Kaart | Wapen |
 |
|
 |
|
| Vlag | |
 |
|
| Land |  Duitsland |
| Administratiewe gewes | Noordryn-Wesfale |
| Stigting | 1288
|
| Oppervlakte: | |
| - Totaal | 217 vk km |
| Hoogte bo seevlak | 38 m |
| Bevolking: | |
| - Totaal (2006) | 581,858 |
| - Bevolkingsdigtheid | 2,681/vk km |
| Etniese groepe: | |
| - Duits | 83% |
| - Ander | 17% |
| Tydsone | |
| - Somertyd | |
| Burgemeester | Dirk Elbers |
| Amptelike webwerf | duesseldorf.de |
Düsseldorf is die administratiewe hoofstad van die Duitse deelstaat Noordryn-Wesfale met 580 520 inwoners (30 Junie 2006). Die stad lê suid van die Ruhrgebied, in 'n gebied waar die vlakte van die Nederryn geleidelik in die bergstreek van die Bergische Land oorgaan.
Die metropool aan die Ryn is met sy ekonomiese, kulturele en kunslewe asook sy argitektuur 'n stad van internasionale betekenis. Naas die regering van die deelstaat Noordryn-Wesfale is 'n groot aantal owerhede en ander instellings in Düsseldorf gesetel. Die skouterrein en Ryns-Wesfaalse Effektebeurs van Düsseldorf is internasionaal bekend.
As een van die welvarendste stede in Europa is Düsseldorf naas Dresden die enigste beduidende metropool in Duitsland wat geen skuldlas het nie. Sedert die nywerheidsomwenteling het nywerhede, handelsmaatskappye en banke van wêreldfaam hulle hoofkwartiere in Düsseldorf. 'n Groot aantal advertensie-agentskappe en modehuise maak van die stad 'n beduidende sentrum van kreatiewe ondernemings.
Die internasionale lughawe van Düsseldorf is die grootste in die metropolitaanse gebied van Ryn-Ruhr met tien miljoen inwoners en het bygedra tot die groei van die plaaslike toerismesektor. Düsseldorf huisves saam met Londen die grootste gemeenskap van Japannese burgers asook talle hoofkwartiere van multinasionale Japannese ondernemings en kulturele instellings vir Japannese.
Met die groot kunsversameling van die deelstaat Noordryn-Wesfale, 'n groot aantal musea en kunsgalerye asook die befaamde Kunsakademie Düsseldorf het die stad tot 'n internasionale kunsmetropool ontwikkel. Bekende teaters soos die Schauspielhaus en die Kom(m)ödchen en talle gewilde Duitse musici en skrywers bevestig Düsseldorf se reputasie as 'n eersterangse sentrum van uitvoerende kunste. Internasionaal befaamde argitekte soos Frank Gehry het in die Düsseldorfse Medienhafen en ander stadsbuurte opspraakwekkende bouwerke geskep.
[wysig] Geskiedenis
Düsseldorf kry in 1288 stadstatus en is sedert 1511 die setel van die Hertoë van Berg. 1614 word dit 'n deel van Pfalz-Neuburg. Onder die keurvors Johan Willem von der Pfalz (1690-1716) beleef die stad 'n bloeitydperk. 1795 beset die Franses Düsseldorf, 1801 word die stad Beiers en van 1806 tot 1813 hoofstad van die Groothertogdom Berg. Sedert 1815 is die stad Pruisies. In 1946 word dit die hoofstad van die deelstaat Noordryn-Wesfale.
[wysig] Ekonomie
Ten opsigte van sy produktiwiteit en groeikoers speel die ekonomie van Düsseldorf 'n leidende rol in Duitsland. Die hooffaktore, wat tot die ekonomiese sukses lei, is die sentrale ligging in die dig bevolkte ekonomiese hartland van Duitsland, die Internasionale Lughawe van Düsseldorf (op twee na die grootste in Duitsland) en die Messe Düsseldorf met 25 van die wêreld se grootste handelskoue en tentoonstellings.
Düsseldorf is ook die hoofstad van die Duitse telekommunikasie-, advertensie- en modebedryf. Die modeskou Collections Premieren Düsseldorf is die grootste wêreldwyd. Die stad is na Frankfurt am Main met die Düsseldorfse Beurs en talle banke ook die belangrikste finansiële sentrum van Duitsland en die hoofkwartier van groot internasionale maatskappye soos Metro, Thyssen, e.on, L'Oréal en Henkel. Daarbenewens is dit die hoofkwartier van baie Japanse maatskappye, met 'n groot Japanse gemeenskap wat hier leef en die stad die bynaam "Nippon aan die Ryn" gee.
[wysig] Eksterne skakels
- Düsseldorf Amptelike webwerf van die stad
