Wasili IV van Rusland

in Wikipedia, die vrye ensiklopedie
Wasili IV
Tsaar van die hele Rusland
Wasili IV van Rusland
Dinastie Sjoeiski (tak van die Huis van Rjoerik)
Bewind 1606–1610
Volle naam Wasili Iwanowitsj Sjoeiski
Gebore 22 September 1552
Gesterf 12 September 1612
Voorganger Vals Dmitri I
Opvolger Tyd van Beroeringe
Michail

Wasili IV Sjoeiski (Russies: Василий IV Шуйский) (22 September 155212 September 1612) was van 1606 tot 1610, tydens die Tyd van Beroeringe, tsaar van Rusland ná die moord op Vals Dmitri I.

Hy is gebore as prins Wasili Iwanowitsj Sjoeiski en stam van grootprinse van Nizjni Nowgorod. Hy was een van die belangrikste bojare gedurende die bewind van Fjodor I en Boris Godoenof.

Hy reis op bevel van tsaar Boris na Oeglitsj om ondersoek in te stel na die dood van tsarewitsj Dmitri Iwanowitsj, die jong seun van Iwan die Verskriklike wat onder geheimsinnige omstandighede gesterf het. Sjoeiski rapporteer dat dit selfmoord was, hoewel daar gerugte is dat hy deur Boris laat vermoor is. Sommige vermoed dat Dmitri ontsnap het en ’n ander seun in sy plek vermoor is. Dit skep die teelaarde vir talle mense wat voorgee dat hulle Dmitri is (sien Vals Dmitri I en Vals Dmitri II).

Toe Boris sterf en sy seun, Fjodor II, die troon bestyg, verander Sjoeiski sy storie om in die guns te kom van Vals Dmitri I, wat probeer om die troon oor te neem deur voor te gee hy is die vermoorde tsarewitsj. Sjoeiski ken Vals Dimitri uit as die regte Dmitri ondanks die feit dat hy vroeër beweer het die seun het selfmoord gepleeg – en dit lei tot die moord op die jong Fjodor.

Sjoeiski sweer daarna saam teen Vals Dmitri en bewerkstellig sy dood in Mei 1606. Op 19 Mei 1606 word Sjoeiski verklaar tot tsaar. Hy regeer tot 19 Julie 1610, maar word nooit algemeen as tsaar erken nie. Hy het selfs in Moskou min gesag en word net op die troon toegelaat omdat daar niemand anders is om sy plek in te neem nie.

Verwysings[wysig | wysig bron]

Hierdie artikel is merendeels vertaal vanaf die Engelse Wikipedia-artikel en:Vasili IV of Russia
  • D.I. Ilowaiski, Die Gekwelde Periode van die Moskowiese Ryk, Moskou, 1894. (Russies)
  • S.I. Platonov, Sketches of the Great Anarchy in the Realm of Moscow, Sint Petersburg, 1899.
  • D.V. Tswjeltef, Tsaar Wasili Sjoeiski, Warschau, 1901–1903. (Russies)
  • [1] 1911encyclopedia (public domain)