Eid-oel-Adha

in Wikipedia, die vrye ensiklopedie
Gebid tydens Eid-oel-Adha by die Badshahi-moskee in Lahore, Pakistan
Eidgah-gebid tydens Eid-oel-Adha in Barashalghar, Bangladesj
Abraham op die punt om sy seun te offer
Seëninge vir Eid-oel-Adha

Eid-oel-Adha (Arabies: عيد الأضحى, ʿīd al-ʾaḍḥā, [ʕiːd ælˈʔɑdˤħæː]), ook die Offerfees genoem, is saam met Eid-oel-Fiter een van die twee heiligste jaarlikse Islamitiese feeste, en word beskou as die heiligste van die twee. Dit word ook Eid-Ul-Adga gespel.[1]

"Eid" beteken in Arabies "dag wat dikwels terugkom". Die woord is afgelei van aoed (terugkeer). Adha verwys na die "offerdiere".

Die fees is ter viering van Ibrahim (Abraham) wat opdrag van God gekry het om sy seun te offer as teken van onderdanigheid, maar voordat hy dit kon doen, het God tussenbeide getree en sy engel Gabriël gestuur om vir Abraham te sê sy offer is reeds aanvaar. Uit dankbaarheid het Ibrahim en Ismaël (Isaak) in geselskap van vriende en armes 'n ram geoffer. Die Koran vertel dié verhaal in Soera 37,99–113[2] en die Bybel beskryf dit in Beresjiet/Genesis 22,1–19.[3] Tradisioneel word bokbe, beesagtiges of kameelagtige geoffer, na gelang van die beskikbare diere. Die vleis van die offer word in drie dele verdeel: Een deel word deur die gesin gehou, ’n ander deel word aan vriende, bure en die gesin gegee en die derde deel gaan na behoeftiges.

Eid-oel-Fiter het ’n spesifieke salaah (Islamitiese gebed) wat uit twee rakats (eenhede) bestaan en gewoonlik in ’n oop veld (musallā of eidgah) of groot saal plaasvind. Die toespraak (chutba) van die Imam word na die gebid gehou; in teenstelling met die Vrydaggebed, waar dit voor die gebed gehou word.

In die Islamitiese kalender, wat ’n maankalender is, val Eid-oel-Adha op die 10de dag van Dhu'l Hidjdja, die laaste maand. Vierings begin nadat die pelgrims in Mekka wat aan die hadj deelneem, van Berg Arafat af kom. Dit duur vier dae, tot met sonsondergang op die 13de Dhu'l Hidjdja.[4][5] In die Gregoriaanse kalender, ’n sonkalender, verskil die datum van jaar tot jaar – dit is elke jaar 10 tot 11 dae vroeër.

Die dae van Eid word in die hadit uitgesonder as "dae van herinnering" en word as die heiligste dae in die Islamitiese kalender beskou.

Datums[wysig | wysig bron]

Eid-oel-Adha is volgens die Islamitiese kalender op 10 Dhu'l Hidjdja, die werklike viering begin egter altyd met sonsondergang op die vooraand (omdat 'n dag met sononder begin). Aangesien maande in die Islamitiese kalender altyd na die maan bereken word, wissel die datum van hierdie dag volgens die Gregoriaanse kalender. Omdat die Joodse kalender 'n maan- en sonkalender is en die Joodse Jom Kippoer op die 10de dag van Tisjrie gevier word, val al om die 33 jaar albei feeste op dieselfde dag.[6]

Jaar in die Islamitiese kalender Datum in die Gregoriaanse kalender
1441 31 Julie 2020 (Vrydag)
1442 20 Julie 2021 (Dinsdag)
1443 9 Julie 2022 (Saterdag)
1444 28 Junie 2023 (Woensdag)
1445 16 Junie 2024 (Sondag)
1446 6 Junie 2025 (Vrydag)
1447 27 Mei 2026 (Woensdag)
1448 16 Mei 2027 (Sondag)
1449 5 Mei 2028 (Vrydag)
1450 24 April 2029 (Donderdag)
1451 13 April 2030 (Saterdag)
1452 2 April 2031 (Woensdag)

Sien ook[wysig | wysig bron]

Verwysings[wysig | wysig bron]

  1. (af) (en) The Cape Muslim Vernacular – ek soembain gou dot kom. Geargiveer vanaf die oorspronklike op 24 Oktober 2019. Besoek op 13 Januarie 2019.
  2. Koran 37,99–113
  3. Beresjiet/Genesis 22,1–19
  4. (en) "Religion & Ethics – Eid el Adha". BBC. Geargiveer vanaf die oorspronklike op 4 Oktober 2019. Besoek op 13 Januarie 2019.
  5. (en) "Slaughtering on all days of Tashrîq". Islam Today. Geargiveer vanaf die oorspronklike op 15 Oktober 2013. Besoek op 30 Augustus 2013.
  6. (en) "Forget About Thanksgivukkah. It's Almost Id Kippur". Haaretz. 2 Oktober 2014. Geargiveer vanaf die oorspronklike op 9 Oktober 2019. Besoek op 23 Februarie 2019.

Eksterne skakels[wysig | wysig bron]