Hollywood Walk of Fame

in Wikipedia, die vrye ensiklopedie
Sterre op die Hollywood Walk of Fame.

Die Hollywood Walk of Fame bestaan uit meer as 2 500 vyfpuntige sterre uit terrazzo en koper in die sypaadjies van 15 straatblokke van Hollywood Boulevard en drie blokke van Vine Street in Hollywood, Kalifornië. Die sterre is permanente openbare monumente vir prestasies in die vermaakbedryf en bevat die name van akteurs, musikante, regisseurs, vervaardigers, musiek- en teatergroepe, fiktiewe karakters ens. Die administrasie van die Walk of Fame word behartig deur die Hollywoodse kamer van koophandel en in stand gehou deur die Hollywood Historic Trust. Dit is ’n gewilde toeriste-attraksie – dit het in 2003 sowat 10 miljoen besoekers gelok.

Beskrywing[wysig | wysig bron]

Die Walk of Fame loop 2,1 km van oos na wes aan Hollywood Boulevard, plus 0,7 km van noord na suid aan Vine Street.

Daar is sowat 2 518 sterre,[1] 1,8 meter uit mekaar. Dit is koraalpienk vyfpuntige sterre van terrazzo met ’n koperrand[2] op ’n houtskoolkleurige terrazzo-agtergrond. In die boonste deel staan die vereerde persoon se naam in koperletters en in die onderste helfte is ’n ronde koperembleem wat aandui op watter terrein die persoon vereer is. Daar is vyf kategorieë:

Rolprente
Televisie
Radio
Musiek of klankopnames
Teater

Altesaam 47% van die sterre is toegeken in die rolprentkategorie, 24% in televisie, 17% in radio/klank, 10% in radio en minder as 2% in teater. Sowat 20 nuwe sterre word elke jaar bygevoeg.[2]

Spesiale sterre word soms aan ander mense toegeken en hul "sterre" het dan ’n besonderse vorm. Die voormalige burgemeester van Los Angeles Tom Bradley se ster toon die stad se seël,[3][4] en die ruimtevaarders van Apollo 11 (Neil Armstrong, Buzz Aldrin en Michael Collins) se sterre is vier identiese grys sirkels op ’n koraalpienk agtergrond met hul name, die datum van die maanlanding ("7/20/69") en die woorde "Apollo XI" in koper.[5] Boaan die sirkels is die televisie-embleem.

By die nabygeleë TCL Chinese Theatre is ook talle sementteëls waar beroemdes sedert die 1920's hul hand- en voetafdrukke in die nat sement vaslê met ’n persoonlike boodskap en hul handtekening daarby.

Sien ook[wysig | wysig bron]

Lys van sterre op die Hollywood Walk of Fame

Verwysings[wysig | wysig bron]

  1. "Upcoming ceremonies, 2518th star" Geargiveer 18 November 2016 op Wayback Machine.walkoffame.com.
  2. 2,0 2,1 "Walk of Fame Frequently Asked Questions" (in Engels). Hollywood Chamber of Commerce. Geargiveer vanaf die oorspronklike op 30 Oktober 2019. Besoek op 13 Mei 2011.
  3. "Mayor gets Hollywood star". The Albany Herald. AP. 26 Junie 1993. p. 2A.
  4. Lohdan, Tom. "Hollywood Walk Of Fame Stars – Mayor Tom Bradley". Flickr.com. Besoek op 18 Mei 2011.
  5. "Hollywood Star Walk: Apollo Landing". Los Angeles Times. Besoek op 18 Mei 2011.

Eksterne skakels[wysig | wysig bron]

Koördinate: 34°6′6″N 118°19′36″W / 34.10167°N 118.32667°W / 34.10167; -118.32667