Hopetown

in Wikipedia, die vrye ensiklopedie
Jump to navigation Jump to search
Hierdie artikel handel oor die dorp "Hopetown", in die Noord-Kaap. Sien asseblief Hoopstad vir die gelyknamige dorp in die Vrystaat.


Hopetown
Ligging van Hopetown op 'n kaart (Noord-Kaap)
Hopetown
Hopetown
Koördinate: 29°37′33″S 24°5′8″O / 29.62583°S 24.08556°O / -29.62583; 24.08556Koördinate: 29°37′33″S 24°5′8″O / 29.62583°S 24.08556°O / -29.62583; 24.08556
Land Vlag van Suid-Afrika Suid-Afrika
Provinsie Noord-Kaap
Distriksmunisipaliteit Pixley ka Seme
Plaaslike Munisipaliteit Thembelihle
Stigtingsdatum 1853
Oppervlak
 - Dorp 73,86 km²  (28,5 vk m)
Bevolking (2011)
 - Dorp 10 259
 - Digtheid 140/km² (362,6/myl2)
Tydsone SAST (UTC+2)
Poskode 8750
Skakelkode(s) 053
Die kerkgebou van die NG gemeente Hopetown. Dié skets is omstreeks 1917 gemaak.

Hopetown is 'n Noord-Kaapse dorp 133 km noordoos van Britstown en 134 km suidwes van Kimberley aan die N12 nasionale pad geleë. Die dorp is 'n sentrum van skaap-, bees- en vrugteboerdery danksy besproeiing uit die nabygeleë damme.

Geskiedenis[wysig | wysig bron]

Hopetown is in 1853 of 1854 gestig en het munisipale status in 1858 verwerf. Daar word algemeen aanvaar dat dit na majoor William Hope vernoem is, ouditeur-generaal en waarnemende sekretaris van die Kaap, maar daar is 'n staaltjie wat die naam verbind met 'n anker, simbool van hoop, wat die weduwee van die eienaar van die plaas De Kalk gedra het. 'n Werker van die plaas het na bewering 'n blikreplika daarvan gemaak en teen die plaas se ingang vasgespyker. Die eerste diamant, Eureka is in 1866 hier op die oewers van die Oranjerivier deur die jong Erasmus Jacobs ontdek en die beroemde Ster van Suid-Afrika van 83,5 karaat is in 1869 op die plaas Zandfontein ontdek. Hoewel die diamante hier baie ontwykend was en nooit grootskaals ontgin is nie, het belangstelling in die diamante tot die ontdekking van diamante by Kimberley en Barkley-Wes gelei.

NG gemeente[wysig | wysig bron]

Vir hoofartikel, sien NG gemeente Hopetown

Hopetown was voor 1854 deel van die NG gemeente Colesberg en het onder die Ring van Graaff-Reinet geressorteer. In 1853 ontvang die Sinodale Kommissie 'n brief van J.C. Wiid, eienaar van die plaas Duvenaarsfontein, waarin hy sy plaas vir die stigting van 'n aparte gemeente aanbied. In 'n afsonderlike brief vra 70 ondertekenaars vir die afstigting van sodanige gemeente.

Op 18 Februarie 1854 word 'n gemeente op die plaas Duvenaarsfontein gestig en gedoop Hopetown, of Hoopstad (sien Hoopstad, Vrystaat), soos dit in die begin bekend was. Dit is dus die oudste NG gemeente in die huidige sinode van Noord-Kaapland (sien Lys van eerste honderd NG gemeentes in Suid-Afrika), maar is slegs die sowat 55ste oudste in Suid-Afrika. Die eerste kerkraad is spoedig bevestig en dienste is eers in 'n tentkerk gehou voor die eerste kerkgebou in Februarie 1857 voltooi en ingewy is. 'n Nuwe kerkgebou is in Januarie 1914 ingewy nadat die oue krake begin toon het en baie ongerieflik vir die kerkgangers was. Danksy die ywer van sendelinge, onder wie J.H. Louw (1890 tot 1898 en weer van 1904 tot 1917) en eerw. J. de Villiers en eerw. G.C. Oosthuizen, is 'n sendinggemeente in 1922 gestig.

Die ontvolking deur NG lidmate van die platteland raak Hopetown se gemeente net soos dié van die meeste ander dorpe. In 1979 was die lidmaattal 750, maar in 2006 net oor die 500 en in 2012 458. (Sien NG Kerk se amptelike webblad vir nadere besonderhede oor die gemeente.)

Sien ook[wysig | wysig bron]

Bekende boorlinge[wysig | wysig bron]

Eksterne skakel[wysig | wysig bron]

Bronne[wysig | wysig bron]

  • Raper, P.E. 1987. Dictionary of Southern African Place Names, Lowry Publishers, Johannesburg.
  • Mayhew, Vic (red.). 1980. Reader's Digest Illustrated Guide to Southern Africa, Reader's Digest Association, Cape Town.
  • Olivier, ds. P.L. (samesteller). 1952. Ons gemeentelike feesalbum. Kaapstad en Pretoria: N.G. Kerk-uitgewers.