Royal Pavilion

in Wikipedia, die vrye ensiklopedie
Spring na: navigasie, soek
Pavilion.jpg
Brighton royal pavilion Qmin.jpg
Die Royal Pavilion in Brighton, Brittanje.

Die Royal Pavilion is ’n voormalige koninklike woning in Brighton, Engeland. Dit is vanaf 1787 in drie fases gebou as ’n strandwoning vir George, die Prins van Wallis, wat in 1811 die land se regent geword het. Dit is gebou in die Indies-Gotiese styl wat vir die grootste deel van die 19de eeu in Indië gewild was.

Geskiedenis[wysig | wysig bron]

Die Prins van Wallis, wat later George IV geword het, het Brighton in 1783 op 21-jarige ouderdom die eerste keer besoek. Die kusdorp het in die mode geraak danksy die feit dat George se oom, prins Henry, Hertog van Cumberland, daar gewoon het; George het sy liefde vir kos, die teater en die vinnige lewe gedeel. Sy dokter het ook aanbeveel dat die seewater goed sou wees vir sy jig.

Hospitaalbeddens in die Pavilion tydens die Eerste Wêreldoorlog.

In 1786 het hy ’n klein eertydse plaashuis gekoop aan die Steine, ’n deel in Brighton wat met gras beplant was en as wandelpad gebruik is. Die huis is in 1787 uitgebrei en dit het ’n vleuel van die Marine Pavilion geword aan ’n sentrale rotunda. Dit het uit net drie hoofkamers bestaan: ’n ontbytkamer, eetkamer en biblioteek in die neo-klassieke styl. In 1801–'02 is die Pavilion vergroot met ’n nuwe eetkamer en konservatorium. Die prins het ook grond om die eiendom gekoop waarop ’n ryskool en perdestalle gebou is.[1]

Tussen 1815 en 1822 het die ontwerper John Nash die Pavilion herontwerp en uitgebrei, en dit is sy werk wat vandag gesien kan word. Die paleis het van buite af ’n opvallende Indies-Islamitiese voorkoms, terwyl die binnekant sterk Sjinese en Indiese eienskappe het. Dit is ’n uitstekende voorbeeld van die eksotiese alternatief vir die gewone, meer klassieke argitektuur van die tyd.

Koningin Victoria het nie van Brighton gehou nie omdat dit klein en onprivaat was.[2] In 1850 het die regering die Pavilion aan die dorp verkoop.[3] Die aangrensende perdestalle is in 1860 omskep in ’n konsertsaal wat vandag bekend is as die Brighton Dome. Baie van die oorspronklike vaste bybehore van die Pavilion is verwyder en in onder meer Buckingham-paleis en Windsor-kasteel gebruik. Sedert 1860 is baie van die bybehore terugbesorg aan die dorp se munisipaliteit, wat groot moeite gedoen het om die Pavilion tot sy eertydse glorie te restoureer.

In die Eerste Wêreldoorlog is die Pavilion en ander plekke in Brighton in ’n militêre hospitaal omskep. Daar was twee operasieteaters en meer as 700 beddens. Meer as 2 300 soldate is daar behandel.

Op 29 Maart 2014 is een van Brittanje se eerste gayhuwelike in die Royal Pavilion voltrek.[4][5]

Verwysings[wysig | wysig bron]

  1. David Beevers, ed., The Royal Pavilion, Brighton: Souvenir Guide and Catalogue 2008:5.
  2. Chainey, Graham (26 Desember 2014). "Queen Victoria and an end to Brighton's royal connection". Brighton and Hove Independent. 
  3. Dale, Antony (1977). Brighton Town and Brighton People. Chichester: Phillimore. p. 221. ISBN 0-85033-219-2. 
  4. Chakrabarti, Reeta (28 Maart 2014). "Gay marriage legalised at midnight in England and Wales". BBC News. Verkry op 21 Julie 2014. 
  5. "Same-sex marriage now legal as first couples wed". BBC News. 29 Maart 2014. Verkry op 21 Julie 2014. 

Eksterne skakels[wysig | wysig bron]

Koninklike wonings in die Verenigde Koninkryk
Koördinate: 50°49′23″N 0°8′15″W / 50.82306°N 0.13750°W / 50.82306; -0.13750
 Bewoon  Bagshot ParkBalmoral-kasteelBirkhallBuckingham-paleisClarence HouseGatcombe ParkHighgrove HouseHillsborough-kasteelHolyrood-paleisSint James-paleisKensington-paleisLlwynywermodRoyal LodgeSandringham HouseThatched House LodgeWindsor-kasteel
 Histories  Paleis van BeaulieuBeaumont-paleisBrantridge ParkBridewell-paleisCarlton HouseCoombe AbbeyCoppinsCumberland LodgeDunfermline-paleisEdinburg-kasteelEltham-paleisFalkland-paleisFort BelvedereHampton Court-paleisKew-paleisLinlithgow-paleisMarlborough HouseKasteel van MeyOsborne HousePaleis van PlacentiaQueen's HouseRoyal PavilionSavoy-paleisStirling-kasteelLondense TowerPaleis van WestminsterPaleis van Whitehall