Heilige Romeinse Ryk
vanuit Wikipedia, die vrye ensiklopedie.
|
|||||
|
|||||
 |
|||||
| Hoofstad | Geen | ||||
| Godsdiens | Rooms Katolisisme | ||||
| Regering | Monargie | ||||
| Keiser | |||||
| - 962–967 | Otto I | ||||
| - 973–983 | Otto II | ||||
| - 996–1002 | Otto III | ||||
| - 1014–1024 | Hendrik II | ||||
| - 1027–1039 | Konrad II | ||||
| - 1046–1056 | Hendrik III | ||||
| - 1084–1105 | Hendrik IV | ||||
| - 1111–1125 | Hendrik V | ||||
| - 1133–1137 | Lothar III | ||||
| Frederik I Barbarossa | |||||
| Wetgewer | Reichstag | ||||
| Historiese tydperk | Middeleeue | ||||
| - Otto I gekroon as Keiser van Italië | 2 Februarie 962 | ||||
| - Konrad II neem die kroon van Boergondië aan | 1034 | ||||
| - Vrede van Augsburg | 25 September 1555 | ||||
| - Vrede van Wesfale | 24 Oktober 1648 | ||||
| - Rynbond gevorm | 12 Julie 1806 | ||||
.svg)
Heilige Romeinse Ryk was die amptelike naam vir die magsgebied van die Romeins-Duitse keisers van die Middeleeue tot by die jaar 1806.
Ná die afsterwe van Karel die Grote is die Frankiese Ryk in drie dele verdeel:
- die Wes-Frankiese Ryk, die historiese voorloper van die huidige Frankryk,
- Lotaringe, 'n koninryk, wat van die Noordsee tot by Rome gestrek, maar uiteindelik verdwyn het, en
- die Oos-Frankiese Ryk, net soos Lotaringe 'n uitgestrekte ryk in die hart van Europa.
Die Heilige Romeinse Ryk is sedert die 10de eeu onder die heerskappy van die Ottone-dinastie uit die voormalige Karolingiese Oos-Frankiese Ryk gevorm. Die Oos-Frankiese koning het na homself as die rex Francorum orientalium verwys -"koning van die Oos-Franke" - en was in feite die heerser oor 'n ryk met 'n verskeidenheid opstandige stamme.
Die naam Sacrum Imperium (Latyns "Heilige Ryk") is in 1157 en die titel Sacrum Romanum Imperium vir die eerste keer in 1254 in 'n historiese dokument gebruik.
Vanaf die 15de eeu is ook die bynaam "van die Duitse Nasie" gebruik, en die bewoners het geleidelik 'n soort kulturele gemenskapsgevoel ontwikkel. Geskiedkundiges verwys na die Heilige Romeinse Ryk soms ook as die Ou Ryk, ter onderskeiding van die Duitse Ryk, wat in 1871 gestig is.
Vanweë sy supranasionale karakter het die ryk nooit tot 'n nasionale staat in die moderne sin ontwikkel nie, maar het steeds 'n soort monargiese raamwerk vir die groot aantal onafhanklike Duitse state gebly. Behalwe vir die keiser en die ryksstande was daar ook min gemeenskaplike instellings.
Danksy sy swakke strukture was die Heilige Romeinse Ryk ná die Middeleeue ook nie meer in staat om 'n oorlog te voer of sy magsgebied uit te brei. Die ryk se bevoegdhede was in die algemeen beperk tot gebiede soos die regssekerheid en die bewaring van vrede. Die ryk het sorg gedra vir politieke stabiliteit en die vreedsame beslegting van konflikte deur die magsdinamiek binne perke te hou: Die ryk het die onderdane beskerm teen willekeurige magsmisbruik van plaaslike heersers en kleiner ryksstande teen regsverkragting deur die magtige ryksstande en die keiser.
Ná die Vredesluiting van Münster (Wesfalen) in 1648 was ook die buurlande as ryksstande 'n deel van die bedeling. Die Heilige Romeinse Ryk het sodoende ook 'n rol gespeel by die bewaring van vrede binne die Europese konstellasie van state.
Sedert die middel van die 18de eeu was die ryk nogtans te swak om sy deelstate teen die magsuitbreiding van interne en eksterne magte te beskerm. Sy politieke onmag was uiteindelik ook een van die redes vir sy agteruitgang. Napoléon Bonaparte se verowerings en die stigting van die Rynbond het die ryk byna heeltemal verlam. Nadat keiser Frans II op 6 Augustus 1806 afstand van die rykskroon gedoen het, is die Heilige Romeinse Ryk van die Duitse Nasie uiteindelik ontbind.
[wysig] Duitse koningskap en Romeinse keiserdom
Koningskap en keiserdom is in die Duitse Ryk steeds as twee verskillende konsepte van wêreldlike mag beskou. Gedurende die Middeleeue is die Duitse koning deur die hoë adel, biskoppe en hertoë (eers later ook deur die keurvorste) verkies, maar nie die keiser nie. Die keiserdom was in politieke opsig selfs 'n fiksie, gebore uit die oortuiging dat daar ook ná die ontbinding van die Romeinse Ryk 'n gemeenskaplike Westers-Christelike beskawing sou bestaan.
Volgens hierdie idee is die heerskappy (Latyns: imperium) oor die ryk vir die eerste keer deur keiser Konstantyn vanuit die weste na Griekeland oorgedra. Met die kroning van Karel die Grote het die pous die imperium later aan die Franke oorgedra, en uiteindelik is dit aan die Romeinse koning Otto I gegee wat eweneens deur die pous gekroon is. Die translatio imperii of oordrag van die ryksheerskappy was 'n uitsluitlike voorreg van die pous.
Pous en keiser was eens oor die posisie wat hulle in die Middeleeuse wêreld beklee het - hulle het die twee swaarde gedra wat deur Christus aan hulle verleen is - die geestelike en die wêreldlike - en hulle was net aan God verantwoordelik. Nogtans het soms konflikte uit die pous se besondere beklemtoning van die geestelike mag voortgespruit: indien hulle mag regstreeks deur God verleen was, sou die pous as sy verteenwoordiger op aarde voorkeur oor die wêreldlike keiser moet geniet. Daarenteen het die keiser met nadruk op die besondere rol van sy mag binne die tydelik-wêreldlike sfeer verwys - 'n mag waaraan immers ook die pous se wêreldlike gesag en die Kerkstaat onderworpe was.
Nadat geskille tussen pous en keiserdom begin verskerp het, het die twee heersers na mekaar as leenhere en vasalle verwys. Gelyktydig het albei pogings onderneem om hulself ook as die leenhere van alle Christelike Europese koninkryke te vestig.[1]
[wysig] Verwysings
- ^ Heinrich Hengst (red.): Faszination Mittelalter. Rätsel und Geheimnisse einer Epoche. Keulen: Lingen 2008, bl. 212
