Jacobus Nicolaas Boshof
Jacobus Nicolaas Boshof (Kogmanskloof, Montagu, Kaapkolonie 31 Januarie 1808 – Weston, Pietermaritzburg, 21 April 1881) was die tweede president van die Oranje-Vrystaat.
Hy begin sy loopbaan in die Kaapse Koloniale Staatsdiens en besoek die Voortrekkers in 1838, waarna hy 'n verslag daaroor skryf wat in die Grahamstown Journal verskyn. Die volgende jaar vestig hy hom in Natal, waar hy voorsitter word van die volksraad van die Republiek van Natalia en, ná Brittanje die republiek annekseer, registrateur en meester van die Hooggeregshof.
In 1854 bied die Vrystaat hom die amp van president aan as opvolger van president Josias Philippus Hoffman. Hy moes talle probleme die hoof probeer bied, onder meer 'n dreigende oorlog met die Basotho. Boonop het die Zuid-Afrikaansche Republiek onder leiding van president Marthinus Wessel Pretorius 'n poging aangewend om die Vrystaat te annekseer. Weens sy steun vir 'n plan van goewerneur sir George Grey om 'n Suid-Afrikaanse federasie tot stand te bring, neem sy gewildheid by talle burgers af. Hy bedank in 1858, keer na KwaZulu-Natal terug en dien etlike jare as parlementslid vir Kliprivier in die kolonie se Wetgewende Raad.
[wysig] Bron
- Rosenthal, Eric, "Encyclopaedia of Southern Africa", Juta and Company Limited, Kaapstad, 1978.
