Paul Sauer
-001.jpg)
Paul Oliver Sauer (1 Januarie 1898, Wynberg - 11 Januarie 1976) was 'n Suid-Afrikaanse kabinetsminister en lewenslange lid van die Nasionale Party.
Inhoud |
[wysig] Agtergrond
Sauer is in 1898 in Wynberg naby Kaapstad gebore as die seun van J.W. Sauer en Mary Constance Cloete. Die egpaar het buiten hom ook twee dogters gehad. Hy kry sy skoolopleiding op Stellenbosch en aan SACS in Kaapstad. Sy naskoolse opleiding kry hy aan die Universiteit van Stellenbosch en die Universiteit van Kaapstad. Ná sy pa se dood erf hy die twee familiewynplase, Uitkyk en Kanonkop naby Stellenbosch.
[wysig] Parlementslid
Hy sluit by die Nasionale Party aan, verloor in 1924 se algemene verkiesing op Stellenbosch teen die Suid-Afrikaanse Party se kandidaat, maar word in die verkiesing van 1929 as lid vir Victoria-Wes tot die Volksraad verkies. Na die dood van Charlie Malan van Humansdorp in 1933, het Paul Sauer die parlementslid vir dié kiesafdeling geword. Dit het gestrek van die Van Stadensrivier af tot by Plettenbergbaai en ook die Kouga en die Langkloof ingesluit.
[wysig] Kabinetsminister
Ná die Nasionale Party se verrassende oorwinning in 1948 stel dr. D.F. Malan hom aan as minister van spoorweë. In 1954 word hy minister van lande, bosbou en waterwese. Dit was deur sy toedoen dat die voormalige Paul Sauer-dam (nou die Kougadam) gebou ter wille van die boere van die Kouga.
Die webwerf[1] van die hoërskool wat na Paul Sauer vernmoem is, sê hy "was 'n beminde minister wat nie geaarsel het om in die besonder die belange van sy kiesafdeling op die hart te dra nie. Deur sy bemiddeling is die N2-Nasionale pad vanaf Kaapstad gebou met ook die beroemde Paul Sauer-brug (Groot Stormsrivierbrug) oor die Stormsrivier, as bekende landmerk in die Tsitsikamma. Hy het ook veel gedoen om die boswerker se lewenstandaard op te hef en hulle werktoestande te verbeter. As gevolg van sy toegewydheid en die bewondering wat sy kiesers in die Humansdorp-kiesafdeling vir hom gehad het, het die inwoners van Kareedouw besluit om die plaaslike skool na hom te vernoem en sedert 1963 staan die skool bekend as Hoërskool Paul Sauer.
[wysig] Aftrede
Sauer tree in 1963 uit die aktiewe politiek en is op 11 Januarie 1976 aan 'n longkwaal oorlede en op Stellenbosch begrawe. Die webwerf vervolg: "Paul Sauer sal onthou word as die Prins van die Suid-Afrikaanse Politiek. Hy staan ook bekend as die grootste parlementariër van sy tyd. Hy was minister, wynboer, groot Afrikaner, gevatte spreker, demokraat en een van die grondleggers van ons hedendaagse verhoudingspolitiek."
[wysig] Herinnering
Die teenswoordige Groot Stormsrivierbrug in die Oos-Kaap is in 1958 voltooi en na hom vernoem. Die Kougadam, naby Patensie in dieselfde provinsie, het vanaf sy voltooiing in 1967 as die Paul Sauerdam bekend gestaan. Eweneens staan die hoërskool op die Oos-Kaapse dorp Kareedouw bekend as die Hoërskool Paul Sauer[2].
[wysig] Bronne
- Rosenthal, Eric, Encyclopaedia of Southern Africa, Juta and Company Limited, Kaapstad en Johannesburg, 1978.
