Pieter Mattheus Kruger le Roux

Hierdie artikel moet skoongemaak of andersins verbeter word. Hierdie artikel voldoen nie tans aan die hoë gehaltestandaarde waarna Wikipedia streef nie. Voel vry om self in te spring en verbeterings te maak, en verwyder hierdie kennisgewing ná die tyd. Vir meer hulp, sien die redigeringshulp. Daar is moontlik kommentaar in die artikel of op die besprekingsblad oor wat verbeter moet word.

Pieter Mattheus Kruger le Roux, ook wel P.M.K. le Roux, (gebore 11 November 1904 opdie plaas Doornkraal, De Rust, in die distrik Oudtshoorn ) was 'n Suid-Afrikaanse politikus.

Le Roux ontvang sy opleiding aan Hoërskool Outeniqua in George. Vanaf 1922 tot 1923 studeer hy B.Sc (Landbou) aan die Universiteit Stellenbosch. Na sy universitêre opleiding gaan hy boer. Hy stel besonder belang in openbare boerderyaangeleenthede. Hy was die stigter en voorsitter van die Klein Karoo Landboukoöperasie op Oudtshoorn. Hy word lid van die plaaslike boerevereniging en dien in die Suidwestelike Landbou-Unie, die SA Landbou-unie se bestuur en as direkteur van die Kango-Tabakkoöperasie. Hy was ook lid van die Sentrale Tabakraad, Tabakbeheerraad en ander landbourade. Weens ‘n hoë werkslas en veelvoudige belange moes hy hom later ontrek aan sommige verpligtinge soos byvoorbeeld direkteur van verskillende private en publieke sakeondernemings.

Van jongs af stel hy aktief belang in politiek en begin as sekretaris van die NP tak op De Rust. In 1942 met die tussenverkiesing te Riversdal stel hy hom vir die eerste keer verkiesbaar, en word verkies tot lid van die Volksraad (LV) vir die Herenigde Nasionale Party. In 1943 verkiesing bestry hy die Bredasdorp-setel vir die Herenigde Nasionale Party maar verloor teen die Verenigde Party se maj. Pieter van der Byl. Hy gaan boer vyf jaar lank. In 1948 word hy verkies tot lid van die Volksraad (LV) vir Victoria-Wes, welke kiesafdeling in 1953 deur die Afbakeningskommissie tot Prieska verander word en as sodanig deur hom verteenwoordig word. In 1953 word hy Provinsiale Sweep vir die Nasionale Party in Kaapland en in 1955 Hoofsweep. In 1958 behou hy die Oudtshoorn-kiesafdeling vir die NP. In Mei 1958 word hy opgeneem in die Kabinet as Minister van Landbou en op 23 Oktober 1958 volg hy Paul Sauer op as Minister van Waterwese (bykomende portefeulje). Met die verkiesing van dr. HF Verwoerd as Eerste Minister in 1961 is die portefeuljes Landbou-Tegniese Dienste en Waterwese aan hom toe vertrou. Hy word in 1966 opgevolg deur J J Fouche.

Die P.K. le Roux-dam (nou die Vanderkloofdam) was na hom genoem.