Alter Bridge

in Wikipedia, die vrye ensiklopedie
Spring na: navigasie, soek
Alter Bridge
Alter bridge logo.gif
Die logo wat die groep op hul CD’s gebruik
Oorsprong Orlando, FL, VSA
Genre(s) Post-grunge, Harde rock
Aktiewe jare 2004-huidig
Uitgewer(s) Wind-up, Universal Republic, Roadrunner, EMI, DC3 Global
Webwerf Amptelike webblad
Last.fm Alter Bridge
Lede Myles Kennedy
Mark Tremonti
Scott Phillips
Brian Marshall
Assosiasies Creed, The Mayfield Four, Projected
Portal.svg Musiekportaal

Alter Bridge is ’n Amerikaanse rockgroep wat in 2004 gestig is in Orlando deur Mark Tremonti (hoofkitaar), Bryan Marshall (baskitaar), Scott Philips (tromme), destyds voormalige lede van Creed,[1] en Myles Kennedy, voorheen van die groep The Mayfield Four. Sedert die stigting van die groep is al die oorspronklike lede nog daar. Die groep se naam is ontleen aan ’n werklike brug wat bestaan het in Detroit, Michigan naby waar Tremonti se huis was langs Alterweg.

Na die ontbinding van Creed in 2004 het Tremonti, Marshall en Phillips met Kennedy begin saamwerk. Die groep het vier albums vrygestel—One Day Remains (2004), Blackbird (2007), AB III (2010) en Fortress (2013)—twee konsertrolprente—Live from Amsterdam en Live at Wembley—en het steeds opnames gedoen en getoer ten spyte van Creed se reünie in 2009. Sedertdien het die twee groepe gelyktydig gewerk. Die lede van Alter Bridge is ook betrokke by verskeie ander projekte insluitend Creed, solo- en sessiewerk en Kennedy se samewerkings met die voormalige kitaarspeler van Guns N’ Roses, Slash.

Geskiedenis[wysig]

Stigting en One Day Remains (2003–2006)[wysig]

Alter Bridge se hoofkitaarspeler en stiter Mark Tremonti, baskitaarspeler Brian Marshall en tromspeler Scott Phillips was lede van Creed saam met die hoofsanger Scott Stapp sedert 1997. Na die vrystelling van twee suksesvolle albums het Marshall die groep in 2000 verlaat, gevolg deur die vrystelling van hulle derde album in 2001. Die groep het in 2003 ’n breek geneem na afloop van ’n kontroversiële toer. Daardie jaar het Tremonti nuwe liedjies begin skryf met die oog op die stigting van ’n nuwe groep met Phillips en Marshall. Hulle het gehou van Myles Kennedy se vorige groep, The Mayfield Four en het vir Kennedy genooi om as die nuwe hoofsanger op te tree.[2] Hulle het die nuwe groep Alter Bridge genoem na ’n werklike brug wat bestaan het naby Tremonti se huis langs Alterweg in Detroit, en het daarna begin met opnames vir hul debuutalbum.[3]

Creed het hul ontbinding in Junie 2004 aangekondig en kreatiewe verskille en toenemende spanning tussen Stapp an die ander groeplede as redes aangevoer.[4] Die stigting van Alter Bridge en van hul debuutalbum en die album se eerste enkelspeler, “Open Your Eyes”, het saamgeval met hierdie aankondiging. Die groeplede het gevoel dat Creed sy eindpunt bereik het en was vasberade om te fokus op hulle toekoms met die nuwe sanger.[2] Alter Bridge se debuutalbum, One Day Remains is op 10 Augustus 2004 vrygestel deur Wind-up Records en het gemengde resensies ontvang.[5][6] Die album is vervaardig deur Ben Grosse (wat ook albums vir kunstenaars soos Filter, Fuel en Sevendust vervaardig het),[3] en het 750,000 eksemplare wêreldwyd verkoop en slegs goue status bereik,[7] baie minder as die multi-platinum sukses wat Creed bereik het. Dit #5 op die Billboard 200 bereik en vir veertien weke daar gebly.[8] Na “Open Your Eyes,” is nog twee enkelspeler van die album vrygestel: “Find the Real” en “Broken Wings.” Hierdie album is ook die enigste waarop Kennedy nie kitaar speel nie aangesien die album naby aan klaar was teen die tyd wat Kennedy by die groep aangesluit het. Kennedy het wel op toer met verskeie liedjies saamgespeel. Al die musiek en die meeste van die lirieke is deur Tremonti geskryf met Kennedy wat van die oorblywende liedjies se lirieke self geskryf het of ten minste gehelp skryf het.[9]

Verskeie liedjies van One Day Remains het ’n affiliasie met WWE gevestig, “Metalingus” in besonder aangesien dit deur voormalige WWE-superster Edge in 2004 aangeneem is as sy intreelied en dit het so gebly tot sy uittrede in 2011. Alter Bridge het later saam met Edge in ’n agter-die-skerms-insetsel verskyn in ’n episode van WWE Raw in 2005.[10] Alter Bridge het in 2005 ook ’n buitengewone instrumentale lied getiteld “Ahavo Rabo Taco Salad” vrygestel vir Total Guitar-tydskrif. Dit was aanvanklik slegs ’n projek van Tremonti maar die res van die groep het hulle by hom aangesluit.[11] ’n Lied getiteld “Save Me” is ingesluit in die klankbaan vir die rolprent Elektra in 2005.[12] Die klankbaan vir ’n ander rolprent van Marvel, Fantastic Four het ook ’n lied van Alter Bridge, “Shed My Skin,” ingesluit.[13] Daardie jaar het die groep ’n EP, Fan EP, vrygestel met vier liedjies op wat hulle as ’n promosionele CD in Europa gebruik het.

Verandering van platemaatskappy en Blackbird (2006–2009)[wysig]

Voor die laaste been van die One Day Remains-toer in 2006 het Alter Bridge se verhouding met Wind-up Records begin versleg omdat die platemaatskappy nie die groep se visie gedeel het nie. Die groep het sedert die vrystelling van One Day Remains gevra om vrygestel te word maar is tot April 2006 geweier toe alle opname-, publiserings- en bevoorradingsooreenkomste uiteindelik beëindig is.[14] Alter Bridge het egter steeds kritiek ervaar, insluitend kritiek oor die ontbinding van Creed, druk om Creed weer op die been te bring en verskeie vals aantygings dat Creed herenig sou word. Sommige kritici het so ver gegaan as om te sê dat Alter Bridge se musiek klink soos dié van Creed met ’n ander sanger. Ten spyte daarvan dat Creed in 2009 weer ’n album uitgegee het,[15] het Tremonti gesê dat “Creed as ’n groep nooit weer sal bestaan nie.”[14]

In 2007 het Alter Bridge aangekondig dat hulle ’n kontrak met Universal Republic Records onderteken het. Tremonti het van die groep se nuwe liedjies gesê: “Ek dink dit is die beste werk wat ons nóg gedoen het.”[16] Alter Bridge se tweede album, Blackbird, met die suksesvolle enkelspelers “Rise Today” en “Watch Over You” is op 9 Oktober 2007 vrygestel.[17] “Watch Over You” was in 2008 te sien in VH1 se Celebrity Rehab with Dr. Drew en die musiekvideo bevat grepe van die reeks.[18] ’n Ander weergawe van die lied met Cristina Scabbia van Lacuna Coil is beskikbaar in iTunes Store.[19] Blackbird is goed ontvang deur kritici en het ’n gradering van 9,4 uit 10 gekry op die Ultimate Guitar Archive.[20] Die album het ook die hoogaangeskrewe titelsnit bevat met die kitaarsolo wat later deur Guitarist aangeprys is en no. 1 op hulle lys van beste kitaarsolo’s van alle tye bereik het[21]

Die groep het ’n suksesvolle wêreldtoer onderneem ter ondersteuning van Blackbird en het hul konsert in die Heineken Music Hall in Amsterdam op 7 Desember 2008 opgeneem vir ’n konsertrolprent getiteld Live from Amsterdam.[22] Die DVD is eksklusief verkoop by lokale gedurende Creed se reünietoer in 2009 en op Amazon.com.[23] Die DVD is besonder goed ontvang en het “by die duisende” verkoop in teenstelling met Amazom se verwagting van “honderde”. Dit het die no. 1-plek bereik op Amazon se “Topverkopers in Musiekvideo’s en Konserte” en vir ’n aantal weke daar gebly.[22][24] ’n Blu-ray-weergawe en ’n luukse weergawe wat in winkels verkoop sou word het egter in ’n kontroversie uitgeloop omdat dit telke male deur Universal Republic vertraag is, wat ondersteuners en groeplede gefrustreerd gelaat het. Dit is uiteindelik op 11 Januarie 2011 in winkels regoor Noord-Amerika vrygestel na twee jaar se gesloer.[25]

Myles Kennedy het sedert 2008 groot lof ontvang toe daar gerugte ontstaan het dat hy saam met voormalige lede van Led Zeppelin gewerk het.[26][27][28] Hoewel die gerugte dat Kennedy met Led Zeppelin sou saamwerk onwaar was,[29] Kennedy het later bevestig dat hy saam met Jimmy Page, John Paul Jones en Jason Bonham liedjies geskryf en geoefen het.[30]

Weer ’n verandering in platemaatskappy en AB III (2009–2012)[wysig]

In 2009 het Alter Bridge ’n ruskans geniet na die bekendmaking van Creed se reünie-toer en nuwe album. Terwyl Tremonti, Marshall en Phillips saam met Scott Stapp as Creed getoer het, het Kennedy gewerk aan sy eerste solo-album en het hy breedvoerig met die kitaarspeler van Velvet Revolver, Slash, begin saamwerk, soveel so dat hy in 2010 en 2011 as hoofsanger saam met Slash getoer het.[31] Alter Bridge het egter steeds regdeur 2009 musiek geskryf en tussen Februarie en Mei 2010 het hulle begin met opnames vir hul derde album.[32][33]

Op 17 Julie 2010 het Billboard geskryf dat Alter Bridge ’n platekontrak met Roadrunner Records onderteken het an dat hulle in 2011 saam met Godsmack sou toer.[34] Hoewel die groep ontken het dat hulle saam met Godsmack sou toer, het hulle die titel van die nuwe album as AB III bekendgemaak saam met ’n snitlys op hul webblad vroeg in Augustus[35] en die gerugte dat ’n kontrak met Roadrunner onderteken is, is deur die maatskappy in ’n persverklaring bevestig. Die persverklaring het ook ’n aankondiging ingesluit dat AB III op 8 Oktober 2010 vrygestel sou word.[36] Op 6 September 2010 het Roadrunner die eerste enkelspeler, Isolation, op hul webblad bekendgestel waar aangekondig is dat die enkelspeler op 26 September 2010 in die Verenigde Koninkryk beskikbaar gestel sou word,[37] Die lied het uiteindelik die groep se mees suksesvolel lied geword deur no. 1 op active rock-radio te bereik en ook op die Hot Mainstreak Rock Tracks, ’n eerste vir Alter Bridge.[38] AB III is deur Roadrunner Records op 8 Oktober 2010 in Australië en Duitsland vrygestel en op 11 Oktober in die Verenigde Koninkryk. Op 9 November 2010 is dit in Noord-Amerika vrygestel deur Alter Bridge Recordings via EMI.[39] Die album het sy buiging op no. 17 op die Billboard 200 gemaak.[38] Die musiekvideo vir “Isolation” is vir die eerste keer op 6 Desember 2010 op Noisecreep vertoon.[40] Op 11 Januarie 2011 is die langverwagte konsertrolprent en -album, Live from Amsterdam in winkels vrygestel.[25] “I Know It Hurts” is later op 21 Januarie 2011 slegs in Australië as die tweede enkelspeler vrygestel.[41] “Ghost of Days Gone By” is op 18 April 2011 as die volgende enkelspeler vrygestel,[42] gevolg deur “Wonderful Life” op 5 Junie 2011 in die Verenigde Koninkryk.[43]

Die groep het bekendgemaak dat AB III veel “donkerder” en wat die lirieke betref verder verwyderd sou wees van hul vorige albums en dit is ook bevestig dat die album saamgestel is as ’n konsepalbum.[44] AB III is met vrystelling met “oorweldigende toejuiging” deur professionele resensente ontvang[45] met MusicRadar wat dit “een van dié kitaaralbums van die jaar” genoem het.[46] Artistdirect het die album ’n perfekte telling gegee en dit ’n “meesterstuk” genoem.[47] ’n Huldigingsalbum aan Alter Bridge getiteld String Tribute to Alter Bridge met klassieke verwerkings van verskeie Alter Bridge-liedjies is op 8 Maart 2011 vrygestel.[48] Op 25 Oktober 2011 het Alter Bridge ’n spesiale uitgawe van AB III, getiteld AB III.5, bekendgestel waarop drie bonussnitte en ’n uurlange dokumentêr getiteld One by One was.[49]

IN 2010 het die groep saam met Slaves of Gravity in die Verenigde Koninkryk en Teddy Porter en Like a Storm in die Verenigde State getoer ter ondersteuning van AB III.[50] In 2011 het hulle saam met Black Stone Cherry en Like a Storm in die Verenigde State getoer.[51][52][53] In die middel van 2011 het Alter Bridge by verskeie Europese feeste opgetree, insluitend die Rock am Ring en Rock am Park-feeste,[54][55] Die Nova Rock-fees,[56][57] Die 2011 Download-fees,[58] die 2011 Hellfest Summer Open Air[59] en verskeie ander. Op 25 April 2011 het Alter Bridge ’n gratis konsert op Jimmy Kimmel Live gehou wat op die ABC-netwerk uitgesaai is.[60] Die groep was medehoofkunstenaar saam met Theory of a Deadman tydens die tweede jaarlikse Carnival of Madness-toer in 2011, met ondersteunende groepe soos Black Stone Cherry, Adelitas Way en Emphatic.[61] Die toer is verleng tot Januarie 2012 toe die groep in Australië by onder meer die Soundwave-fees gespeel het.[62] Die groep het ’n aantal webisodes vrygestel wat hul toer uiteensit en deur DC3 Music Group vervaardig is.[63] In aansluiting hierby is ’n tweede konsertrolprent getiteld Live at Wembley op 29 November 2011 opgeneem in die Wembley-arena tydens die groep se grootste optrede tot nog toe.[64] Dit is op 26 Maart 2012 wêreldwyd vrygestel[65] en sal later in 3D vrygestel word.[66]

Musikale styl[wysig]

Daar word dikwels van Alter Bridge se musiek gesê dat dit “swaar, dog melodies” is.[67] Hulle musiek word onder verskeie genres ingedeel insluitend rock, hardrock, alternatiewe metal, post-grunge, heavy metal en progressiewe metal.[1][68][69]

Alter Bridge se musiek word deur Kennedy en Tremonti geskryf en deur Alter Bridge verwerk met die lirieke wat hoofsaaklik deur Kennedy geskryf is. Tremonti het egter die meeste van die lirieke en al die musiek op One Day Remains self geskryf. Die lirieke op die eerste twee albums gaan grootliks in op hoop en die oorwinning van berou, hartseer, verdriet, eensaamheid, pyn en verslawing.[20][44][70] Die onderwerpe op AB III is aansienlik donkerder met liriese temas wat gebaseer is op ’n geworstel met geloof en die verlies van onskuld.[71][72]

Die groep is bekend vir hul konserte en speel gewoonlik nie in groot lokale soos arenas en amfiteaters nie. Hulle speel eerder in kleiner lokale soos House od Blues, soos wat hul bedoeling aanvanklik was.[2] Myles Kennedy het in ’n onderhoud met Artistdirect gesê “Alter Bridge is definitief ’n konsertgroep. Dit is waaroor dit vir ons gaan. Ons maak albums sodat ons vir mense kan gaan speel.”[72] Die groep het opgetree saam met verskeie gaste insluitend Slash[73] Paul Reed Smith,[74] Wolfgang Van Halen,[75] Eric Friedman en verskeie noemenswaardige musikante soos Eddie Van Halen,[76] Jimmy Page en John Paul Jones,[77] het al na Alter Bridge se konserte gaan kyk. Alter Bridge se konsertoptredes word oor die algemeen hoog aangeslaan.[78]

Aktivisme[wysig]

Alter Bridge het vroeg in 2010 by die Rolstoelstigting, DC3 Music Group en ander kunstenaars soos Scott Stapp, Godsmack en New Kids on the Block aangesluit om by te staan met die Plane to Haiti-projek, ’n hulpverleningsprojek vir die slagoffers van die aardbewing in Haïti in 2010.[79] Die groep het ook by die stryd teen kanker aangesluit in 2011 deur die “Play for Life”-organisasie te help met insamel van fondse vir die City of Hope Mediese Sentrum, ’n leidende kankernavorsingsentrum.[80]

Toekennings en eerbetone[wysig]

In Oktober 2010 is die groep se lied “Ties That Bind” van Blackbird deur Total Guitar gelys as die 41ste grootste kitaarlied van die dekade[81] met Ultimate Guitar wat AB III in Desember 2010 benoem het as die sewende beste album van daardie jaar.[82] In Maart van die volgende jaar is die dubbele kitaarsolo in die hoogaangeskrewe lied “Blackbird” deur Guitarist benoem as die grootste kitarsolo van alle tye, bo liedjies deur kunstenaars soos Led Zeppelin, Guns N’ Roses, Van Halen, Pink Floyd en andere.[21] Myles Kennedy het hierop gereageer deur te sê dat hy “effens ongemaklik is met die idee dat dit as die ‘beste’ benoem is” maar hy en Tremonti het albei genoem dat hule geëerd voel.[83] In Mei 2011 het die groep groepe soos Avenged Sevenfold, Linkin Park, Three Days Grace en ander verslaan in Fuse TV se peiling vir “Battle of the Fans”. Daar het soveel as 7,2 miljoen stemme ingekom vir die peiling.[84]

Alter Bridge se musiek is in hul vroeë jare nie goed deur resensente ontvang nie maar hul eerste album One Day Remains het volgens die Amerikaanse Opname-industrievereniging goue status behaal in November 2004. Dit is die groep se enigste RIAA-gesertifiseerde album.[85] Sedertdien is die groep se volgende albums oor die algemeen goed ontvang. Die groep se … en konsertrolprent, Live from Amsterdam is ook goed ontvang: dit is oorspronklik via Amazon.com vrygestel waar dit in slegs agt uur 15 000 plekke opgeklim het in Amazon se “Topverkopers in Musiekvideo’s en Konserte” bo kunstenaars soos Michael Jackson en Bon Jovi, tot heel bo waar dit vir ’n aantal weke gebly het. Dit is gedoen ten spyte van enige amptelike promosie of die ondersteuning van enige platemaatskappy.[22] In laat 2009 is Alter Bridge deur die Ultimate Guitar Archive benoem as die 36ste beste heavy metal groep van die dekade.[86]

Groeplede[wysig]

Diskografie[wysig]

Verwysings[wysig]

  1. 1,0 1,1 (en) Alter Bridge”. Allmisuc. URL besoek op 2 Oktober 2013.
  2. 2,0 2,1 2,2 (en) Joe D'Angelo (8 Junie 2004). “Lewe na Creed: Alter Bridge kyk na ’n Stapp-vrye toekoms”. MTV News.
  3. 3,0 3,1 (en) Alter Bridge”. VH1.
  4. (en) Joe D'Angelo (4 Junie 2004). “Mark Tremonti blameer spanning tussen groep, sanger Scott Stapp.”. MTV.
  5. (en) Johnny Loftus. “One Day Remains - Alter Bridge”. Allmusic.
  6. (en) Scott Shelter. “Alter Bridge: One Day Remains”. Slant Magazine.
  7. (en) RIAA Soekbare databasis – Goud en Platinum”. Opname-industrievereniging van Amerika. URL besoek op 29 Augustus 2010.
  8. (en) Alter Bridge Album- & Liedaanwysergeskiedenis”. Billboard.
  9. (en) Russ Breimeier. “One Day Remains, Christelike musiekoorsig”. The Fish.
  10. (en) WWE RAW UITSLAE”. 29 Augustus 2005.
  11. (en) Alter Bridge Biografie by ActiveMusician”. AciveMusician.
  12. (en) Elektra: Die Album Klankbaan CD”. Marvel Comics.
  13. (en) Fantastic Four - Die Album Klankbaan”. Amazon.com.
  14. 14,0 14,1 (en) Alter Bridge verlaat Wind-up Records”. Blabbermouth.net: 28 April 2006.
  15. (en) Herndon, Jessica, "Creed herenig vir nuwe album", People, 27 April 2009. URL besoek op 29 April 2009.
  16. (en) Alter Bridge teken kontrak met Universal Republic”. Blabbermouth.net: 9 Julie 2007.
  17. (en) Alter Bridge: Nuwe albumtitel, vrystellingsdatum bekend gemaak”. Blabbermouth.net: 19 Julie 2007.
  18. (en) “Watch Over You (Celebrity Rehab 2)” deur Alter Bridge”. VH1.
  19. (en) Watch Over You (duet met Christina Scabbia) - Enkelspeler”. iTunes Store.
  20. 20,0 20,1 (en) Blackbird-resensie”. Ultimate Guitar Archive.
  21. 21,0 21,1 (en) Peiling vir beste solo: Alter Bridge praat”. Guitarist. MusicRadar: 21 Maart 2011.
  22. 22,0 22,1 22,2 (en) Alter Bridge gaan eerste konsertrolprent ‘Live from Amsterdam’ vrystel”. Road Crew Mag.
  23. (en) Alter Bridge ‘Live from Amsterdam’”. Universal Republic.
  24. (en) Alter Bridge (26 Oktober 2010). “Alter Bridge - Live from Amsterdam No. 1 in Konsert/Musiek DVD’s op Amazon”.
  25. 25,0 25,1 (en) Alter Bridge. “Alter Bridge - Live from Amsterdam - Nou beskikbaar VSA/Kanada”.
  26. (en) Michaels, Sean (13 Oktober 2008). “Gaan Led Zeppelin opnuut bestaan met Myles Kennedy as sanger?”. guardian.co.uk. URL besoek op 2010.
  27. (en) Puiu, Tibi (10 Oktober 2008). “Gaan Led Zeppelin opnuut bestaan met Myles Kennedy aan boord?”. ZME Music. URL besoek op 2010.
  28. (en) Parrack, Dave (13 Oktober 2008). “Gaan Led Zeppelin saam met Myles Kennedy eerder as Robert Plant toer?”. EveryJoe.com. URL besoek op 2010.
  29. (en) Alter Bridge sanger sê dat gerugte oor Led Zeppelin-lede ‘onwerklik’ was”. Blabbermouth.net: 20 Januarie 2009. URL besoek op 2010.
  30. (en) Sauer, Steve (16 Desember 2009). “Eksklusiewe onderhoud: Myles Kennedy verheug om met Zeppelin-lede te kon saamwerk”. LedZeppelinNews.com. URL besoek op 2010.
  31. (en) Bosso, Joe (7 Februarie 2010). “Slash kies Alter Bridge se Myles Kennedy vir solotoer”. MusicRadar. URL besoek op 2010.
  32. (en) Alter Bridge (16 Februarie 2010). “Opnames van AB III begin vandag (met foto’s)”.
  33. (en) Alter Bridge (11 Mei 2010). “Alter Bridge in New York - Finaliseer meng van derde album”.
  34. (en) Graff, Gary (17 Julie 2010). “Creed op pad na ateljee voor somertoer”. Billboard.
  35. Alter Bridge (9 Augustus 2010). “Nuwe Alter Bridge album se titel en snitlys”. Official Alter Bridge website.
  36. (en) Roadrunner Records (31 Augustus 2010). “Roadrunner verwelkom Alter Bridge”.
  37. (en) Luister na ’n splinternuwe snit van Alter Bridge”. Roadrunner Records: 6 September 2010.
  38. 38,0 38,1 (en) Alter Bridge (1 Desember 2011). “Alter Bridge Persverklaring - Isolation bereik no. 1 op Rock Radio”. Alter Bridge.
  39. (en) AB III kom 9 November op die rakke met die enkelspeler “Isolation””. Alter Bridge woernaal. 6 Oktober 2010. URL besoek op 6 Oktober 2010.
  40. (en) Alter Bridge fokus op die ondersteuners vir ‘Isolation’”. Noisecreep: 6 Desember 2010.
  41. (en) I Know It Hurts - Enkelspeler”. iTunes.
  42. (en) Alter Bridge gaan met Abbey Road Live saamwerk vir komende toer”. Blabbermouth.net: 24 Maart 2011.
  43. (en) Alter Bridge - Wonderful Life - Roadrunner Records UK”. Roadrunner Records.
  44. 44,0 44,1 (en) Alter Bridge. “Nuwe Alter Bridge biografie”.
  45. (en) Alter Bridge bestorm die trefferlyste met “AB III””. Muen-tydskrif: 10 November 2010.
  46. (en) Laing, Rob (17 September 2010). “Alter Bridge – AB III: snit-vir-snit-resensie”. MusicRadar. Future Publishing Limited. URL besoek op 4 Oktober 2010.
  47. (en) Florino, Rick (12 Oktober 2010). “Alter Bridge “AB III” Resensie — 5 uit 5 sterre”. URL besoek op 12 Oktober 2010.
  48. (en) String Tribute to Alter Bridge”. Bestbuy.com. URL besoek op 17 Julie 2011.
  49. Alter Bridge: ‘AB III.5’ CD/DVD Spesiale Uitgawe Detail”. Blabbermouth.net: 21 September 2011.
  50. (en) Alter Bridge Toerdatums - Alter Bridge Konsertskedule”. Eventful.com.
  51. (en) Alter Bridge laat ondersteuners via Twitter weet”. Twitter: 28 Januarie 2011.
  52. (en) Alter Bridge (28 Januarie 2011). “Alter Bridge AB III VSA Lentetoer - Eerste datums bekendgemaak”. Alter Bridge.
  53. (en) Alter Bridge (3 Februarie 2011). “Nuwe VSA Lentetoerdatum + Like A Storm toegevoeg”. Alter Bridge.
  54. (en) Alter Bridge (13 Januarie 2011). “Alter Bridge gaan Duitse feeste in Junie vermaak”. Alter Bridge.
  55. (de) Naastenby 60.000 kaartjies vir Ring en Park verkoop”. Rock am Ring: 13 Januarie 2011.
  56. (en) Alter Bridge (19 Januarie 2011). “Alter Bridge gaan in Junie by Nova Rock-fees (Oostenryk) optree”. Alter Bridge.
  57. Novarock - Tuis”. Nova Rock-fees.
  58. (en) Groepe vir Download-fees”. Download-fees.
  59. (en) Alter Bridge (27 Januarie 2011). “Alter Bridge gaan in Junie by Hellfest (Frankryk) optree”. Alter Bridge.
  60. (en) Alter Bridge (16 Februarie 2011). “Persverklaring - Jimmy Kimmel, Nuwe video en toerdatums”. Alter Bridge.
  61. (en) Persverklaring van die tweede jaarlikse “Carnival of Madness””. Facebook: 23 Mei 2011.
  62. (en) Alter Bridge gaan vroeg in 2012 in Australië speel”. Alter Bridge: 19 September 2011.
  63. (en) Alter Reality”.
  64. (en) Sciarretto, Amy (11 November 2011). “Alter Bridge gaan vertoning by Wembley-arena opneem vir DVD-vrystelling”. Artistdirect.
  65. (en) Alter Bridge ‘Live at Wembley’-DVD opdatering van regisseur”. Audio Ink Radio: 17 Maart 2012.
  66. (en) Alter Bridge gaan konsertalbum en DVD ‘Live At Wembley’ volgende jaar vrystel”. NME: 27 Desember 2011.
  67. (en) ’n Inleiding tot Alter Bridge met Myles Kennedy”. Roadrunner Records: 30 September 2010.
  68. (en) Florino, Rick (11 Oktober 2010). “Myles Kennedy van Alter Bridge praat oor “AB III,” Slash en John Irving”. Artistdirect. Rogue Digital, LLC. URL besoek op 20 Oktober 2010.
  69. (en) AB III-resensie”. Ultimate Guitar Archive.
  70. (en) Mawer, Sharon. “Blackbird - Alter Bridge”. Allmusic.
  71. (en) Nuwe onderhoud met Myles Kennedy van Alter Bridge”. They Will Rock You: 17 November 2010.
  72. 72,0 72,1 (en) Myles Kennedy van Alter Bridge praat oor “Field of Dreams,” solo-album en “AB III””. Artistdirect: 11 Oktober 2010.
  73. Slash op die verhoog saam met Alter Bridge in Stockholm”. Blabbermouth.net: 2 November2010.
  74. (en) Vrana, Johnnie (18 Desember 2010). “Paul Reed Smith & Alter Bridge @ Rams Head Live 12-16-2010”. Shockwave Magazine.
  75. (en) Wolfgang van Halen speel tromme vir Alter Bridge; video beskikbaar”. Blabbermouth.net: 7 Januarie 2011.
  76. (en) Eddie & Wolfgang Van Halen woon Alter Bridge konsert by, Wolfgang sluit aan op tromme”. Van Halen News Desk: 5 Januarie 2011.
  77. (en) Sauer, Steve (10 November 2008). “Bron: Page, Jones, Bonham kyk na Alter Bridge in Londen; DVD-verfilming uitgestel”. LedZeppelinNews.com. URL besoek op 2010.
  78. (en) DVD-resensie: Alter Bridge: Live from Amsterdam”. The Audio Perv: 25 Desember 2009.
  79. (en) Eisen, Benjy (26 Januarie 2010). “Scott Stapp wag in Port-Au-Prince vir ‘Plane to Haiti’-hulpverlening”. Spinner.com.
  80. (en) Play for Life – Veiling: Alter Bridge”. Play for Life.
  81. (en) Matthew Parker (8 Oktober 2010). “Die 50 grootste riffs van die dekade”. Total Guitar.
  82. (en) Samuel Agini (24 Desember 2010). “UG toptien albums van 2010”. Ultimate Guitar Archive.
  83. (en) Peiling vir greatest solo: Alter Bridge praat, bladsy 2”. Guitarist. MusicRadar: 21 Maart 2011.
  84. (en) “Battle of the Fans | Rockers””. fuse.tv. URL besoek op 17 Julie 2011.
  85. Hierdie statistiek is saamgestel uit die aanlyndatabasis van die RIAA-sertifisering: "Goud-en-Platinumdatabasis", Recording Industry Association of America.
  86. (en) Amy Kelly (24 Desember 2009). “Die toptien groepe van die dekade: Metal voer steeds hoogty”. Ultimate Guitar Archive.

Eksterne skakels[wysig]

Commons-logo.svg
Wikimedia Commons het meer media verwant aan:
Alter Bridge (kategorie)