Margrethe II van Denemarke
| Margrethe II | |
|---|---|
| Koningin van Denemarke | |
 |
|
| Periode | 14 Januarie 1972 – hede |
| Voorganger | Frederik IX |
| Opvolger | Kroonprins Frederik |
| Huis | Sleeswyk-Holstein-Sonderburg-Glücksburg |
| Eggenoot | Henri de Laborde de Monpezat |
| Kinders | Kroonprins Frederik Prins Joachim |
| Vader | Frederik IX |
| Moeder | Prinses Ingrid van Swede |
| Gebore | 16 April 1940, Kopenhagen |
Margrethe II (Margrethe Alexandrine Þórhildur Ingrid, gebore 16 April 1940) is sedert 1972 koningin van Denemarke. Sy is die eerste vroulike heerser van die land ná Margrethe I, wat van 1388 tot 1412 oor die Skandinawiese lande geheers het tydens die Kalmarunie.
Koningin Margrethe II se amptelike slagspreuk is: Die Hulp van God, die Liefde van die Volk, die Krag van Denemarke.
Inhoud |
[wysig] Vroeë lewe
Prinses Margrethe is in die Amalienborg-paleis in Kopenhagen gebore as die oudste kind van Frederik IX en sy vrou, kroonprinses Ingrid. Omdat koning Christiaan X in dié tyd ook koning van Ysland was, het die prinses die Yslandse naam Þórhildur gekry as eerbetoon aan die mense van dié land. Dit word gespel met die Yslandse letter thorn, wat ook as "th" geskryf word, en haar naam word dus soms "Thorhildur" gespel.[1]
Margrethe is nie as troonopvolger gebore nie. Weens die Saliese wet, wat ook in Denemarke van krag was, kon net mans die troon bestyg nadat die Glücksburg-tak aan die bewind gekom het. Sy het nie broers gehad nie en haar oom Knud was die waarskynlike troonopvolger.
Die proses om die grondwet te verander het in 1947 begin toe dit duidelik word koningin Ingrid sou nie nog kinders hê nie. Die gewildheid van Frederik en sy dogters en die meer prominente rol wat vroue in Denemarke begin speel het, het die verandering tot gevolg gehad. Twee agtereenvolgende parlemente en ’n referendum moes die stap goedkeur. Sedertdien word vroue toegelaat om die troon te bestyg as hulle nie ’n broer het nie. Prinses Margrethe het toe die waarskynlike opvolger geword.
Sy het aan verskeie universiteit studeer en op 10 Junie 1967 in Kopenhagen getrou met ’n Franse diplomaat, hertog Henri de Laborde de Monpezat. Hy het die koninklike titel "prins Henrik van Denemarke" gekry.
[wysig] Bewind
Koning Frederik IX is in 1972 oorlede en Margrete het koningin geword kragtens die nuwe opvolgingswet. Haar hooftaak is om die koninkryk oorsee te verteenwoordig en ’n verenigende taak tuis te verrig. Sy open uitstallings, herdenkings, brûe, ens. Sy mag nie aan die politiek deelneem of ’n politieke opinie lug nie.
Die koningin is ’n erkende skilder en het al baie uitstallings van haar werk gehou. Haar illustrasies, onder die skuilnaam Ingahild Grathmer, is gebruik vir die Deense uitgawe van The Lord of the Rings wat in 1977 gepubliseer is en in 2002 herdruk is. Sy is ook ’n hoogs aangeskrewe vertaler wat aan die boek help vertaal het. Verder ontwerp sy van haar eie klere.
In 2008 het die koningin aangekondig dat haar afstammelinge deur die manlike linie die bykomende titel Hertog of Hertogin van Monpezat sou hê.
[wysig] Kinders
Die koningin en prins Henrik het twee seuns:
- Frederik André Henrik Christian, kroonprins van Denemarke, Hertog van Monpezat, gebore op 26 Mei 1968. Hy het op 14 Mei 2004 getrou met Mary Elizabeth Donaldson. Hulle het twee kinders.
- Prins Joachim Holger Waldemar Christian van Denemarke, Hertog van Monpezat, gebore op 7 Junie 1969. Hy het op 18 November 1995 getrou met Alexandra Christina Manley. Hulle het drie kinders.
[wysig] Afkoms in die manlike linie
Margrethe se afkoms deur die manlike linie, dus van vader tot seun, kan eeue terug nagespeur word en beteken dat as sy ’n histories korrekte naam vir die koningshuis moes kies, dit Oldenburg sou wees.
- Egilmar I van Lerigau, datums onbekend
- Egilmar II van Lerigau, d. 1142
- Christiaan I van Oldenburg, d. 1167
- Moritz van Oldenburg, d. 1209
- Christiaan II van Oldenburg, d. 1233
- Johan I, Hertog van Oldenburg, d. 1275
- Christiaan III, Hertog van Oldenburg, d. 1285
- Johan II, Hertog van Oldenburg, d. 1314
- Konrad I, Hertog van Oldenburg, 1300–1347
- Christian V, Hertog van Oldenburg, 1340–1423
- Dietrich, Hertog van Oldenburg, 1398–1440
- Christiaan I van Denemarke, 1426–1481
- Frederik I van Denemarke, 1471–1533
- Christiaan III van Denemarke, 1503–1559
- Johan II, Hertog van Sleeswyk-Holstein-Sonderburg, 1545–1622
- Alexander, Hertog van Sleeswyk-Holstein-Sonderburg, 1573–1627
- August Philipp, Hertog van Sleeswyk-Holstein-Sonderburg-Beck, 1612–1675
- Frederik Lodewyk, Hertog van Sleeswyk-Holstein-Sonderburg-Beck, 1653–1728
- Pieter August, Hertog van Sleeswyk-Holstein-Sonderburg-Beck, 1696–1775
- Prins Karl Anton August van Sleeswyk-Holstein-Sonderburg-Beck, 1727–1759
- Friedrich Karl Ludwig, Hertog van Sleeswyk-Holstein-Sonderburg-Beck, 1757–1816
- Friedrich Wilhelm, Hertog van Sleeswyk-Holstein-Sonderburg-Glücksburg, 1785–1831
- Christiaan IX van Denemarke, 1818–1906
- Frederik VIII van Denemarke, 1843–1912
- Christiaan X van Denemarke, 1870–1947
- Frederik IX van Denemarke, 1899–1972
- Margrethe II van Denemarke, b. 1940
[wysig] Verwysings
- Hierdie artikel is merendeels vertaal vanaf die Engelse Wikipedia-artikel [1]
- ^ "Those Apprentice Kings and Queens Who May – One Day – Ascend a Throne," New York Times. 14 November 1971.
[wysig] Eksterne skakels
- Koningshuis van Denemarke en van Ysland
- Die stamboom van Henri de Laborde de Monpezat
- Webtuiste van die koningin
- Webtuiste van die Deense monargie
- Illustrasies – Lord of the Rings
| Monarge van Denemarke | |||||||||
|
|||||||||
