Nasionale Bergkwaggapark
[wysig] Bewaring van wildspesies
Die Nasionale Bergkwaggapark is in 1937 gestig om die Kaapse Bergkwagga van uitwissing te red, 'n lot wat die Kwagga slegs enkele jare tevore getref het. Die park is naby Cradock in die Oos-Kaap Provinsie geleë en huisves tans meer as 350 Bergkwaggas. Ander groter soogdiere wat hier hervestig is, sluit in Buffels, Swartrenosters, Rooihartbeeste, Elande en Gemsbokke. Die Bontkwagga kom ook in die park voor - daar is dus twee kwaggaspesies wat deel van die park se dierebevolking uitmaak.
Oorspronklik was net 4 swartrenosters in die park hervestig. Twee kalwers is intussen gebore en daar is tans (Jun 2009) ses renosters. Nog 'n suksesverhaal is die hervestiging van Jagluiperds in die park. Die jagluiperds het so goed aangepas dat daar reeds 'n werpsel welpies gebore is.
'n Projek van die Ereveldwagters van die park is om in die afsienbare toekoms Rooibekrenostervoëls in die park te help hervestig. Die park is dus nie net die tuiste van soogdiere nie, maar ook 'n hele aantal interessante en skaars voëlspesies kan hier gesien word. Op die Rooiplaatplato kom die statige Bloukraanvoël voor en in die vlakte word die Sekretarisvoël en Ludwig se Pou heel dikwels opgemerk.
[wysig] Toerisme
Akkommodasie in die park bestaan uit[1]:
- 19 Familie-eenhede met 76 beddens (elke eenheid slaap 4 persone).
- Een kampterrein met 20 persele, maksimum 6 persone per perseel.
- Ablusie- en kombuisfasiliteite binne kampterrein.
- Twee gastehuise (slaapplek vir agt persone in totaal).
- Twee berghutte op die staproetes met slaapplek vir 12 persone.
