A.G. Visser

in Wikipedia, die vrye ensiklopedie
Spring na: navigasie, soek
A.G. Visser
Borsbeeld en huis van Dr. A.G. Visser, in Heidelberg, Gauteng.
Geboortenaam Andries Gerhardus Visser
Gebore 1 Maart 1878
Fraserburg
Oorlede 10 Junie 1929
Heidelberg, Gauteng
Nasionaliteit Suid-Afrika
Ouers Andries en Martha Visser
Beroep Geneesheer, digter
Bekend vir Gedigte
Huweliksmaat Lettie Conradie
Marie de Villiers
Die AG Visser-huis in Heidelberg, Gauteng.

A.G. Visser (1878 - 1929) was 'n bekende, vroeë Afrikaanse digter. Hy was algemeen bekend as die "sanger van die Suikerbosrand.

Lewensgeskiedenis[wysig]

Andries Gerhardus Visser is op 1 Maart 1878 op die plaas Zaaifontein, in die distrik van Fraserburg, Kaapkolonie, gebore. 'n Groot droogte het sy ouers van hulle plaas in Carnarvon afgedryf, en hy is in n tentjie op die werf van die plaashuis, onder die skaduwee van 'n peerboom gebore. Hy gaan skool in Daljosafat, (twee ander bekende skrywers, Totius en D.F. Malherbe is in dié tyd ook saam met hom op skool), ontvang opleiding in onderwys aan die Normaalkollege te Kaapstad, en studeer as geneesheer in Edinburg, Skotland, vanaf 1901 tot 1906. Hy werk as dokter te Carnarvon (1907-1909), Steytlerville (1909-1916) en Heidelberg (1916 – 1929). Hy word groot vriende met die digter Eugene Marais in die Heidelberg-jare. Hy trou twee maal, in 1913 met Lettie Conradie, oorlede in 1920; en in 1927 met Marie de Villiers. Hy sterf op 10 Junie 1929.

Letterkunde, en letterkundige invloed[wysig]

Visser publiseer vroeg reeds; op agtien, in Ons Kleintji. Sy werk word egter gesien nie as deel van die Eerste Taalbeweging nie, maar as die einde van die poësie vir die periode tot 1930. Hy wen twee maal die Hertzogprys vir letterkunde: vir beide sy eerste en tweede digbundels. Sy verse is kenmerkend eenvoudig en sangerig. Hy dryf die spot met die Afrikaner en sy gewoontes, maar met 'n goeie hart. Hy maak gebruik van tradisionele versvorms soos die rondeel; van intertekstuele verwysings; en tegnieke soos die omdop van idiome, puntdigte, epigramme en woordspelings.

Bibliografie[wysig]

  • Gedigte. (Uitgewer J.L. Van Schaik, 1925).
  • Rose van herinnering en ander gedigte. (Uitgewer J.L. van Schaik, 1927).
  • Die purper iris, en ander nagelate gedigte. (Uitgewer Nasionale Pers, 1930).
  • Uit ons prille jeug. (Uitgewer Nasionale Pers, 1948).
  • Bloemlesing uit die gedigte. (Uitgekies en ingelei deur G. Dekker. Uitgewer Van Schaik, 1955).
  • Kinderkeur. (Uitgekies deur D.J. Opperman. Uitgewer Van Schaik, 1967).
  • Roos en lanset: ’n keuse uit A.G. Visser. (Uitgekies deur F.I.J. van Rensburg. Uitgewer Van Schaik, 1978).
  • Versamelde gedigte. (Uitgewer Tafelberg, 1981).

Bibliografie oor hom[wysig]

  • A.G Visser, digter en sanger. (Nienaber, P.J. Uitgewer Afrikaanse persboekhandel, 1950).
  • Sanger van die suikerbosrand; die lewensverhaal van A.G. Visser. (Langenhoven, P.H. Uitgewer Voortrekkerpers,1950).
  • A.G. Visser in woord en beeld. (Venter, E.A. 1978. Selfgepubliseer, 1978).
  • Geskiedenis van die Afrikaanse literatuur. I. (Kannemeyer, J.C. Uitgewer Academica,1978).
  • A.G. Visser – 'n vertolkingsdimensie. (Schutte, Paul. Uitgewer P.U. vir C.H.O., 1979).
  • Perspektief en profiel, II. (Venter, Leona. A.G. Visser. In: Van Coller, H.P. (red.). 1999. Uitgewer J.L. van Schaik, 1999).

Bron[wysig]

Commons-logo.svg
Wikimedia Commons het meer media verwant aan:
A.G. Visser (kategorie)