Anjelica Huston

in Wikipedia, die vrye ensiklopedie
Spring na: navigasie, soek
Anjelica Huston
'n Beeld van die betrokke persoonlikheid.
Huston in 2010.

Geboorte 8 Julie 1951 (1951-07-08) (66 jaar oud)
Aktiewe jare 1967-tans

Anjelica Huston (IFA: ˈhjuːstən; gebore op 8 Julie 1951) is ’n Amerikaanse aktrise, regisseur en voormalige model. Sy was die derde geslag van haar familie wat ’n Oscar inpalm; haar pa, die regisseur John Huston, en oupa die akteur Walter Huston het dit ook gewen. Sy het ook Oscar-benoemings gekry vir haar spel in Enemies, a Love Story (1989) en The Grifters (1990).

Loopbaan[wysig | wysig bron]

Saam met haar pa, John Huston, omstreeks 1960.

Huston het ’n groot deel van haar kinderlewe in Ierland en Engeland deurgebring en het klein rolle in haar pa se flieks vertolk. Ná haar ma se dood in 1969 het sy na Amerika verhuis en etlike jare lank modelwerk gedoen.

In die vroeë 1980's het sy besluit om haar op rolprentwerk toe te spits en toneelspel studeer. Haar eerste noemenswaardige rol was in The Postman Always Rings Twice (1981). In 1985 het haar pa haar die rol van Maerose, die dogter van ’n Mafiabaas, gegee in Prizzi's Honor, ook met Jack Nicholson. Huston het die Oscar vir beste vroulike byspeler gewen en die eerste persoon geword wat ’n Oscar wen nadat ’n ouer én grootouer dit ook reggekry het.

Huston is vir Baftas benoem vir haar spel in Woody Allen se prente Crimes and Misdemeanors (1989) en Manhattan Murder Mystery (1993). Sy was ook Morticia Addams in die gewilde The Addams Family (1991) en Addams Family Values (1993), waarvoor sy twee Golden Globe-benoemings gekry het, en die Grand High Witch in die kinderprent The Witches (1990). Sy het dikwels saam met die regisseur Wes Anderson gewerk, onder meer in The Royal Tenenbaums (2001) en The Life Aquatic with Steve Zissou (2004).

Sy is ook die skrywer van twee memoires, A Story Lately Told en Watch Me.[1]

Verwysings[wysig | wysig bron]

  1. Galanes, Philip (2015-02-20). "For Sofia Coppola and Anjelica Huston, Oscar's a Family Friend". The New York Times. New York, VSA: NYTC. ISSN 0362-4331. Verkry op 28 Maart 2015. 

Eksterne skakels[wysig | wysig bron]